NEET PG परीक्षा कधी होणार? सुप्रीम कोर्टाने दिला महत्त्वाचा निर्णय

NEET PG 2024 च्या परीक्षेची तारीख बदलण्याची ही चौथी वेळ होती. आधी 3 मार्च रोजी होणार होते, परंतु नंतर ती 7 जुलैपर्यंत पुढे ढकलण्यात आली आणि नंतर सार्वत्रिक निवडणुकांमुळे ती 23 जूनपर्यंत पुढे ढकलण्यात आली. त्यानंतर आज पुन्हा सुप्रीम कोर्टात या परीक्षेसंदर्भात महत्त्वाचा निर्णय देण्यात आला.

NEET PG 2024 परीक्षा पुढे ढकलण्याची मागणी करणाऱ्या याचिकेवर सुनावणी करताना आज, म्हणजेच 9 ऑगस्ट रोजी सर्वोच्च न्यायालयाने महत्त्वपूर्ण निर्णय दिला आहे. भारताचे मुख्य न्यायमूर्ती डीवाय चंद्रचूड आणि न्यायमूर्ती जेबी परडीवाला आणि मनोज मिश्रा यांच्या खंडपीठाने या प्रकरणाची सुनावणी करताना NEET PG 2024 परीक्षा पुढे ढकलण्यास नकार दिला आहे.

NEET PG 2024 परीक्षा पुढे ढकलण्याची मागणी करणाऱ्या याचिकेत याचिकाकर्त्याच्या वतीने असा युक्तिवाद करण्यात आला. उमेदवारांना अशा शहरांमध्ये परीक्षा केंद्रे देण्यात आली आहेत जिथे त्यांना पोहोचणे कठीण आहे आणि गुण सामान्य करणे आवश्यक आहे. त्यामुळे राष्ट्रीय वैद्यकीय परीक्षा मंडळ (NBEMS) 11 ऑगस्ट रोजी भारतातील 170 शहरांमधील 416 केंद्रांवर दोन शिफ्टमध्ये 2,28,542 उमेदवारांसाठी परीक्षा आयोजित करणार आहे. पुन्हा घेण्यात आलेल्या NEET PG परीक्षेची प्रवेशपत्रे गुरुवारी जाहीर करण्यात आली. NBEMS आणि त्याच्या तांत्रिक भागीदार TCS द्वारे आयोजित NEET-PG ला अनेक वादांना तोंड द्यावे लागले आहे.

NEET PG परीक्षा पुढे ढकलण्याची मागणी का?

NBEMS ने 11 ऑगस्ट रोजी NEET PG परीक्षा 2 शिफ्टमध्ये घेण्याची घोषणा केली आहे. जेव्हा परीक्षा एकापेक्षा जास्त शिफ्टमध्ये घेतली जाते, तेव्हा मूल्यमापनासाठी सामान्यीकरण सूत्र स्वीकारले जाते. दरम्यान बोर्डाने आतापर्यंत जारी केलेल्या कोणत्याही अधिसूचनेत सामान्यीकरण फॉर्म्युलाची माहिती दिलेली नाही. याबाबत उमेदवारांनी सर्वोच्च न्यायालयात धाव घेतली आहे.

या याचिकेत प्रश्न उपस्थित करण्यात आला आहे की, एका बॅचच्या उमेदवारांना दुसऱ्या बॅचच्या तुलनेत अवघड प्रश्नपत्रिका पडण्याची शक्यता आहे आणि परीक्षा घेण्यापूर्वी सामान्यीकरणाचा फॉर्म्युला कळवण्यात यावा, जेणेकरून कोणतीही मनमानी होऊ नये.

याचिकाकर्त्यांना आणि तत्सम अनेक उमेदवारांना अशी शहरे देण्यात आली आहेत, जिथे त्यांना पोहोचण्यात अनेक अडचणींना सामोरे जावे लागू शकते, असे याचिकेत म्हटले आहे.

याचिकेत असेही म्हटले आहे की, NEET PG परीक्षेत दोन लाखांहून अधिक विद्यार्थी बसणार आहेत. ही परीक्षा 185 परीक्षा शहरांमध्ये घेतली जाणार आहे. परीक्षा केंद्रांवर पोहोचण्यासाठी रेल्वे तिकीट उपलब्ध नाही आणि विमान भाडेही खूप जास्त आहे. यामुळे मोठ्या संख्येने विद्यार्थ्यांना त्यांच्या परीक्षा केंद्रापर्यंत पोहोचणे जवळजवळ अशक्य होऊ शकते.