Dry Fruits: थंडीने सुकामेव्याच्या उत्पादनावर मोठा परिणाम; ड्राय फ्रूटसच्या दरात १५ ते २० टक्क्यांनी वाढ

दरवर्षी थंडीच्या दिवसात खोबरे आणि डिंकाला मोठ्या प्रमाणावर मागणी असते. थंडीत खोबरे, डिंक, मेथी आदींपासून तयार केलेल्या लाडूंना मागणी जास्त असते.

पुणे: मागील दोन वर्ष सातत्याने सुकामेव्याचे दर कमी होते. परंतु, यंदा ग्राहकांना काही प्रमाणात सुकामेवा महाग खरेदी करावा लागत आहे. सुकामेव्याच्या दरात वाढ झाल्याने सर्वसामान्यांना याची झळ बसत आहे. परंतु, यंदा थंडी जास्त असल्याने नागरिक सुकामेवा खरेदीवर भर देत आहेत. राज्यभरात थंडीचा कडाका वाढला आहे. यामुळे आरोग्याच्या दृष्टीने शरीरात उष्णता निर्माण होण्यासाठी आणि आरोग्यासाठी फायदेशीर असणाऱ्या सुकामेव्याला मागणी वाढली आहे.

यंदा जगभरात बहुतांशी सुकामेव्याच्या उत्पादनावर मोठा परिणाम झाला आहे. त्यामुळे विविध प्रकारच्या सुकामेव्याच्या दरात १५ ते २० टक्क्यांनी वाढ झाली आहे.
बाजारात बदाम, खोबरे, जर्दाळू, अक्रोड, मनुका, पिस्ता, काजू, डिंक, खोबरे, जर्दाळूच्या मागणीत वाढ झाली आहे. हिवाळ्यात सुकामेवा खाल्ल्याने शरीराला आवश्यक सर्व घटक मिळतात. यामुळे शरीराची कॅलरीची गरज पूर्ण होते. यातून मिळणारे पोषकतत्त्व शरीराला उपयोगी पडतात. त्यामुळे थंडीच्या काळात सुकामेव्याला मागणी वाढते, असे मार्केट यार्डातील व्यापारी विनोद गोयल यांनी सांगितले.

दरवर्षी थंडीच्या दिवसात खोबरे आणि डिंकाला मोठ्या प्रमाणावर मागणी असते. थंडीत खोबरे, डिंक, मेथी आदींपासून तयार केलेल्या लाडूंना मागणी जास्त असते. हे पदार्थ बनविण्यासाठी ड्रायफ्रूट वापरले जात असल्याने काजू, बदाम, पिस्ते, खारीक, खोबरे आदींना मागणी आहे.

यंदा जगभरात सततच्या वातावरणाच्या परिणामामुळे उत्पादनात घट झाली आहे. मार्चमध्ये नवीन पीक आल्यानंतर दरात घट होईल. इराण युद्धामुळे खजूर, काळा मनुका, अंजीर, केसर, शहाजिरे दरात वाढ झाली आहे. दरात अंदाजे १५-२० टक्क्यांनी वाढ झाली आहे.

– नवीन गोयल, सुकामेवा व्यापारी, मार्केट यार्ड

हेही वाचा: हिवाळ्यामध्ये कुटुंबाला ठेवा निरोगी; ‘हे’ ५ स्वस्त ड्राय फ्रूट्स खाणे फायदेशीर ठरेल

आवक

खोबरे : तमिळनाडू, केरळ, आंध्र प्रदेश, कर्नाटक
काजू : गोवा, कर्नाटक,
कोकण, केरळ
मनुका : सांगली, विजापूर, नाशिक, पंढरपूर

विविध देशांतून आयात
खारा पिस्ता – इराण, अमेरिका, कॅलेफॉर्निया
बदाम – कॅलेफॉर्निया, ऑस्ट्रेलिया
पिस्ता – इराण, इराक
मॉमेरोन बदाम – इराण
अंजीर – इराण, अफगाणिस्तान
बेदाणा – अफगाणिस्तान, भारत
अक्रोड – अमेरिका, चिली, भारताच्या काही भागांतून

हेही वाचा: या ५ सोप्या पद्धतींनी ठेवा ड्रायफ्रुट्स वर्षानुवर्षे ताजे, जाणून घ्या या ५ सोप्या पद्धती

सुकामेव्याचे प्रतिकिलोचे भाव

सुकामेवा डिसेंबर २०२३ डिसेंबर २०२४
काजू ५५० ते ८५० ८०० ते १२००
अक्रोड बी ८०० ते १२०० १००० ते १५००
अक्रोड (अखा) ४५० ते ६०० ६०० ते ८००
बदाम ५०० ते ८०० ५०० ते ८००
अंजीर ७०० ते १००० १००० ते १५००
काळे मनुका ३०० ते ४०० ५०० ते ६००
बेदाणा (भारतीय) २०० ते ३०० २०० ते ३००
खारा पिस्ता ७०० ते १००० १००० ते १५००
जर्दाळू २०० ते ४०० ३०० ते ५००