रविवार, 1 नोव्हेंबर 2026
सौजन्य फोटो - सोशल मिडीया
क्लिनिकमध्ये बेकायदेशीर वैद्यकीय व्यवसाय सुरू असल्याचा संशय आल्यानंतर महापालिकेचे क्षेत्रीय वैद्यकीय अधिकारी गणेश ढमाले यांच्या नेतृत्वाखाली पथकाने अचानक पाहणी केली. या पाहणीदरम्यान क्लिनिकमध्ये विविध वैद्यकीय साहित्य आणि औषधांचा साठा आढळून आला. पथकाने क्लिनिकची झडती घेतली असता सलाईन, इंजेक्शन्स तसेच ॲलोपॅथी औषधांचा साठा आढळल्याची माहिती महापालिकेच्या आरोग्य विभागाने दिली. संबंधित व्यक्तीकडे ॲलोपॅथी उपचार करण्यासाठी आवश्यक वैद्यकीय पात्रता नसल्याचे तपासात आढळल्यानंतर महापालिकेने पोलिसांकडे तक्रार दाखल केली. याप्रकरणी वारजे माळवाडी पोलिस ठाण्यात संबंधित कायद्यांनुसार गुन्हा दाखल करण्यात आला आहे. पोलिस उपनिरीक्षक शंकर पाटील या प्रकरणाचा पुढील तपास करीत आहेत.
दरम्यान, महापालिकेच्या आरोग्य विभागाने यापूर्वी खराडी परिसरातही अशाच प्रकारची कारवाई केली होती. बीएएमएसची पदवी पूर्ण झालेली नसतानाही एका तरुणाने नावापुढे ‘डॉक्टर’ अशी उपाधी लावून क्लिनिकमध्ये रुग्णांवर उपचार केल्याचा प्रकार त्यावेळी समोर आला होता. तपासात संबंधित तरुणाने दुसऱ्या व्यक्तीचा वैद्यकीय नोंदणी क्रमांक वापरल्याचेही समोर आल्याची माहिती महापालिकेने दिली होती. तसेच तो एका रुग्णालयातही प्रॅक्टिस करीत असल्याचे आढळून आले होते. शहरात वैद्यकीय पात्रता नसलेल्या व्यक्तींकडून उपचार केले जात असल्यास नागरिकांच्या आरोग्याला धोका निर्माण होऊ शकतो. त्यामुळे अशा प्रकरणांची माहिती मिळाल्यास त्याची पडताळणी करून संबंधितांविरोधात कारवाई करण्याची प्रक्रिया महापालिकेच्या आरोग्य विभागाकडून सुरू ठेवण्यात आली आहे.
