मित्राला ज्यादा नफ्याचे आमिष दाखवून एकाने गंडवलं; खोटा चेक दिला अन्…

काही दिवसांनी अमोलने व्यवयासात तोटा झाल्याचे सांगत मोठी ऑर्डर मिळाल्यानंतर तुमचे पैसे परत करतो असे सांगितले. सुरजने त्याला वारंवार उर्वरित रक्कम मागितल्यानंतर अमोलने टाळाटाळ केली.

छत्रपती संभाजीनगर : आधुनिक मशिनरीच्या व्यवयासात गुंतवणूक केल्यास आकर्षक नफ्याचे आमिष दाखवत तरुणाची पाच लाख २४ हजारांची फसवणूक करण्यात आली. एप्रिल २०२४ ते मे २०२४ या कालावधीत हा प्रकार रमानगर, गल्ली क्रमांक २ येथे घडला. याप्रकरणी संशयित आरोपीविरुध्द उस्मानपुरा पोलिस ठाण्यात फसवणूकीचा गुन्हा दाखल करण्यात आला आहे.

सुरज कडुबा गायकवाड (वय २९, रा. रमानगर, गल्ली क्रमांक २) यांनी तक्रार दाखल केली. यामध्ये सुरजची ओळख २०२३ मध्ये अमोल भास्कर कांबळे (रा. वाळूज महानगर २, गुरुदक्षिणा अपार्टमेंट) याच्यासोबत झाली होती. या काळात सुरजने त्याच्या प्रिंटीग प्रेसच्या व्यवसायासाठी एसबीआय बँकेतून साडेआठ लाखांचे कर्ज घेतले होते. अमोल कांबळे सोबत चांगली मैत्री झाल्याने अमोलने सुरजला नफ्याचे आमिष दाखवले. अमोलवर विश्वास असल्याने सुरजने त्याच्या कर्जाची रक्कम ९ लाख ५८ हजार ऑनलाईन आणि रोख १ लाख १५ हजार रुपये अमोलला दिले होते. यानंतर अमोलने सुरजला व्यवसायामधून नफ्याच्या रकमेपैकी ५ लाख ४९ हजार रुपये ऑनलाईन परत केले होते.

यानंतर काही दिवसांनी अमोलने व्यवयासात तोटा झाल्याचे सांगत मोठी ऑर्डर मिळाल्यानंतर तुमचे पैसे परत करतो असे सांगितले. सुरजने त्याला वारंवार उर्वरित रक्कम मागितल्यानंतर अमोलने टाळाटाळ केली. तसेच त्याचा एक प्लॉट सुरजकडे तारण ठेवत महाराष्ट्र बँकेचे दोन धनादेश दिले. सुरजने हे धनादेश बँकेत टाकले असता अमोलच्या खात्यात रक्कम नसल्याने ते बाऊन्स झाले.

फसवणूक झाल्याचे लक्षात येताच पोलिसांत धाव

नंतर अमोलशी संपर्क साधला असता तो दिलेल्या पत्त्यावर राहत नसून त्याचा मोबाईल देखील बंद करण्यात आला होता. आपली फसवणूक झाल्याचे लक्षात आल्यानंतर सुरजने पोलिस ठाण्यात धाव घेतली. याप्रकरणी अमोल कांबळे विरुद्ध गुन्हा दाखल करण्यात आला आहे. पुढील तपास पोलिसांकडून केला जात आहे.