Nashik News: नाशिकच्या आश्रमशाळेत आठ वर्षीय मुलीचा मृत्यू; ताप-उलटीनंतर अचानक प्रकृती खालावली

आश्रमशाळेतील विद्यार्थ्यांच्या आरोग्याचा प्रश्न पुन्हा ऐरणीवर आला असतानाच नाशिकमधून धक्कादायक घटना समोर आली आहे. ताप आणि उलटीनंतर आठ वर्षीय विद्यार्थिनीची प्रकृती बिघडली आणि उपचारादरम्यान तिचा मृत्यू झाला; मात्र मृत्यूचे नेमके कारण अद्याप अस्पष्ट आहे.

• दोन दिवस उपचार, अचानक उलटी अन् प्रकृती बिघडली
• अन्नातून विषबाधेचा संशय? शवविच्छेदन अहवालानंतर उलगडा
• नाशिकमध्ये आश्रमशाळेतील विद्यार्थिनीचा मृत्यू

नाशिक: आश्रमशाळेतील विद्यार्थ्यांना अन्नातून विषबाधा झाल्याच्या घटना अलीकडच्या काळात समोर येत असतानाच नाशिकमध्ये आश्रमशाळेतील आठ वर्षीय विद्यार्थिनीचा मृत्यू झाल्याची धक्कादायक घटना समोर आली आहे. कळवण तालुक्यातील विसरवाडी परिसरातील आश्रमशाळेत ही घटना घडली. सृष्टी ओंकार सूर्यवंशी असे मृत विद्यार्थिनीचे नाव आहे.

मिळालेल्या माहितीनुसार, सृष्टी ही विसापूर येथील आश्रमशाळेत शिक्षण घेत होती. आश्रमशाळेत असतानाच तिला ताप आला. त्यानंतर तिच्यावर उपचार सुरू करण्यात आले. प्रकृतीत सुधारणा झाल्यानंतर तिला पुन्हा आश्रमशाळेत आणण्यात आले. मात्र त्यानंतर अचानक तिला उलटी झाली. ताप आणि उलटीचा त्रास पुन्हा जाणवू लागल्याने सृष्टीला तातडीने उपचारासाठी रुग्णालयात दाखल करण्यात आले. मात्र उपचार सुरू असतानाच तिचा मृत्यू झाला. गेल्या दोन दिवसांपासून तिच्यावर उपचार सुरू असल्याची माहिती समोर आली आहे.

मृत्यूचे कारण अद्याप अस्पष्ट

सृष्टीला ताप आल्यानंतर तिच्यावर तातडीने उपचार सुरू करण्यात आले होते. गेल्या दोन दिवसांपासून तिच्यावर उपचार सुरू असतानाही प्रकृतीत अपेक्षित सुधारणा झाली नाही. उलट उपचारादरम्यान तिची प्रकृती अधिकच खालावत गेल्याचे सांगण्यात येत आहे. आश्रमशाळेत परतल्यानंतर तिला पुन्हा अचानक उलटी झाली आणि त्यानंतर तापाचा त्रासही वाढला. त्यामुळे तिला पुन्हा रुग्णालयात दाखल करण्यात आले. मात्र उपचार सुरू असतानाच तिचा मृत्यू झाला.

सृष्टीच्या अचानक झालेल्या मृत्यूमुळे तिच्या कुटुंबीयांसह परिसरात हळहळ व्यक्त होत आहे. तिच्या मृत्यूचे नेमके कारण काय, याबाबत सध्या कोणतीही अधिकृत माहिती समोर आलेली नाही. विद्यार्थिनीचा मृत्यू आजारपणामुळे झाला की अन्य कोणत्या कारणामुळे, याचा तपास केला जात आहे. दरम्यान, मृत्यूचे नेमके कारण स्पष्ट करण्यासाठी सृष्टीचा मृतदेह शवविच्छेदनासाठी नाशिक येथे पाठवण्यात आला आहे. शवविच्छेदनाचा अहवाल आल्यानंतरच तिच्या मृत्यूमागील नेमके कारण स्पष्ट होण्याची शक्यता आहे.

Crime News: नवी मुंबईतील कामोठे परिसरात संतापजनक घटना; सर्व विद्यार्थी उतरल्यावर चिमुकली बसमध्ये एकटी राहिल्याचा घेतला गैरफायदा

अन्नाच्या गुणवत्तेवर प्रश्नचिन्ह

गेल्या काही दिवसांत राज्यातील विविध आश्रमशाळांमध्ये विद्यार्थ्यांना अन्नातून विषबाधा झाल्याच्या घटना समोर आल्या आहेत. त्यामुळे सृष्टीच्या प्रकृती बिघडण्यामागे अन्नातून विषबाधेचा काही संबंध आहे का, याबाबतही प्रश्न उपस्थित होत आहेत. मात्र, सध्या याबाबत कोणताही ठोस निष्कर्ष काढण्यात आलेला नाही. शवविच्छेदन अहवाल तसेच संबंधित आरोग्य व प्रशासन यंत्रणांच्या तपासातूनच या घटनेमागील वस्तुस्थिती स्पष्ट होणार आहे.

या घटनेनंतर आश्रमशाळेतील विद्यार्थ्यांच्या आरोग्याची काळजी, त्यांना दिले जाणारे अन्न आणि आरोग्यविषयक सुविधांकडे प्रशासनाने गांभीर्याने लक्ष देण्याची गरज व्यक्त होत आहे. सृष्टीच्या मृत्यूचे कारण स्पष्ट झाल्यानंतर त्यानुसार पुढील कारवाई होण्याची शक्यता आहे.