Navi Mumbai Crime: ५० रुपयांसाठी वाद विकोपाला; १८ वर्षीय रिक्षाचालकावर केला धारदार शस्त्राने वार, दोन तरुन अटक
मध्यरात्री रिक्षात बसले दोन प्रवासी
मृत रिक्षाचालकाचे नाव सुजनकुमार फेकू महतो (वय १८, रा. घणसोली) असे आहे. २८ ऑगस्ट रोजी सायंकाळी तो रिक्षा घेऊन प्रवासी वाहतुकीसाठी घराबाहेर पडला होता. दुसऱ्या दिवशी म्हणजे २९ ऑगस्ट रोजी पहाटे साडेतीनच्या सुमारास कोपरखैरणे रेल्वे स्थानक परिसरातून दोन तरुण त्याच्या रिक्षात बसले. त्यांनी चालकाला मानखुर्द येथे जाण्यास सांगितले.
दुसरे भाडे मिळाल्याने प्रवाशांना उतरण्यास सांगितले
रिक्षा वाशीतील फोर्टिस हॉस्पिटलजवळील मिनी सी-शोर गार्डन परिसरात पोहोचल्यानंतर सुजनला दुसऱ्या प्रवाशाचा फोन आला. आपल्याला दुसरे भाडे मिळाले असल्याचे सांगत त्याने रिक्षातील दोन्ही प्रवाशांना खाली उतरण्यास सांगितले. याच कारणावरून चालक आणि प्रवाशांमध्ये वाद झाला. सुरुवातीला किरकोळ असलेला हा वाद काही क्षणांतच गंभीर स्वरूपाचा झाला.
धारदार शस्त्राने हल्ला
वाद वाढल्यानंतर दोन्ही आरोपींनी सुजनवर धारदार शस्त्राने हल्ला केला. त्याच्या मानेवर, डोक्यावर आणि हातावर वार करण्यात आल्याची माहिती मिळाली आहे. या हल्ल्यात गंभीर जखमी झालेल्या सुजनचा मृत्यू झाला. त्यानंतर आरोपींनी त्याची रिक्षा ताब्यात घेतली आणि घटनास्थळावरून पसार झाले. या घटनेने परिसरात खळबळ उडाली.
सीसीटीव्हीच्या आधारे तपास
घटनेची माहिती मिळताच गुन्हे शाखा कक्ष-१, मध्यवर्ती कक्ष आणि वाशी पोलिस ठाण्याची स्वतंत्र पथके तयार करण्यात आली. पोलिसांनी घटनास्थळासह आरोपींच्या संभाव्य मार्गावरील विविध ठिकाणच्या सीसीटीव्ही फुटेजचे तांत्रिक विश्लेषण केले. तसेच गोपनीय माहितीच्या आधारे आरोपींचा शोध घेण्यात आला. असून पोलिसांना आरोपींची ओळख पटवण्यात यश आले. त्यानंतर साहिल आनंदा सुर्वे (वय २०) आणि साहिल यशवंत खरात (वय २०) या दोघांना मानखुर्द परिसरातून ताब्यात घेण्यात आले आहे. दोघांना अटक करून पुढील तपास सुरू करण्यात आला आहे.
एका आरोपीवर यापूर्वीही गुन्हा
अटक करण्यात आलेल्या साहिल आनंदा सुर्वे याच्याविरोधात यापूर्वीही गंभीर स्वरूपाचा गुन्हा दाखल असल्याचे पोलिस तपासात समोर आले आहे. त्याच्यावर भारतीय न्याय संहितेतील संबंधित कलमांसह शस्त्र कायद्यांतर्गत गुन्हा नोंदवण्यात आला होता. या प्रकरणात तो ७ ऑक्टोबर २०२५ रोजी कारागृहातून जामिनावर बाहेर आला होता. या पार्श्वभूमीवर पोलिसांकडून दोन्ही आरोपींची अधिक चौकशी करण्यात येत आहे.
.png "Videos"){kind=small}
