credit card
Credit Card Spending in India: जर तुम्हीही खरेदी, ऑनलाइन पेमेंट किंवा इतर गरजांसाठी क्रेडिट कार्डचा वापर करत असाल, तर भारतीय रिझर्व्ह बँकेचे हे आकडे तुम्हाला थक्क करू शकतात. देशभरात क्रेडिट कार्डद्वारे होणारा खर्च सतत वाढत आहे. जुलै २०२६ मध्ये क्रेडिट कार्डच्या माध्यमातून झालेला एकूण खर्च सुमारे २.०८ लाख कोटी रुपये होता, जो गेल्या वर्षीच्या जुलै महिन्याच्या तुलनेत जास्त आहे.
विशेष म्हणजे, सलग तिसऱ्या महिन्यात कार्डद्वारे होणारा खर्च २ लाख कोटींच्या वर राहिला आहे. या आकडेवारीवरून हे स्पष्ट होते की, आजकाल लोक पेमेंट आणि खरेदीसाठी क्रेडिट कार्डचा वापर पूर्वीपेक्षा जास्त करत आहेत. चला तर मग जाणून घेऊया, कोणत्या बँकेच्या कार्डवरून सर्वाधिक खर्च करण्यात आला आहे.
आरबीआयच्या आकडेवारीनुसार, बँकांच्या कामगिरीवर नजर टाकल्यास क्रेडिट कार्डच्या खर्चानुसार मोठ्या खाजगी बँका आघाडीवर राहिल्या आहेत:
1. HDFC बँक: जुलैमध्ये या कार्डवरून सुमारे ६०,२१७.५४ कोटी रुपयांचा खर्च झाला, जो गेल्या वर्षीच्या तुलनेत ११.९३% जास्त आहे.
2. ICICI बँक: या बँकेच्या कार्डवरील खर्चात वार्षिक आधारावर ५.९% घट झाली असून हा खर्च सुमारे ३४,०२५.२७ कोटी रुपये राहिला.
3. अ‍ॅक्सिस बँक (Axis Bank): याच्या क्रेडिट कार्डवरून सुमारे २३,८२४.७ कोटी रुपये खर्च झाले, ज्यामध्ये वार्षिक आधारावर ४.६% वाढ नोंदवली गेली.
4. एसबीआय कार्ड्स (SBI Cards): जुलैमध्ये सुमारे ३९,५९१.७६ कोटी रुपयांचा खर्च झाला, ज्यामध्ये वार्षिक आधारावर २१.६% वाढ झाली आहे.
जुलैपर्यंत सार्वजनिक क्षेत्रातील बँकांचा एकूण क्रेडिट कार्ड खर्च सुमारे ४६,००० कोटी रुपये राहिला आहे.
तज्ज्ञांच्या मते, देशभरात दरमहा सुमारे २ लाख कोटींपेक्षा जास्त होणारा क्रेडिट कार्ड खर्च आता एक सामान्य ट्रेंड बनू शकतो. विशेषतः आगामी महिन्यांत सणासुदीचा काळ सुरू होत असल्याने लोकांचा क्रेडिट कार्डवरील खर्च आणखी वाढण्याची अपेक्षा आहे. अशा प्रकारे शॉपिंग, प्रवास आणि इतर गरजांसाठी कार्डचा वापर वाढल्यामुळे एकूण खर्चातही तेजी येईल असा अंदाज आहे.
.png "Videos"){kind=small}
