फोटो सौजन्य - Social Media
राज्यातील विद्यार्थ्यांसाठी महत्त्वाची बातमी समोर आली आहे. राज्य सामाईक प्रवेश परीक्षा कक्ष मार्फत शैक्षणिक वर्ष २०२६-२७ साठी विविध पदवीपूर्व आणि पदव्युत्तर १७ व्यावसायिक अभ्यासक्रमांच्या प्रवेशासाठी सामाईक प्रवेश परीक्षा २४ मार्च २०२६ ते १६ मे २०२६ या कालावधीत आयोजित करण्यात येणार आहेत. यंदाच्या प्रक्रियेत प्रथमच मोठा बदल करण्यात आला असून विद्यार्थ्यांना दोन प्रकारची प्रवेशपत्रे देण्यात येणार आहेत.
सीईटी कक्षाकडून यंदा विद्यार्थ्यांना एक अस्थायी (Provisional) आणि एक अंतिम (Final) असे दोन प्रवेशपत्र दिले जाणार आहेत. हा निर्णय विद्यार्थ्यांना परीक्षा केंद्राबाबत आधीच स्पष्ट माहिती मिळावी आणि नियोजन सोपे व्हावे या उद्देशाने घेण्यात आला आहे. सीईटी कक्षाने अंतिम परीक्षांचे वेळापत्रक अधिकृत संकेतस्थळावर प्रसिद्ध केले असून त्यानुसार पुढील प्रक्रिया राबवली जाणार आहे. प्रवेश परीक्षेच्या ८ ते १० दिवस आधी विद्यार्थ्यांच्या लॉग-इनमध्ये अस्थायी प्रवेशपत्र उपलब्ध होईल. या प्रवेशपत्रामध्ये विद्यार्थ्याला त्याचे परीक्षा केंद्र कोणत्या जिल्ह्यात आणि शहरात आहे याची माहिती मिळणार आहे. परीक्षा केंद्र निवडताना विद्यार्थ्यांना पसंतीक्रमानुसार चार जिल्ह्यांची निवड करावी लागते. त्यानुसार अस्थायी प्रवेशपत्रात संबंधित जिल्हा व शहराची माहिती देण्यात येईल, ज्यामुळे विद्यार्थ्यांना प्रवास आणि राहण्याचे नियोजन करण्यास मदत होईल.
यानंतर, प्रवेश परीक्षेच्या ३ ते ४ दिवस आधी अंतिम प्रवेशपत्र विद्यार्थ्यांच्या लॉग-इनमध्ये उपलब्ध करून दिले जाईल. या अंतिम प्रवेशपत्रात विद्यार्थ्यांच्या प्रत्यक्ष परीक्षा केंद्राची सविस्तर माहिती दिली जाईल. यामध्ये परीक्षा केंद्राचा कोड, केंद्राचे नाव, पूर्ण पत्ता आणि आवश्यक सूचना यांचा समावेश असेल. त्यामुळे विद्यार्थ्यांनी अंतिम प्रवेशपत्र काळजीपूर्वक डाउनलोड करून त्यातील सर्व तपशील तपासणे आवश्यक आहे. सीईटी कक्षाने सर्व विद्यार्थ्यांना आवाहन केले आहे की, त्यांनी त्यांच्या परीक्षा केंद्राशी संबंधित जिल्हा, तालुका आणि इतर तपशीलांची अचूक पडताळणी करावी. कोणतीही चूक आढळल्यास तत्काळ संबंधित अधिकाऱ्यांशी संपर्क साधावा, जेणेकरून परीक्षेच्या दिवशी कोणतीही अडचण निर्माण होणार नाही.
दरम्यान, काही अभ्यासक्रमांच्या प्रवेश परीक्षांसाठी अस्थायी प्रवेशपत्रे आधीच उपलब्ध करण्यात आली आहेत. एमपीएड (MP.Ed) अभ्यासक्रमाची परीक्षा २४ मार्च २०२६ पासून सुरू होत असून यासाठी २,५२५ विद्यार्थ्यांनी अर्ज केले आहेत. तसेच एमएड (M.Ed) अभ्यासक्रमाची परीक्षा २५ मार्च २०२६ पासून सुरू होणार असून यासाठी ३,९८५ विद्यार्थ्यांनी अर्ज केले आहेत. याशिवाय एमएचएमसीटी (MHMCT) अभ्यासक्रमाची परीक्षा देखील २५ मार्चपासून सुरू होत असून यासाठी ५५ विद्यार्थ्यांनी नोंदणी केली आहे. एकूणच, यंदाच्या सीईटी प्रक्रियेत करण्यात आलेला हा बदल विद्यार्थ्यांसाठी फायदेशीर ठरणार आहे. दोन टप्प्यांमध्ये प्रवेशपत्र देण्याच्या निर्णयामुळे परीक्षा केंद्राबाबतची अनिश्चितता कमी होईल आणि विद्यार्थ्यांना वेळेआधी नियोजन करता येईल. त्यामुळे सर्व विद्यार्थ्यांनी वेळेत प्रवेशपत्र डाउनलोड करून परीक्षा तयारीसोबतच प्रवासाचे नियोजनही योग्य पद्धतीने करावे, असे आवाहन करण्यात आले आहे.
