Accident News: भरधाव कारला डंपरची भीषण धडक; मध्यरात्रीच्या अपघातात चौघांचा मृत्यू, तिघे गंभीर जखमी
मुजफ्फरनगर: उत्तर प्रदेशातील मुजफ्फरनगर जिल्ह्यात पुरकाजी पोलीस ठाण्याच्या हद्दीत सोमवारी रात्री भरधाव कारला समोरून येणाऱ्या डंपरने जोरदार धडक दिल्याने भीषण अपघात झाला. लक्सर रस्त्यावर झालेल्या या दुर्घटनेत कारमधील चार प्रवाशांचा मृत्यू झाला असून, तिघे जण गंभीर जखमी झाले आहेत. धडकेनंतर कारचा अक्षरशः चक्काचूर झाला. अपघातानंतर घटनास्थळी एकच गोंधळ उडाला.
मिळालेल्या माहितीनुसार, सोमवारी रात्री सुमारे १०.१५ वाजण्याच्या सुमारास ही दुर्घटना घडली. कारमध्ये एकूण सात प्रवासी होते. लक्सर रस्त्यावर समोरून येणाऱ्या डंपरने कारला जोरदार धडक दिली. धडकेची तीव्रता इतकी होती की, कारचा मोठ्या प्रमाणात चुराडा झाला आणि त्यातील प्रवासी वाहनात अडकले.
अपघातात कारचालक आदेश कुमार आणि निशा यांचा जागीच मृत्यू झाला. दुर्घटनेची माहिती मिळताच स्थानिक पोलीस तातडीने घटनास्थळी दाखल झाले. कारमध्ये अडकलेल्या प्रवाशांना बाहेर काढण्यासाठी पोलिसांनी हायड्रा यंत्राची मदत घेतली. बचावकार्य करत सर्व जखमींना तातडीने जवळच्या रुग्णालयात दाखल करण्यात आले.
रुग्णालयात दाखल करण्यात आलेल्या जखमींपैकी आणखी दोघांचा उपचारादरम्यान मृत्यू झाला. त्यामुळे या अपघातातील मृतांची संख्या चारवर पोहोचली आहे. सध्या तिघांवर रुग्णालयात उपचार सुरू असून, त्यांची प्रकृती गंभीर असल्याचे सांगण्यात येत आहे. त्यामुळे मृतांचा आकडा वाढण्याची भीती व्यक्त केली जात आहे.
हेही वाचा: अपघाताच्या पडद्याआड हत्येचा डाव? तेजिंदर मृत्यूप्रकरणात मैत्रिणीला अटक; ‘सुपारी’च्या चर्चेने खळबळ
अपघाताची माहिती मिळताच मुजफ्फरनगरचे वरिष्ठ पोलीस अधीक्षक संजय कुमार वर्मा, एसपी सिटी अमृत जैन, एसपी ट्रॅफिक अतुल कुमार चौबे आणि क्षेत्राधिकारी सुनील कुमार यांनी घटनास्थळी भेट देऊन पाहणी केली. वरिष्ठ अधिकाऱ्यांनी बचावकार्याचा आढावा घेत जखमींना तातडीने वैद्यकीय उपचार मिळावेत, यासाठी संबंधितांना सूचना दिल्या.
या प्रकरणी पोलिसांनी अपघातग्रस्त डंपर जप्त केला असून, त्याच्या चालकाला ताब्यात घेतले आहे. अपघात नेमका कशामुळे झाला, वाहनांचा वेग किती होता आणि चालकाची चूक होती का, याबाबत पोलीस पुढील तपास करीत आहेत. या भीषण अपघातामुळे मृतांच्या कुटुंबीयांवर दुःखाचा डोंगर कोसळला असून, परिसरात हळहळ व्यक्त होत आहे.
.png "Videos"){kind=small}
