Navi Mumbai: कोपरखैरणे पोलिसांनी चोरीचा सहा तासात लावला छडा; सीसीटीव्ही फुटेज तपासुन दोन आरोपींना ठोकल्या बेड्या

कोपरखैरणे येथे ५९ वर्षीय महिलेच्या गळ्यातील आठ तोळे सोन्याचे दागिने जबरदस्तीने ओरबाडून नेल्याच्या घटनेचा पोलिसांनी अवघ्या सहा तासांत गुन्हा उघडकीस आणला आहे.

• आठ तोळे सोन्याचे दागिने आणि दोन दुचाकींसह १२.९३ लाखांचा मुद्देमाल जप्त
• मुख्य आरोपी राहुल पवारवर मोक्कासह १३ गंभीर गुन्हे दाखल
• सीसीटीव्हीच्या मदतीने चोरट्यांना सहा तासांत अटक

Navi Mumbai Crime News: बीएआरसीमध्ये कार्यरत असलेल्या ५९ वर्षीय महिला कर्मचाऱ्याला इमारतीच्या लॉबीत अडवून त्यांच्या गळ्यातील आठ तोळे सोन्याचे दागिने जबरदस्तीने ओरबाडून नेल्याच्या प्रकरणाचा कोपरखैरणे पोलिसांनी अवघ्या सहा तासांत छडा लावला. सीसीटीव्ही फुटेज आणि तांत्रिक तपासाच्या आधारे पोलिसांनी दोन आरोपींना अटक केली असून, त्यांच्याकडून चोरीचे दागिने, गुन्ह्यात वापरलेली दुचाकी आणि चोरीच्या पैशांतून खरेदी केलेली केटीएम ड्युक ३९० मोटारसायकल असा एकूण १२ लाख ९३ हजार रुपयांचा मुद्देमाल जप्त केला आहे.
फिर्यादी लता सुब्रमण्यम यांचे (वय ५९ आणि रा. सेक्टर २ए, कोपरखैरणे) येथील असुन त्या १७ ऑगस्ट रोजी सायंकाळी सातच्या सुमारास कामावरून घरी परतत होत्या. त्या इमारतीच्या लॉबीत पोहोचल्या असता राहुल पांडुरंग पवार (वय ३५) याने मागून येत त्यांच्या गळ्याभोवती हात टाकला. त्याने त्यांच्या गळ्यातील ३.५ तोळ्यांची सोन्याची साखळी आणि ४.५ तोळ्यांचे मंगळसूत्र असा एकूण आठ तोळ्यांचा, सुमारे आठ लाख रुपये किमतीचा ऐवज जबरदस्तीने खेचला. या झटापटीत लता सुब्रमण्यम खाली पडल्याने जखमी झाल्या.
दागिने हिसकावल्यानंतर आरोपी इमारतीबाहेर उभ्या असलेल्या साथीदाराच्या दुचाकीवरून पसार झाला.

हेही वाचा:

Acid Attack: नाते तुटल्याच्या रागातून माजी मंगेतरचे बिघडले मानसिक संतुलन; दोन सख्या बहिणींवर फेकले ॲसिड आणि…

कोपरखैरणे पोलीस ठाण्यात गुन्हा दाखल

या घटनेनंतर १८ ऑगस्ट रोजी कोपरखैरणे पोलीस ठाण्यात गुन्हा दाखल करण्यात आला असुन वरिष्ठ पोलीस निरीक्षक अमोल देशमुख यांच्या मार्गदर्शनाखाली गुन्हे प्रकटीकरण पथकाने तातडीने तपास सुरू केला. सुरुवातीला महापे ब्रिजवरील सीसीटीव्ही फुटेज तपासण्यात आले. मात्र, रात्रीची वेळ असल्याने वाहनाचा क्रमांक स्पष्ट दिसत नव्हता. पोलिसांनी हार न मानता ऐरोली ते कोपरखैरणे या मार्गावरील विविध सीसीटीव्ही कॅमेऱ्यांचे फुटेज तपासले.

पेट्रोल पंपावर सापडले आरोपी

या तपासादरम्यान रबाळे एमआयडीसी पोलीस ठाण्याजवळील शेल पेट्रोल पंपावरील सीसीटीव्ही फुटेजमध्ये आरोपी पेट्रोल भरताना आढळून आले. त्यावरून दुचाकीचा क्रमांक पोलिसांच्या हाती लागला. तांत्रिक तपासाच्या आधारे पोलिसांनी दुचाकी चालक ओमकेश अशोक साकोले (वय १९, रा. भीमनगर झोपडपट्टी, ऐरोली) याला ताब्यात घेतले. चौकशीत त्याने गुन्ह्याची माहिती दिल्यानंतर पोलिसांनी मुख्य आरोपी राहुल पांडुरंग पवार याला ऐरोली सेक्टर चारमधून अटक केली.

१२ लाख ९३ हजार रुपयांचा मुद्देमाल जप्त

पोलिसांनी कारवाईदरम्यान आठ लाख रुपये किमतीचे चोरीचे सोन्याचे दागिने, गुन्ह्यात वापरलेली सुमारे ८० हजार रुपये किमतीची दुचाकी तसेच चोरीच्या सोन्याच्या विक्रीतून मिळालेल्या पैशांतून खरेदी केलेली ४ लाख १३ हजार रुपये किमतीची केटीएम ड्युक ३९० मोटारसायकल जप्त केली. त्यामुळे एकूण १२ लाख ९३ हजार रुपयांचा मुद्देमाल पोलिसांच्या हाती लागला.

आरोपीवर या पुर्वीच १३ गुन्हे दाखल

दरम्यान, मुख्य आरोपी राहुल पवार हा सराईत गुन्हेगार असल्याचे तपासात समोर आले आहे. त्याच्यावर २००६ ते २०२५ या कालावधीत तब्बल १३ गंभीर गुन्हे दाखल आहेत. तसेच २०११ ते २०२३ या कालावधीत तो मोक्का कायद्यांतर्गत तुरुंगात होता, अशी माहिती पोलिसांनी दिली. या कारवाईत वरिष्ठ पोलीस निरीक्षक अमोल देशमुख, सहाय्यक पोलीस निरीक्षक शिंदे, पोलीस उपनिरीक्षक केंद्रे तसेच गुन्हे प्रकटीकरण पथकातील कर्मचाऱ्यांनी सहभाग घेतला. पुढील तपास कोपरखैरणे पोलीस करीत आहेत.