Fire Incidents: “लक्ष्मीपूजनाच्या रात्री मुंबई अन् ठाण्यात कुठे काय घडलं? १७ मजली इमारतीला आगीसह अनेक ठिकाणी अग्नितांडव…

Fire Incidents: लक्ष्मीपूजनाच्या रात्री ठाणे, मुंबई अन् भिवंडीत अग्नितांडव! ठाण्यातील १७ मजली रहेजा गार्डनमध्ये ६ तास थरार; उपमुख्यमंत्र्यांच्या आदेशानंतर ठाणे जिल्ह्यात रॉकेट फटाक्यांवर तडक बंदी, सणात मोठी जीवितहानी टळली!

• लक्ष्मीपूजनाच्या रात्री ठाणे, मुंबई आणि भिवंडीत आगीच्या अनेक दुर्घटना
• रहेजा गार्डन इमारतीसह विविध ठिकाणी नुकसान; सुदैवाने जीवितहानी टळली
• ठाणे जिल्ह्यात हवेत उडणाऱ्या रॉकेटवर पूर्ण बंदी

Fire Incidents: लक्ष्मीपूजनाच्या उत्साही वातावरणात ठाणे, मुंबई आणि भिवंडी परिसरात आगीच्या अनेक भीषण दुर्घटना समोर आल्या आहेत. फटाक्यांच्या ठिणग्या आणि दिव्यांमुळे लागलेल्या या आगींमुळे नागरिकांमध्ये मोठी घबराट पसरली. ठाण्यातील अत्यंत उच्चभ्रू समजल्या जाणाऱ्या रहेजा गार्डन संकुलातील १७ मजली इमारतीला लागलेल्या भीषण आगीने संपूर्ण परिसर हादरवून सोडला. सुदैवाने अग्निशमन दल आणि आपत्ती व्यवस्थापन विभागाच्या तत्परतेमुळे सर्वच दुर्घटनांमध्ये मोठी जीवितहानी टळली आहे. दरम्यान, ठाण्यातील आगीच्या घटनेची गंभीर दखल घेत राज्याचे उपमुख्यमंत्री एकनाथ शिंदे यांच्या थेट निर्देशानंतर ठाणे जिल्ह्यात हवेत उडणाऱ्या रॉकेट आणि घातक फटाक्यांवर तडक बंदी घालण्यात आली आहे.

ठाणे: रहेजा गार्डनच्या १७ मजली इमारतीत ६ तास अग्नितांडव

वागळे इस्टेट परिसरातील रहेजा गार्डन संकुलातील ‘कार्लाइल’ या १७ मजली इमारतीला रविवारी रात्री साडेआठ वाजेच्या सुमारास ८ व्या मजल्यावर अचानक भीषण आग लागली. वाऱ्यामुळे ही आग क्षणात रौद्ररुप धारण करत १४ व्या मजल्यापर्यंत पसरली. इमारतीतून धुराचे लोट आणि आगीच्या ज्वाळा निघत असल्याचे पाहून रहिवाशांमध्ये पळापळ झाली.

• ६ तासांचे अथक प्रयत्न: अग्निशमन दलाच्या १० ते १५ गाड्या घटनास्थळी दाखल झाल्या. सुमारे ६ तासांच्या अथक प्रयत्नांनंतर आगीवर पूर्ण नियंत्रण मिळवण्यात यश आले.
• सुखरूप सुटका: अग्निशमन दलाने ५० हून अधिक रहिवाशांना आणि त्यांच्या पाळीव प्राण्यांना सुरक्षितपणे बाहेर काढले. २० ते २५ लोकांना सुरक्षित ठिकाणी हलवण्यात आले असून धुरामुळे त्रास झालेल्या ५ जणांवर रुग्णालयात प्राथमिक उपचार करण्यात आले.
• उपमुख्यमंत्र्यांची भेट अन् ‘रॉकेट’वर बंदी: घटनेची माहिती मिळताच उपमुख्यमंत्री एकनाथ शिंदे यांनी रात्रीच घटनास्थळी भेट देऊन पाहणी केली. त्यांच्या सूचनेनंतर ठाणे जिल्हाधिकारी श्रीकृष्ण पांचाळ यांनी संपूर्ण ठाणे जिल्ह्यात रॉकेट आणि हवेत उडणाऱ्या धोकादायक फटाक्यांवर पूर्ण बंदी लागू केली आहे. तसेच इतर सर्व फटाके केवळ खुल्या मैदानातच फोडण्याचे कडक आदेश दिले आहेत.

