रविवार, 18 ऑक्टोबर 2026
सौजन्य - नवराष्ट्र टीम
सोलापूर : राज्यासह देशभरात गुन्हेगारी वाढली आहे. दररोज वेगवेगळ्या भागातून खून, खुनाचा प्रयत्न, मारहाण यासारख्या घटना घडत आहेत. वाढत्या गुन्हेगारीमुळे नागरिकांमध्ये भिती निर्माण होत आहे. अशातच आता सोलापुरातून एक मोठी बातमी समोर आली आहे. कर्जाच्या प्रचंड आहारी गेल्यामुळे निर्माण झालेल्या आर्थिक विवंचनेतून युट्यूबवर घरफोडीच्या नवनवीन क्लृप्त्या पाहून वृद्धाचा निघृण खून करणाऱ्या आरोपीला अटक केली आहे. सोलापूर ग्रामीणच्या स्थानिक गुन्हे शाखेने कर्नाटकातील कलबुर्गी येथून शिताफीने आरोपीला जेरबंद केले आहे.
अजयकुमार गौतम चव्हाण (वय ३१, मूळ रा. जामगाव, सध्या रा. लऊळ, ता. माढा) असे अटक करण्यात आलेल्या आरोपीचे नाव आहे. जामगाव (ता. माढा) येथे २५ ऑगस्टच्या रात्री घरफोडीच्या उद्देशाने आलेल्या आरोपीने घरमालक अशोक मुळे हे जागे झाल्याने आणि ओळखल्याच्या भितीने त्यांच्या डोक्यात जबर मारहाण करून त्यांचा खून केला. त्यानंतर घरातील कपाट उचकटून २ लाख ४० हजार रुपये किमतीचे सोन्याचे दागिने चोरून नेले होते. याप्रकरणी विजयकुमार मुळे यांनी माढा पोलिस ठाण्यात फिर्याद दिली होती.
गुन्ह्याचे गांभीर्य ओळखून पोलिस अधीक्षकांच्या सूचनेनुसार स्थानिक गुन्हे शाखेचे पोलिस निरीक्षक संजय जगताप यांनी तपासासाठी ४ पोलिस निरीक्षक विजय शिंदे आणि त्यांच्या पथकाने गावात ३ दिवस तळ ठोकून तपास केला. गोपनीय माहितीदार आणि तांत्रिक विश्लेषणाच्या आधारे आरोपी अजयकुमार चव्हाण याच्यावर संशय बळावला. आरोपी मोबाईल बंद करून कलबुर्गी येथे पसार झाला होता. पोलिस पथकाने तत्काळ कलबुर्गी येथे धाव घेत वाडी रेल्वे स्टेशनच्या प्लॅटफॉर्मवरून आरोपीला वाडी रेल्वे पोलिसांच्या मदतीने ताब्यात घेतले.
महिलेचा भरदिवसा खून
काखे (ता. पन्हाळा) येथे अनैतिक संबंधांच्या वादातून एका विवाहीत महिलेचा तिच्याच घराच्या अंगणात धारदार चाकूने सपासप वार करून निघृण खून करण्यात आल्याची थरारक घटना बुधवारी दुपारी १ वाजण्याच्या सुमारास घडली आहे. पूजा अविनाश दाभाडे (वय ३३, रा. काखे) असे मृत महिलेचे नाव असून, सुरेश मधुकर दाभाडे (वय ३५) याने हा हल्ला केला आहे. भरदिवसा घडलेल्या या रक्तरंजित प्रकारामुळे काखे परिसरासह संपूर्ण पन्हाळा तालुक्यात प्रचंड खळबळ उडाली आहे.
