Crime News: नवी मुंबईतील कामोठे परिसरात संतापजनक घटना; सर्व विद्यार्थी उतरल्यावर चिमुकली बसमध्ये एकटी राहिल्याचा घेतला गैरफायदा

सर्व विद्यार्थ्यांना घरी सोडल्यानंतर स्कूल बसमध्ये एक चिमुकलीच उरली... त्यानंतर घडलेल्या प्रकाराने कुटुंबीयांसह परिसरालाही हादरवून सोडले. घरी पोहोचल्यानंतर चिमुकलीने आजीला सांगितलेली एक गोष्ट ऐकून कुटुंबीयांनी तातडीने पोलिसांकडे धाव घेतली आणि संतापजनक घटना उघडकीस आली.

• सर्व विद्यार्थी बसमधून उतरताच घडले भयानक कृत्य
• बसच्या ड्रायव्हर काकांनी त्रास दिला’ म्हणताच प्रकार उघड
• ३० वर्षीय चालकाने अत्याचार केल्याचे समोर

नवी मुंबई : कामोठे परिसरात तीन वर्षांच्या चिमुकलीवर स्कूल बसमध्ये लैंगिक अत्याचार झाल्याची धक्कादायक घटना समोर आली आहे. सर्व विद्यार्थ्यांना त्यांच्या घरी सोडल्यानंतर चिमुकली बसमध्ये एकटी राहिल्याचा गैरफायदा घेत चालकाने तिच्यावर अत्याचार केल्याचा आरोप आहे. या प्रकरणी पोलिसांनी ३० वर्षीय चालकाला अटक केली असून, पनवेल न्यायालयाने त्याला शनिवारपर्यंत पोलीस कोठडी सुनावली आहे.

बस मध्ये एकटी असल्याचा घेतला फायदा

मिळालेल्या माहितीनुसार, चिमुकली दररोज इतर विद्यार्थ्यांसोबत खासगी स्कूल बसने शाळेत ये-जा करत होती. बुधवारी दुपारी साडेबारा वाजण्याच्या सुमारास चालकाने केजी आणि प्राथमिक वर्गातील विद्यार्थ्यांना त्यांच्या नेहमीच्या ठिकाणी सोडण्यास सुरुवात केली. एक-एक विद्यार्थी बसमधून उतरल्यानंतर अखेर चिमुकली बसमध्ये एकटी राहिली. याच वेळी चालकाने तिच्यावर अत्याचार केल्याचा आरोप आहे.

हेही वाचा: Amravati Crime News: ब्रेकअपचा राग अन् भरदिवसा चाकू हल्ला! अमरावतीतील रवी नगर चौकात तरुणी जखमी; आरोपीचा शोध सुरू

घरी आल्यानंतर प्रकार उघड

घरी परतल्यानंतर चिमुकलीने पोटात दुखत असल्याचे कुटुंबीयांना सांगितले. त्यानंतर तिने आजीला बसचालकाने आपल्याला त्रास दिल्याचे सांगितले. चिमुकलीच्या या सांगण्याने कुटुंबीयांना धक्का बसला. त्यांनी तातडीने शाळा प्रशासनाशी संपर्क साधून पोलिसांत तक्रार दाखल केली. पोलिसांनी चिमुकलीची वैद्यकीय तपासणी केली. तपासणीनंतर तिच्यावर लैंगिक अत्याचार झाल्याचे स्पष्ट झाल्याचे पोलिसांनी सांगितले. त्यानंतर आरोपी चालकाविरोधात गुन्हा दाखल करून त्याला अटक करण्यात आली.

हेही वाचा: फलटणमध्ये शोक आणि संताप! मुंबईहून मृतदेह आणताच गर्दी, आरोपींना अटक होत नाही तोपर्यंत अंत्यविधी न करण्याचा निर्णय

पोक्सोअंतर्गत गुन्हा

पोलिसांच्या माहितीनुसार, आरोपीविरोधात भारतीय न्याय संहितेतील (बीएनएस) बालकावरील बलात्काराशी संबंधित कठोर कलमांसह बालकांचे लैंगिक अपराधांपासून संरक्षण कायद्यान्वये (पोक्सो) गुन्हा दाखल करण्यात आला आहे. गुरुवारी आरोपीला पनवेल न्यायालयात हजर करण्यात आले. न्यायालयाने त्याला शनिवारपर्यंत पोलीस कोठडी सुनावली आहे. या प्रकरणाचा तपास सुरू असून, स्कूल बस व्यवस्थापनातील कर्मचारी आणि शाळा प्रशासनाशी संबंधित व्यक्तींचे जबाब नोंदविण्यात येणार आहेत. या घटनेमुळे पालकांमध्ये चिंता आणि संतापाचे वातावरण निर्माण झाले आहे.