शुक्रवार, 11 सप्टेंबर 2026
Representative Image (Photo - Social media)
नीता परब / मुंबई,नवराष्ट्र न्यूज नेटवर्क : महाराष्ट्र राज्य सामाईक प्रवेश परीक्षा कक्षातर्फे शैक्षणिक वर्ष २०२६-२७ साठी अभियांत्रिकी अभ्यासक्रमासाठी प्रवेश प्रक्रियाच्या ( Engineering Admission 2026 ) चार फेऱ्या राबविल्या गेल्या. या चार फेऱ्यामध्ये अभियांत्रिकी अभ्यासक्रमाच्या २ लाख ३ हजार २९३ उपलब्ध जागेपैकी १ लाख ५२ हजार ४५२ म्हणजे ७४.९९ % विद्यार्थ्यांनी प्रवेश घेतले आहेत. यावर्षी कॅप फेऱ्यामध्ये सर्वाधिक प्रवेश संगणक अभियांत्रिकी या विषयामध्ये झाले आहेत. व सर्वात जास्त प्रवेश सावित्रीबाई फुले पुणे विद्यापीठांतर्गत असलेल्या अभियांत्रिकी महाविद्यालयात झाले आहेत. तर जिल्ह्यानुसार सर्वाधिक प्रवेश पुणे जिल्ह्यात झाले आहेत.
राज्यात यावर्षी अभियांत्रिकी अभ्यासक्रमासाठीच्या प्रवेशासाठी ऑनलाईन नोंदणी २ जुलै पासून सुरु झाली होती. १९ जुलैला ही ऑनलाईन नोंदणी संपली. यावर्षी २ लाख ४५ हजार ६४६ विद्यार्थ्यांनी नोंदणी केली होती. विद्यार्थ्यांसाठी राज्यात ३८० अभियांत्रिकी महाविद्यालयामध्ये १११ अभ्यासक्रम उपलब्ध असून, यामध्ये २ लाख १८ हजार ९७६ जागा (व्यवस्थापन कोट्यासह) उपलब्ध आहेत. यापैकी प्रवेश प्रक्रियामध्ये २ लाख ३ हजार २९३ जागा उपलब्ध होत्या, चौथ्या फेरीअखेर ७४.९९ % म्हणजे १ लाख ५२ हजार ४५२ विद्यार्थ्यांनी राज्यातील १७ विद्यापीठातील ३८० अभियांत्रिकी महाविद्यालयात व अभियांत्रिकीच्या १११ विषयांच्या शाखेमध्ये प्रवेश घेतले आहेत.
सीईटी कक्षाच्या केंद्रीभूत प्रवेश प्रक्रियाच्या चार फेऱ्या झाल्या असून सध्या संस्थात्मक फेरी व व्यवस्थापन फेरीचे प्रवेश सुरु असून हे सर्व प्रवेश १४ सप्टेंबर पर्यंत राहणार आहेत. संस्थात्मक फेरी साठी कॅपमधून शिल्लक राहिलेल्या ५० हजार ८४१ जागा उपलब्ध आहेत. तर व्यवस्थापन कोट्यात १५ हजार ६८३ जागा उपलब्ध आहेत.
यावर्षी चौथ्या फेरीअखेर अभियांत्रिकीच्या १११ विषयांच्या शाखेमधून संगणक अभियांत्रिकी या शाखेमध्ये सर्वाधिक २३ हजार २३० विद्यार्थ्यांनी प्रवेश घेतला आहे. त्यानंतर अनुक्रमे मेकॅनिकल इंजिनिअरिंग, इलेक्ट्रॉनिक्स अँड टेलिकम्युनिकेशन इंजिनिअरिंग, कॉम्प्युटर सायन्स अँड इंजिनियरिंग, इन्फॉर्मेशन टेक्नॉलॉजी, सिव्हील इंजिनियरिंग व इलेक्ट्रिकल इंजिनियरिंग या शाखेमध्ये विद्यार्थ्यांनी प्रवेश घेतला आहे.
