Acid Attack: नाते तुटल्याच्या रागातून माजी मंगेतरचे बिघडले मानसिक संतुलन; दोन सख्या बहिणींवर फेकले ॲसिड आणि…

उत्तर प्रदेशातील हापूड येथे नाते तुटल्याच्या रागातून एका तरुणाने माजी मंगेतर आणि तिच्या बहिणीवर ॲसिड फेकल्याची धक्कादायक घटना घडली आहे. या हल्ल्यात दोन्ही बहिणी गंभीररीत्या भाजल्या असून आरोपीला पोलिसांनी ताब्यात घेतले आहे.

• नाते तुटल्याच्या रागातुन केला ॲसिडने हल्ला
• अमली पदार्थांचे सेवन करत असल्याने तोडले होते नाते
• झोपलेल्या अवस्थेत असलेल्या बहीणींवर फेकले ॲसिड

UP Acid Attack: देशात कायदेशीर कठोरता आणि कडक कायदे असुनही ॲसिड हल्ल्यांच्या घटना थांबताना दिसत नाही आहेत. उत्तर प्रदेशातील हापूड येथील ॲसिड हल्ल्याची धक्कादायक घटना समोर आली आहे. एका तरुणाने नाते तुटल्याच्या रागातून आपला माजी मंगेतर आणि तिची बहीण या दोघींवर ॲसिड हल्ला केल्याने त्या गंभीररीत्या भाजल्या असून त्यांना उपचारासाठी रुग्णालयात दाखल करण्यात आले आहे. ही घटना सिंभावली पोलीस ठाण्याच्या हद्दीत घडली आहे.

मध्यरात्री घरात घुसून केला हल्ला
मिळालेल्या माहितीनुसार, हर्ष नावाचा आरोपी रात्री सुमारे तीन वाजता गावात आला. घरात झोपलेल्या दोन्ही बहिणींवर त्याने ॲसिड फेकले. हल्ल्यानंतर दोन्ही बहिणी गंभीररीत्या भाजल्या आणि घरात आरडाओरड सुरू झाली. कुटुंबीयांनी तत्काळ ११२ क्रमांकावर फोन करून पोलिसांना माहिती दिली.

हेही वाचा: गर्भलिंग निदान प्रकरणात २५ लाखांची डील अन् ५.५ लाख घेताना दोन दलाल ACBच्या जाळ्यात; डॉक्टरने केला पोलिसांचाच गेम

आरोपी पोलिसांच्या ताब्यात

माहिती मिळताच पोलीस घटनास्थळी दाखल झाले आणि आरोपी हर्ष याला ताब्यात घेतले. पोलिसांकडून या प्रकरणाचा तपास सुरू असताना असे समोर आले की, हर्षचे एका युवतीसोबत लग्न ठरले होते. मात्र, तो मोठ्या प्रमाणात अमली पदार्थांचे सेवन करत असल्याची माहिती युवतीच्या कुटुंबीयांना मिळाल्यानंतर त्यांनी हे नाते तोडल्याचे सांगितले जात आहे. याच रागातून हर्षने युवतीच्या घरात जाऊन दोन्ही बहिणींवर ॲसिड फेकल्याचा आरोप आहे. पोलिसांकडून घटनेच्या सर्व बाजूंचा तपास केला जात आहे.

ॲसिड हल्ल्याविरोधात कायदेशीर तरतुदी

भारतीय न्याय संहिता मधील कलम १२४ अंतर्गत ॲसिड हल्ल्याला गंभीर स्वरूपाचा गुन्हा मानण्यात आला आहे. या कलमानुसार दोषीला किमान १० वर्षांच्या कारावासाची शिक्षा होऊ शकते. ही शिक्षा जन्मठेपेपर्यंत वाढवता येते. तसेच पीडित व्यक्तीच्या उपचारांचा खर्च भागविण्यासाठी योग्य दंडाची तरतूद आहे.
ॲसिड हल्ल्याचा प्रयत्न केल्यास पाच ते सात वर्षांपर्यंतच्या कारावासाची शिक्षा होऊ शकते. तसेच सरकारी आणि खासगी रुग्णालयांनी ॲसिड हल्ल्यातील पीडितांना तातडीचे प्राथमिक उपचार मोफत देणे बंधनकारक आहे. उपचार नाकारल्यास संबंधितांविरोधात फौजदारी कारवाईची तरतूद आहे.                                                                                                                                                                              राष्ट्रीय विधी सेवा प्राधिकरणाच्या ‘ॲसिड हल्ल्यातील पीडितांसाठी कायदेशीर सेवा योजना-२०१६’ अंतर्गत ॲसिड हल्ल्यातील पीडित आणि त्यांच्या वारसांना प्राधान्याने कायदेशीर मदत, आधार व सहकार्य दिले जाते.