एका धाडसी तरुणीने पोलीस आयुक्तांकडे कैफियत मांडल्यानंतर या गुन्ह्याचे गांभीर्य समोर आले. त्यानंतर वरिष्ठ महिला पोलीस अधिकाऱ्यांच्या मार्गदर्शनाखाली ७ महिला पोलिसांची विशेष टीम तयार करण्यात आली. या महिला पोलिसांनी स्वतःची खरी ओळख लपवून सामान्य उमेदवार म्हणून कंपनीत मुलाखत दिली. सलग आठ दिवस या महिला पोलिसांनी तिथे कर्मचारी म्हणून काम केले. मीटिंगमध्ये मुलींवर कसा दबाव टाकला जातो, त्यांचे मानसिक शोषण कसे केले जाते आणि धर्मांतरासाठी कशा प्रकारे प्रवृत्त केले जाते, याचे सर्व तांत्रिक पुरावे पोलिसांनी या काळात जमा केले.
पुराव्यांची साखळी पूर्ण होताच पोलिसांनी कंपनीवर छापा टाकला. या प्रकरणी आतापर्यंत धक्कादायक माहिती समोर आली आहे. एकूण ९ गुन्हे दाखल झाले असून यात ८ महिलांनी शोषण व धर्मांतराची, तर एका पुरुषाने धर्मांतरासाठी छळ केल्याची तक्रार दिली आहे. तक्रारदारांमध्ये ६ अविवाहित तरुणी आणि २ विवाहित महिलांचा समावेश आहे. पीडित तरुणींनी या त्रासाबाबत कंपनीच्या HR विभागाला वारंवार माहिती दिली होती, मात्र त्याकडे जाणीवपूर्वक दुर्लक्ष करण्यात आले.
नाशिक पोलिसांनी ज्या तत्परतेने ‘अंडरकव्हर ऑपरेशन’ राबवून हा प्रकार उघडकीस आणला, त्यामुळे एका मोठ्या संघटित गुन्हेगारी रॅकेटचा उलगडा होण्याची शक्यता आहे. पण त्याचवेळी नोकरीच्या नावाखाली महाराष्ट्रातील इतर शहरांतही अशाच प्रकारे तरुणींना जाळ्यात ओढले जात आहे का? असाही प्रश्न आता उपस्थित होऊ लागला आहे. तरुणींच्या लैंगिक शोषण आणि धर्मांतर प्रकरणाने आता वेगळे वळण घेतले आहे. या प्रकरणाचे धागेदोरे आंतरराज्यीय स्तरावर असण्याची दाट शक्यता पोलिसांनी वर्तवली असून, जप्त केलेल्या मोबाईल आणि तांत्रिक पुराव्यांतून धक्कादायक माहिती समोर येत आहे.
या तपासाबाबत माहिती देताना सहाय्यक पोलीस आयुक्त संदीप मिटके यांनी सांगितले की, “हा प्रकार अत्यंत गंभीर स्वरूपाचा आहे. पोलिसांनी विशेष पथकामार्फत सर्व आवश्यक पुरावे गोळा केले आहेत. आरोपींचे मोबाईल जप्त करण्यात आले असून, त्यातील तांत्रिक विश्लेषण सुरू आहे. प्राथमिक तपासावरून या प्रकरणाची व्याप्ती मोठी असल्याचे दिसत असून, पोलीस सर्व बाजूंनी तपास करत आहेत.”
या प्रकरणात पोलिसांनी मोठी कारवाई करत कंपनीची HR अश्विनी चैनानी हिला पुण्यातून ताब्यात घेतले आहे. तिची सलग ४ तास कसून चौकशी करण्यात आली असून, तिला कायदेशीर नोटीस बजावण्यात आली आहे. या रॅकेटमध्ये कंपनीच्या वरिष्ठ व्यवस्थापनाचा किती सहभाग आहे, याचा तपास आता पोलीस करत आहेत. अटकेत असलेल्या आरोपींपैकी पाच जण सध्या पोलीस कोठडीत आहेत. एक आरोपी न्यायालयीन कोठडीत आहे. या प्रकरणातील एक महिला आरोपी अद्याप फरार असून, पोलीस पथके तिचा कसून शोध घेत आहेत.
.png "Videos"){kind=small}
