neet scam
NEET Paper Leak 2026 : नीट यूजी (NEET-UG) पेपरफुटीचा तपास अजूनही सीबीआयकडून सुरू आहे. दरम्यान एक धक्कादायक खुलासा समोर आला आहे. केंद्रीय अन्वेषण विभागाने (CBI) विशेष न्यायालयात दाखल केलेल्या ९४ पानांच्या दोषरोपपत्रात हा खुलासा झाला आहे. राष्ट्रीय परीक्षा संस्थेच्या तीन विषयतज्ज्ञांनीच ही प्रश्नपत्रिका फोडल्याचा दावा सीबीआयने केला असून हे तिन्ही तज्ज्ञ महाराष्ट्रातील असल्याचे स्पष्ट झाले आहे.
यामध्ये पेपरफुटीचे मुख्य सूत्रधार रसायनशास्त्राचे विषयतज्ज्ञ पी. व्ही कुलकर्णी आहेत तर भौतिकशास्त्र विषयतज्ज्ञ मनीषा हवालदार तसेच वनस्पतीशास्त्र आणि प्राणीशास्त्र मनीषा मांढरे हे आरोपी आहेत.
सुरक्षेतील त्रुटींचा फायदा: NTA च्या गोपनीय विभागात भाषांतर आणि पुनर्भाषांतराच्या कामादरम्यान सुरक्षेतील त्रुटींचा (उदा. स्वतंत्र थेट चित्रण निरीक्षण कक्ष नसणे, झडतीची व्यवस्था नसणे) या तज्ज्ञांनी गैरफायदा घेतला.
चिठ्ठ्यांवर लिहून बाहेर नेले: आरोपी पी. व्ही. कुलकर्णी याने रसायनशास्त्राचे सर्व १३५ प्रश्न आणि उत्तरांचे पर्याय संक्षिप्त स्वरूपात छोट्या चिठ्ठ्यांवर लिहून गोपनीय विभागाबाहेर नेले. काही सोपे प्रश्न त्याने पाठांतर करून हॉटेलमध्ये परतल्यावर लिहून काढले.
पुस्तकांशी सांगड: मनीषा मांढरे यांनी अनुभवाच्या आधारावर प्रश्न आणि NCERT च्या पाठ्यपुस्तकांमधील परिच्छेद यांची सांगड घातली, तर मनीषा हवालदार यांनीही फिजिक्सच्या प्रश्नांची संक्षिप्त नोंद करून ठेवली होती.
या तज्ज्ञांनी फोडलेली प्रश्नपत्रिका पुण्यातील ब्युटिशियन मनीषा वाघमारे हिच्याकडे दिली. तिने व इतर मध्यस्थांच्या साखळीमार्फत ही प्रश्नपत्रिका राजस्थान, हरयाणासह विविध भागांत मोठ्या आर्थिक मोबदल्यात विकली. लातूर येथील कोचिंग सेंटर चालक शिवराज मोटेगावकर याचाही याप्रकरणी आरोपी म्हणून समावेश करण्यात आला आहे.
पुण्यातील आरोपीच्या सोसायटीतील प्रवेश-नियंत्रण ॲप, बायोमेट्रिक नोंदी आणि मोबाईल कॉल डिटेल्सच्या (CDR) आधारे सीबीआयने या संपूर्ण रॅकेटचा पर्दाफाश केला आहे.
.png "Videos"){kind=small}