हेही वाचा: Family Harassment: “पती-सासऱ्यांच्या शारीरिक-मानसिक त्रासाने घेतला बळी! ५ दिवसांच्या संघर्षानंतर शेवटी…

मुंबई: डोंगरी, चेंबूर, विद्याविहार आणि अंधेरीत आग

लक्ष्मीपूजनाच्या रात्री मुंबई शहरातही चार वेगवेगळ्या ठिकाणी आगीच्या दुर्घटना घडल्या:

• डोंगरी: डॉ. महेश्वरी रोडवरील हाजी कासम चाळीजवळील एका गॅरेजला रात्री १० वाजेच्या सुमारास आग लागली. या आगीत १० ते १२ दुकाने जळून खाक झाली. सुरक्षिततेचा उपाय म्हणून शेजारील ३ इमारती तातडीने रिकाम्या करण्यात आल्या.
• चेंबूर: ‘क्रीतिका अनेक्स’ इमारतीजवळ फटाक्यांची ठिणगी उडाल्यामुळे परिसरातील एका मोठ्या झाडाने पेट घेतला. सुदैवाने वेळेत आग विझवण्यात आल्याने मोठा अनर्थ टळला.
• विद्याविहार: येथील ‘स्कायलाईन विहार’ या व्यावसायिक इमारतीच्या वरच्या दोन मजल्यांना भीषण आग लागली. यात सुदैवाने कोणीही जखमी झाले नसले तरी मोठे आर्थिक नुकसान झाले आहे.
• अंधेरी पश्चिम: लोखंडवाला बॅक रोडवरील ‘ओबेरॉय स्काय हाईट’ या निर्माणाधीन इमारतीला आग लागल्यामुळे कामगारांची जीव वाचवण्यासाठी पळापळ झाली. ओशिवरा पोलीस आणि कामगारांनी अग्निशमन यंत्रणेच्या मदतीने आगीवर नियंत्रण मिळवले.

हेही वाचा: Acid Attack: पुण्यात जुन्या वादातून मित्राच्या अंगावर फेकले ॲसिड; झटापटीत चिमुकलीसह चौघेजण गंभीर जखमी!

भिवंडी: ३ दुर्घटनांमध्ये दुकान, कारखाना अन् चाळ खाक

भिवंडी शहरातही फटाके आणि दिव्यांमुळे ३ वेगवेगळ्या ठिकाणी आगी लागून मोठे नुकसान झाले:

• बॅग दुकान खाक: गणेशनगर भागातील एका दुकानात लक्ष्मीपूजनानंतर लावलेल्या दिव्यामुळे अचानक आग लागली. या आगीत दुकानातील सर्व बॅग आणि साहित्य जळून भस्मसात झाले.
• बॅट बनवणारा कारखाना नष्ट: फटाक्याची ठिणगी उडाल्याने लाकडी बॅट बनवणाऱ्या कारखान्याला भयंकर आग लागली. या दुर्घटनेत संपूर्ण यंत्रसामग्री, लाकडी साठा आणि लगतचे एक झाड पूर्णपणे जळाले.
• गौरीपाडा चाळीत आग: एका भंगार गोदामात लागलेली आग पसरल्याने लगतच्या चाळीतील पहिल्या मजल्यावरील ५ खोल्या जळून खाक झाल्या. स्थानिकांनी २ घरांतील कुटुंबांना वेळेत सुरक्षित बाहेर काढल्यामुळे सुदैवाने कोणतीही जीवितहानी झाली नाही.