Mumbai Accident Malad: अपघातात महिला वकिलाचा मृत्यू; ७० वर्षीय चालकावर व्हीआयपी ट्रीटमेंट दिल्याचा आरोप,भाजप नगरसेवकाचा हस्तक्षेप

मुंबईतील मालाडमध्ये अनियंत्रित कारच्या धडकेत एका ३४ वर्षीय महिला वकिलाचा मृत्यू झाल्यानंतर प्रकरणाला वेगळे वळण मिळाले आहे. अपघातातील ७० वर्षीय चालकाला १५ हजार रुपयांच्या जातमुचलक्यावर सोडण्यात आल्याने प्रश्न उपस्थित होत असून, भाजप नगरसेवक प्रवीण छेडा यांनी पोलिसांवर व्हीआयपी ट्रीटमेंट दिल्याचा आरोप केला आहे.

• मालाडमध्ये अनियंत्रित कारची स्कूटीसह तीन रिक्षांना धडक
• आरोपी ७० वर्षीय कारचालकाला व्हीआयपी ट्रीटमेंट मिळत असल्याचा आरोप
• भाजप नगरसेवक प्रवीण छेडा यांची पोलीस आयुक्तांकडे कठोर कारवाईची मागणी

Mumbai Accident: मुंबईतील मालाड पश्चिम परिसरात सिग्नलवर थांबलेल्या वाहनांना अनियंत्रित कारने धडक दिल्याने झालेल्या भीषण अपघातात ३४ वर्षीय महिला वकिलाचा मृत्यू झाला. या प्रकरणातील ७० वर्षीय कारचालकाला अटक केल्यानंतर न्यायालयात हजर करण्यात आले. मात्र, त्याला १५ हजार रुपयांच्या जातमुचलक्यावर सोडण्यात आल्याने या निर्णयावर प्रश्न उपस्थित केले जात आहेत. दरम्यान, या प्रकरणात भाजपचे नगरसेवक प्रवीण छेडा यांनी हस्तक्षेप करत मुंबई पोलिसांवर गंभीर आरोप केले आहेत.

धडकेत महिलेचा जागीच मृत्यू
मालाड पश्चिमेकडील एस. व्ही. रोड आणि मामलेदारवाडी जंक्शन येथे रविवारी हा अपघात झाला. सिग्नलवर थांबलेल्या स्कूटीसह तीन ऑटो रिक्षांना भरधाव आणि अनियंत्रित कारने धडक दिली. या अपघातात स्कूटीवर मागे बसलेल्या ३४ वर्षीय महिला वकील प्रियंका मयांक सत्रा यांचा जागीच मृत्यू झाला. त्यांचे पती मयांक सत्रा यांच्यासह तीन रिक्षाचालक आणि इतर जण गंभीर जखमी झाले.

हेही वाचा: Beed Crime News: गायी-म्हशी खरेदीसाठी १० लाखांची मागणी; हुंड्याच्या छळाला कंटाळून बीडमधील २५ वर्षीय विवाहितेचा मृत्यू

आरोपीची जातमुचलक्यावर सुटका
या घटनेनंतर पोलिसांनी कारचालक कृष्णा चमणकर याला अटक केली. त्याला न्यायालयात हजर केल्यानंतर १५ हजार रुपयांच्या जातमुचलक्यावर मुक्त करण्यात आल्याची माहिती आहे. या निर्णयामुळे मृत महिलेच्या कुटुंबीयांसह नागरिकांमध्ये नाराजी व्यक्त होत आहे.

मुंबई पोलीस आयुक्तांना पत्र
भाजपचे नगरसेवक प्रवीण छेडा यांनी या प्रकरणात पोलिसांकडून आरोपीला विशेष वागणूक देण्यात आल्याचा आरोप केला आहे. मयत प्रियंका सत्रा या प्रवीण छेडा यांच्या नातेवाईक आहेत. या प्रकरणात अपघाताच्या स्वरूपाचा तपास करण्याबरोबरच, परिस्थितीनुसार कठोर कलमांतर्गत गुन्हा दाखल करावा आणि आरोपीला मदत करणाऱ्यांचीही चौकशी करावी, अशी मागणी त्यांनी केली आहे.
याबाबत प्रवीण छेडा यांनी मुंबई पोलीस आयुक्तांना पत्र दिले असून, ते पोलीस आयुक्त देवेन भारती यांची भेट घेणार असल्याचे सांगण्यात आले आहे. पोलिसांनी या प्रकरणाचा निष्पक्ष तपास करून दोषींवर कठोर कारवाई करावी, अशी मागणी त्यांनी केली आहे.

हेही वाचा: Navi Mumbai Crime: ५० रुपयांसाठी वाद विकोपाला; १८ वर्षीय रिक्षाचालकावर केला धारदार शस्त्राने वार, दोन तरुन अटक

व्हीलचेअरवरून दिला अखेरचा निरोप
या अपघातामुळे सत्रा कुटुंबावर मोठे संकट कोसळले आहे. प्रियंका यांच्या पश्चात आठ वर्षांची मुलगी आणि चार वर्षांचा मुलगा आहे. आईच्या अचानक झालेल्या मृत्यूने दोन्ही मुलांना मोठा धक्का बसला आहे. अपघातात प्रियंका यांचे पती मयांक सत्रा हेही गंभीर जखमी झाले आहेत. त्यांच्यावर रुग्णालयात उपचार सुरू असतानाही पत्नीला अखेरचे पाहता यावे, यासाठी ते अंत्यसंस्काराच्या वेळी व्हीलचेअरवरून स्मशानभूमीत पोहोचले. गंभीर अवस्थेतील पतीने पत्नीला दिलेला हा अखेरचा निरोप उपस्थितांना भावूक करून गेला. दरम्यान, या प्रकरणात पोलिसांकडून नेमकी कोणती कलमे लावण्यात आली, चालकाला जामीन कोणत्या आधारावर मिळाला आणि अपघातामागील काय परिस्थिती होती, याबाबत पुढील तपासानंतर अधिक स्पष्टता येणार आहे.