करोडपती सासऱ्याच्या हत्येची सूनच मास्टरमाइंड; सहा लाखांची कथित सुपारी, अन् घरात लपून बसलेल्या मारेकऱ्यांचा धक्कादायक प्रकार

सासऱ्याच्या मृत्यूने घरातील दुख:मुळे सूनही ढसाढसा रडली; मात्र तपासाची दिशा पुढे जाताच पोलिसांनाच धक्का बसला. डुप्लिकेट चावी, घरात लपलेले मारेकरी आणि सहा लाखांची कथित सुपारी यामुळे या हत्येमागे नेमका कोणाचा हात होता, याचे गूढ उलगडू लागले. आणि त्याचे सत्य समोर येताच...

• सासऱ्याच्या हत्येसाठी सहा लाख रुपयांची सुपारी ठरल्याचा दावा
• डुप्लिकेट चावीने मारेकऱ्यांनी घरात केली एंट्री
• घरात घुसलेले मारेकरी  तब्बल ७२ ते ७५ मिनिटे होते प्रतिक्षेत

कानपूर: सासऱ्याच्या मृत्यूची बातमी समजल्यानंतर ढसाढसा रडणाऱ्या सूनेवरच त्यांच्या हत्येचा कट रचल्याचा आरोप झाल्याने कानपूरमधील एका मोठ्या  व्यावसायिक विनीत मिनोचा हत्या प्रकरणाला वेगळे वळण मिळाले आहे. पोलिस तपासानुसार, कुटुंबातील संपत्ती आणि पैशांच्या कथित वादातून ही हत्या घडवून आणण्यात आल्याचा संशय आहे. या प्रकरणात सून शालू हिच्यासह माजी नोकर विशाल आणि त्याचा साथीदार राजकिशोर पोलिसांच्या तपासाच्या केंद्रस्थानी आहेत.

पार्टीला गेल्यानंतर मारेकरी घरात शिरले

पोलिसांच्या माहितीनुसार, शनिवारी रात्री सुमारे ९.३६ वाजता विनीत यांचा मुलगा सुब्रत, पत्नी शालू आणि त्यांचा सहा वर्षांचा मुलगा पार्टीसाठी घराबाहेर पडले. त्यानंतर सुमारे दहा मिनिटांनी दोन जण फ्लॅटमध्ये दाखल झाले. दोघेही घरात लपून विनीत यांच्या परतण्याची वाट पाहत होते. पोलिसांच्या म्हणण्यानुसार, आरोपी तब्बल ७२ ते ७५ मिनिटे फ्लॅटमध्ये लपून बसले होते. रात्री सुमारे १०.५८ वाजता विनीत घरी परतल्यानंतर हल्लेखोरांनी कथितपणे त्यांच्या हालचालींवर लक्ष ठेवून हल्ल्याची संधी साधली.

डुप्लिकेट चावीने घरात प्रवेश

या प्रकरणात मृत विनीत यांचा माजी नोकर विशाल याचे नाव समोर आले आहे. पोलिसांच्या तपासानुसार, विशालकडे फ्लॅटची डुप्लिकेट चावी होती. त्याने साथीदार राजकिशोरच्या मदतीने घरात प्रवेश केल्याचा आरोप आहे. सुमारे सहा वर्षांपूर्वी चोरीच्या आरोपावरून विशालला नोकरीतून काढण्यात आले होते. मात्र, त्याचा कुटुंबाशी संपर्क कायम असल्याचे तपासात समोर आल्याचे पोलिसांचे म्हणणे आहे.

आधी नैसर्गिक मृत्यू दाखवण्याचा कट

पोलिसांच्या दाव्यानुसार, सुरुवातीला विनीत यांची हत्या झोपेतच उशीने तोंड दाबून करण्याचा कट आखण्यात आला होता. त्यामुळे मृत्यू नैसर्गिक किंवा हृदयविकाराच्या झटक्यामुळे झाल्याचे भासवण्याचा प्रयत्न असल्याचा संशय आहे. मात्र, त्या रात्री विनीत अचानक मुलांच्या खोलीच्या दिशेने गेल्याने तेथे लपलेल्या आरोपींसमोर आले. त्यानंतर त्यांच्यावर धारदार शस्त्राने हल्ला करण्यात आल्याचे पोलिस तपासात समोर आले आहे. विनीत यांच्या गळ्यावर, छातीवर आणि शरीराच्या इतर भागांवर गंभीर जखमा आढळल्या. हत्येनंतर आरोपींनी कपडे बदलले आणि तेथून पसार झाल्याचे पोलिसांचे म्हणणे आहे.

लूट नव्हे, संपत्तीच्या वादातून हत्या

घटनास्थळावरून मोठ्या प्रमाणात रोकड किंवा मौल्यवान वस्तू गायब झाल्या नसल्याने पोलिसांनी लुटीच्या शक्यतेवर प्रश्नचिन्ह उपस्थित केले. त्यानंतर तपासाची दिशा कुटुंबातील आर्थिक वाद आणि संपत्तीच्या कथित वादाकडे वळली. कोट्यवधींच्या संपत्तीवरून निर्माण झालेल्या नाराजीमुळे हत्या घडवून आणल्याचा पोलिसांचा संशय आहे.

सहा लाखांची कथित सुपारी

पोलिस तपासानुसार, विनीत यांच्या हत्येसाठी कथितपणे सहा लाख रुपयांची सुपारी ठरवण्यात आली होती. त्यापैकी दोन लाख रुपये हत्या झाल्यानंतर, तर उर्वरित चार लाख रुपये सुमारे १५ दिवसांनी देण्याचे ठरल्याचा आरोप आहे. त्यामुळे ही हत्या पूर्वनियोजित असल्याचा पोलिसांचा दावा आहे.

रडणाऱ्या सूनेवरच संशय गेला कसा ?

हत्येनंतर शालू हिला सासऱ्याच्या मृत्यूमुळे रडताना पाहण्यात आले. मात्र, पोलिसांनी सीसीटीव्ही फुटेज, संशयितांचे जबाब, मोबाईल संपर्क, सुरक्षा रक्षकांकडून मिळालेली माहिती आणि फ्लॅटमध्ये झालेल्या प्रवेशाचे पुरावे यांची सांगड घालत तपास केला. या तपासातून शालूची कथित भूमिका समोर आल्याचा पोलिसांचा दावा आहे. त्यानंतर तिला अटक करून न्यायालयीन कोठडीत पाठवण्यात आले.  या प्रकरणात शालूवर हत्येचा कट रचल्याचा, तर माजी नोकर विशाल आणि राजकिशोर यांच्यावर प्रत्यक्ष हत्या केल्याचा आरोप आहे. मात्र, पोलिसांनी केलेले हे आरोप असून या प्रकरणातील दोष सिद्ध होणे न्यायालयीन प्रक्रियेच्या अधीन आहे.