रुग्णाच्या नातेवाईकांकडून डॉक्टरला मारहाण; कॉलर पकडली, ढकलून ठोसाही लगावला

सर्जरी विभागात रुग्णाला उपचारासाठी आणले होते. त्याचवेळी दुसरा गंभीर रुग्ण उपचारासाठी दाखल झाला. प्रकृतीचे गांभीर्य लक्षात घेऊन निवासी डॉक्टर डॉ. समीर चांदेकर यांनी प्रथम गंभीर रुग्णाची तपासणी सुरू केली.

• नागपूरच्या मेयो रुग्णालयात डॉक्टरला मारहाण.
• निवासी डॉक्टर डॉ. समीर चांदेकर यांना नातेवाईकांकडून मारहाण.
• सर्जरी विभागात बुधवारी दुपारी घडली घटना.

नागपूर : रुग्णांवर उपचार करणाऱ्या डॉक्टरला मेयो रुग्णालयात मारहाण करण्यात आली. सर्जरी विभागात एका गंभीर रुग्णाला प्राधान्याने तपासल्याचा राग आल्याने नातेवाईकांनी निवासी डॉक्टर समीर चांदेकर यांना मारहाण केली. त्यांची कॉलर पकडून खाटेवर ढकलले. एवढ्यावरच न थांबता ठोसेही लगावले. या घटनेमुळे रुग्णालय परिसरात काही काळ तणावाचे वातावरण निर्माण झाले.

मिळालेल्या माहितीनुसार, बुधवारी दुपारी सर्जरी विभागात रुग्णाला उपचारासाठी आणले होते. त्याचवेळी दुसरा गंभीर रुग्ण उपचारासाठी दाखल झाला. प्रकृतीचे गांभीर्य लक्षात घेऊन निवासी डॉक्टर डॉ. समीर चांदेकर यांनी प्रथम गंभीर रुग्णाची तपासणी सुरू केली. मात्र, आमच्या रुग्णाला आधी तपासा, त्यानंतर दुसऱ्या रुग्णाकडे लक्ष द्या, असा आग्रह नातेवाईकांनी धरला. यावरून डॉक्टर आणि नातेवाईकांमध्ये वाद सुरू झाला. वादाचे रूपांतर काही क्षणांतच हिंसक प्रकारात झाले. संतप्त नातेवाईकांनी डॉक्टरांना शिवीगाळ करत अंगावर धाव घेतली. कॉलर पकडून ओढले व खाटेवर ढकलले. त्यानंतर ठोसाही लगावला. घटनेची माहिती मिळताच रुग्णालयातील सुरक्षा कर्मचाऱ्यांनी मध्यस्थी करून परिस्थिती नियंत्रणात आणली.

मारहाण करणारे रुग्णाचे नातेवाईक पोलिस असल्याची माहिती पुढे आली. मेयोचे अधिष्ठाता डॉ. अविनाश गावंडे यांनी या घटनेची तत्काळ दखल घेतली. वैद्यकीय अधीक्षक डॉ. नितीन शेंडे यांनी तहसील पोलिस ठाण्यात रीतसर तक्रार दाखल केली. मार्डतर्फे मारहाण करणाऱ्यांवर कडक कारवाईची मागणी केली.

डॉक्टर असुरक्षितच

रुग्णालयात डॉक्टरांना मारहाण होऊ नये, त्यांना सुरक्षित वातावरण मिळावे यासाठी शासनाने महाराष्ट्र सुरक्षा दलाचे जवान तैनात केले. कोट्यवधीचा खर्च करूनही गंभीर आणि अत्यवस्थ रुग्णांना त्यांच्या प्रकृतीनुसार प्राधान्याने उपचार देताना नातेवाईकांकडून मारहाण होते, ही गंभीर बाब आहे. मेयोत डॉक्टरला झालेल्या मारहाणीचा प्रकार निवासी डॉक्टरांच्या सुरक्षिततेचा प्रश्न पुन्हा एकदा ऐरणीवर आला आहे.

FAQ

१. डॉक्टरला मारहाणीची घटना कुठे घडली?

नागपूर येथील मेयो रुग्णालयात ही घटना घडली.

२. मारहाण झालेल्या डॉक्टरांचे नाव काय आहे?

निवासी डॉक्टर डॉ. समीर चांदेकर यांना मारहाण करण्यात आली.

३. डॉक्टरांना मारहाण का करण्यात आली?

दुसऱ्या गंभीर रुग्णाला प्राधान्याने तपासल्याचा राग आल्याने नातेवाईकांनी डॉक्टरांशी वाद घातला.