सीईटी कक्ष राज्यातील सार्वजनिक १७ विद्यापीठांतर्गत अभियांत्रिकी महाविद्यालयातील प्रवेश करते. केंद्रीभूत प्रवेश प्रक्रियानुसार चौथ्या फेरीअखेर राज्यात सर्वाधिक ५३ हजार ९७३ विद्यार्थ्यांनी पुण्यातील सावित्रीबाई फुले पुणे विद्यापीठांतर्गत अभियांत्रिकी महाविद्यालयात प्रवेश घेतला, या खालोखाल ३० हजार ९०९ विद्यार्थ्यांनी लोणेरे येथील डॉ. बाबासाहेब आंबेडकर तंत्रज्ञान विद्यापीठांतर्गत अभियांत्रिकी महाविद्यालयात प्रवेश घेतला, यानंतर २५ हजार ३५८ विद्यार्थ्यांनी मुंबईतील मुंबई विद्यापीठांतर्गत अभियांत्रिकी महाविद्यालयात प्रवेश घेतला. तसेच १४ हजार ०२४ विद्यार्थ्यांनी नागपूर येथील राष्ट्रसंत तुकडोजी महाराज नागपूर विद्यापीठ व ८ हजार ४१६ विद्यार्थ्यांनी कोल्हापूर येथील शिवाजी विद्यापीठांतर्गत अभियांत्रिकी महाविद्यालयात प्रवेश घेतला.
सीईटी कक्षाच्या केंद्रीभूत प्रवेशाच्या चौथ्या फेरीअखेर राज्यात जिल्हानिहाय प्रवेशामध्ये ४१ हजार १२२ विद्यार्थ्यांनी पुणे जिल्ह्यातील अभियांत्रिकी महाविद्यालयात प्रवेश घेतला. या खालोखाल १५ हजार ४८७ विद्यार्थ्यांनी नागपूर जिल्ह्यातील अभियांत्रिकी महाविद्यालयात प्रवेश घेतला. यानंतर १० हजार ५७० विद्यार्थ्यांनी नाशिक जिल्ह्यातील अभियांत्रिकी महाविद्यालयात प्रवेश घेतला. तसेच ९ हजार ६६९ विद्यार्थ्यांनी कोल्हापूर व ९ हजार १२ विद्यार्थ्यांनी मुंबई उपनगर जिल्ह्यातील अभियांत्रिकी महाविद्यालयात प्रवेश घेतला आहे.
UGC NET 2026 : नॅशनल टेस्टिंग एजन्सीकडून उत्तरतालिका रिलीज, अशी तपासा रेकॉर्डेड रिस्पॉन्स शीट!
१.कॉम्प्युटर इंजिनियरिंग – २३,२३०
२.मेकॅनिकल इंजिनिअरिंग – १६,९१८
३.इलेक्ट्रॉनिक्स अँड टेलिकम्युनिकेशन इंजिनियरिंग – १५,९७१
४.कॉम्प्युटर सायन्स अँड इंजिनियरिंग – १५,७८७
५.इन्फॉर्मेशन टेक्नॉलॉजी – १२,४९४
६. सिव्हील इंजिनियरिंग – १२,०९५
७.इलेक्ट्रिकल इंजिनियरिंग – १०,१९२
८.आर्टिफिशियल इंटेलिजन्स अँड डाटा सायन्स – ८,८१६
९. कॉम्प्युटर सायन्स अँड इंजिनियरिंग (आर्टिफिशियल इंटेलिजन्स अँड मशीन लर्निंग ) – ५,४८०
१०. आर्टिफिशियल इंटेलिजन्स अँड मशीन लर्निंग – ३,९३६
१.सावित्रीबाई फुले पुणे विद्यापीठ, पुणे – ५३,९७३
२. डॉ. बाबासाहेब आंबेडकर तंत्रज्ञान विद्यापीठ, लोणेरे – ३०,९०९
३. मुंबई विद्यापीठ, मुंबई – २५,३५८
४. राष्ट्रसंत तुकडोजी महाराज नागपूर विद्यापीठ, नागपूर – १४,०२४
५.शिवाजी विद्यापीठ, कोल्हापूर – ८,४१६
