गुरुवार, 22 ऑक्टोबर 2026
संग्रहित फोटो
पुणे : पुण्यात दिवसेंदिवस गुन्हेगारी वाढत आहे. वाढत्या गुन्हेगारीमुळे नागरिकांमध्ये दहशत निर्माण होत आहे. अशातच आता एक मोठी बातमी समोर आली आहे. श्वानाला घेऊन पहाटे फेरफटका मारण्यास निघालेल्या तरुणावर शस्त्राने वार करण्यात आल्याची घटना वानवडी परिसरात घडली आहे. याप्रकरणी दोघांना अटक करण्यात आली आहे. राहुल बाळकृष्ण गव्हाणे (वय ३६, रा. मारुती एनक्लेव्ह, वानवडी गाव) असे जखमी झालेल्याचे नाव आहे. या प्रकरणी मोहसीन खुदबुद्दीन शेख (वय २५), अनिकेत संजय वाघमारे (वय २०, दोघे रा. बालाजीनगर, धनकवडी) यांना अटक करण्यात आली आहे. याबाबत राहुल यांचा भाऊ निखिल (वय ३८) यांनी वानवडी पोलिस ठाण्यात तक्रार दिली आहे.
पोलिसांच्या माहितीनुसार, राहुल गव्हाणे हे रविवारी (६ सप्टेंबर) पहाटे पाचच्या सुमारास श्वानाला घेऊन फेरफटका मारण्यासाठी निघाले होते. गव्हाणे राहत असलेल्या सोसायटीच्या परिसरात आरोपी शेख, वाघमारे हे थांबले होते. अंधारात दोघे जण थांबल्याने गव्हाणे यांना संशय आला. त्यांनी दोघांना हटकले. तेव्हा आरोपींनी गव्हाणे यांच्यावर हल्ला केला. तीक्ष्ण शस्त्राने त्यांच्यावर चाकूने वार केले, तसेच काचेची बाटली फोडून मानेवर वार केला. आरोपींनी केलेल्या हल्ल्यात गव्हाणे गंभीर जखमी झाले आहेत. गव्हाणे यांनी आरडाओरडा केल्यानंतर पसार होण्याच्या तयारीत असलेल्या दोघांना नागरिकांनी पकडले. दोघांना पोलिसांच्या ताब्यात देण्यात आले. खुनाचा प्रयत्न केल्याप्रकरणी दोघांना अटक करण्यात आली असून, सहायक निरीक्षक जानराव तपास करत आहेत.
अनैतिक संबंधातून वाद, महिलेचा भरदिवसा खून
काखे (ता. पन्हाळा) येथे अनैतिक संबंधांच्या वादातून एका विवाहीत महिलेचा तिच्याच घराच्या अंगणात धारदार चाकूने सपासप वार करून निघृण खून करण्यात आल्याची थरारक घटना बुधवारी दुपारी १ वाजण्याच्या सुमारास घडली आहे. पूजा अविनाश दाभाडे (वय ३३, रा. काखे) असे मृत महिलेचे नाव असून, सुरेश मधुकर दाभाडे (वय ३५) याने हा हल्ला केला आहे. भरदिवसा घडलेल्या या रक्तरंजित प्रकारामुळे काखे परिसरासह संपूर्ण पन्हाळा तालुक्यात प्रचंड खळबळ उडाली आहे. बुधवारी दुपारी पूजा दाभाडे या घरात एकट्याच असताना आरोपी सुरेश दाभाडे तिथे आला. जुन्या अनैतिक संबंधांच्या कारणावरून दोघांमध्ये तीव्र वाद झाला. संतापाच्या भरात सुरेशने सोबत आणलेल्या धारदार चाकूने पूजा यांच्यावर अंगणातच अंधाधुंद वार केले. पूजा यांचा आरडाओरडा ऐकून शेजारी धावून आले असता, आरोपी सुरेश घटनास्थळावरून तातडीने पसार झाला.
