Mumbai Fire News: मुंबईत रुग्णालयाच्या टेरेसवर गॅसचा भडका; अचानक लागलेल्या आगीत २ कर्मचारी गंभीर भाजले

रुग्णालयाच्या टेरेसवर चहा बनवण्यासाठी गॅस पेटवण्यात आला आणि काही क्षणांतच मोठा भडका उडाला. या दुर्घटनेत दोन कर्मचारी गंभीर भाजले असून, गॅस गळती नेमकी कशी झाली याचा तपास सुरू आहे.

• गॅस पेटवताच मोठा भडका
• दोन कर्मचारी गंभीर भाजले
• रुग्णालयाच्या सुरक्षेवर प्रश्नचिन्ह

मुंबई: जोगेश्वरी (पश्चिम) येथील मल्लिका रुग्णालयाच्या टेरेसवर गॅस सिलिंडर पेट घेतल्याने आग लागल्याची घटना घडली. या दुर्घटनेत दोन कर्मचारी गंभीररित्या भाजले असून, त्यांच्यावर उपचार सुरू आहेत. गॅस गळतीमुळे हा प्रकार घडल्याचा प्राथमिक अंदाज व्यक्त करण्यात येत आहे. मात्र आगीचे नेमके कारण आणि त्यानंतर झालेल्या भडक्याबाबत अधिकृत निष्कर्ष अद्याप समोर आलेला नाही. मिळालेल्या माहितीनुसार, रुग्णालयाच्या टेरेसवर गॅस सिलिंडर ठेवण्यात आला होता. घटनेच्या वेळी काही कर्मचारी टेरेसवर उपस्थित होते. त्यापैकी एका कर्मचाऱ्याला चहा बनवण्यास सांगण्यात आले. त्याने चहा बनवण्यासाठी गॅस पेटवण्याचा प्रयत्न करताच अचानक मोठा भडका उडाला. या घटनेत दोन कर्मचारी गंभीर भाजले. घटनेची माहिती मिळताच रुग्णालय प्रशासनाने जखमी कर्मचाऱ्यांना तातडीने उपचारासाठी रुग्णालयात दाखल केले. मात्र भाजण्याचे प्रमाण गंभीर असल्याने त्यांना पुढील उपचारांसाठी दुसऱ्या रुग्णालयात हलवण्यात आले. सध्या दोन्ही कर्मचाऱ्यांवर उपचार सुरू असून त्यांची प्रकृती गंभीर असल्याचे सांगण्यात येत आहे.

हेही वाचा:Crime News: गडचिरोलीच्या आरोग्य व्यवस्थेला धक्का; कर्तव्यात निष्काळजीपणाच्या ठपक्यावर जिल्हा शल्यचिकित्सक डॉ. वर्षा लहाडे निलंबित

पोलिसांकडून घटनास्थळाची पाहणी

घटनेची माहिती मिळाल्यानंतर पोलिसांनी घटनास्थळी पाहणी केली. घटनेच्या वेळी टेरेसवर उपस्थित असलेल्या कर्मचाऱ्यांकडून तसेच जखमींच्या नातेवाइकांकडून माहिती घेण्यात आली आहे. नातेवाइकांचे जबाब पोलिसांनी नोंदवले आहेत. मात्र रुग्णालय प्रशासनाविरोधात नातेवाइकांकडून अद्याप कोणतीही तक्रार करण्यात आलेली नसल्याचे पोलिसांनी स्पष्ट केले. दरम्यान, गॅस सिलिंडरची गळती नेमकी कशी झाली, सिलिंडर टेरेसवर ठेवण्यासंदर्भात आवश्यक सुरक्षा नियमांचे पालन झाले होते का आणि आग लागण्यामागे अन्य कोणते कारण होते का, याचा तपास केला जात आहे.

हेही वाचा:Pune Fraud Case: वारजेत बोगस डॉक्टरचा पर्दाफाश, ॲलोपॅथी औषधांचा साठा जप्त; महापालिकेचा क्लिनिकवर छापा

अग्निसुरक्षेवर प्रश्नचिन्ह

रुग्णालयासारख्या संवेदनशील ठिकाणी गॅस सिलिंडरची साठवणूक आणि अग्निसुरक्षा व्यवस्था याबाबत या घटनेनंतर प्रश्न उपस्थित झाले आहेत. रुग्णालय प्रशासनाकडून अग्निसुरक्षेच्या नियमांचे पालन करण्यात आले होते का, याची तपासणी होण्याची शक्यता आहे. पोलिसांनी अद्याप या प्रकरणी गुन्हा दाखल केलेला नाही. मात्र तपासात नियमांचे उल्लंघन किंवा निष्काळजीपणा आढळल्यास संबंधितांवर कारवाई करण्यात येणार असल्याचे पोलिसांकडून सांगण्यात आले आहे. घटनेनंतर मुंबई महापालिका आणि अग्निशमन दलाकडून रुग्णालयाच्या सुरक्षा व्यवस्थेची तपासणी करण्याची मागणी नागरिकांकडून होत आहे. आगीत नेमके किती नुकसान झाले आणि गॅस गळतीचे मूळ कारण काय होते, हे पुढील तपासानंतर स्पष्ट होणार आहे.