फोटो सौजन्य - Social Media
प्रेरणा सिंग हिची कहाणी ही कोट्यातून झळकलेली एक अशी प्रेरणादायी कथा आहे, जी संकटांवर मात करत स्वप्नांची उंच झेप घेण्याची ताकद दाखवते. एका ऑटो रिक्षा चालकाची कन्या असलेली प्रेरणा, तिच्या वडिलांच्या निधनानंतर केवळ दहावीत होती, तेव्हा तिने आपल्या संपूर्ण कुटुंबाची जबाबदारी खांद्यावर घेतली. वडिलांच्या जाण्याने घरातील आर्थिक आधार गमावलेला असतानाही, तिने हार न मानता चार भावंडांची काळजी घेतली आणि शिक्षण सुरू ठेवले. त्या काळात तिच्या कुटुंबावर तब्बल २७ लाख रुपयांचे कर्ज होते, तरीसुद्धा ती खचली नाही.
कोट्यासारख्या स्पर्धात्मक शहरात राहून NEET परीक्षेची तयारी करणे हे फारच मोठं आव्हान असतं, पण प्रेरणाने मेहनत, चिकाटी आणि आत्मविश्वासाच्या जोरावर ही परीक्षा पहिल्याच प्रयत्नात उत्तीर्ण केली. तिच्या या यशामागे तिच्या मनातील निर्धार आणि कठोर परिश्रम आहेत. NEET ही भारतातील सर्वात कठीण वैद्यकीय प्रवेश परीक्षा मानली जाते, आणि हजारो विद्यार्थ्यांपैकी फारच थोडे जण त्यात यशस्वी होतात. त्यामुळे प्रेरणाचे हे यश तिच्या परिस्थितीच्या पार्श्वभूमीवर अधिकच विशेष ठरते.
ही कहाणी केवळ तिच्या यशाची नसून, ती लाखो गरिब व मध्यमवर्गीय विद्यार्थ्यांना एक नवी आशा आणि प्रेरणा देते. आर्थिक अडचणी, कौटुंबिक जबाबदाऱ्या, आणि सामाजिक मर्यादा असूनही जर एखादी मुलगी आपलं स्वप्न पूर्ण करू शकते, तर इतरांनाही ते नक्कीच शक्य आहे, हे प्रेरणाच्या कथेतून स्पष्ट होते. तिचा संघर्ष, त्यातून मिळवलेलं यश आणि पुढे डॉक्टर होण्याचं स्वप्न ही सर्वच गोष्टी इतरांसाठी मार्गदर्शक आहेत.
प्रेरणा सिंग आज हजारो विद्यार्थ्यांसाठी एक प्रेरणास्त्रोत ठरली आहे. तिची कहाणी प्रत्येकाने ऐकावी आणि शिकावी अशीच आहे, कारण ती सांगते, की कितीही अडचणी असल्या तरी इच्छाशक्ती, मेहनत आणि जिद्द असेल तर यश अटळ आहे.
