गुरुवार, 15 ऑक्टोबर 2026
सौजन्य फोटो - सोशल मिडीया
मिळालेल्या माहितीनुसार, हरीश गजवानी हे उल्हासनगर रेल्वे स्टेशन परिसरातील रस्त्यावरून जात होते. त्याचवेळी अज्ञात हल्लेखोरांनी त्यांचा पाठलाग करून त्यांना गाठले. हल्लेखोरांनी त्यांच्या डोक्यात अगदी जवळून दोन गोळ्या झाडल्या. गोळीबार होताच गजवानी रक्ताच्या थारोळ्यात कोसळले. अत्यंत गर्दीच्या ठिकाणी अचानक गोळीबार झाल्याने नागरिकांमध्ये घबराट निर्माण झाली आणि काही काळ परिसरात पळापळ झाली.
हरीश गजवानी यांच्या हत्येमागील नेमके कारण अद्याप स्पष्ट झालेले नाही. मात्र, या हत्येला चार वर्षांपूर्वीच्या एका हल्ल्याची पार्श्वभूमी असल्याचे सांगितले जात आहे. चार वर्षांपूर्वी संशयित आरोपी अविनाश नायडू याच्यावर जीवघेणा हल्ला झाला होता. या प्रकरणात हरीश गजवानी हे आरोपी असल्याची माहिती आहे. त्यामुळे जुन्या वैमनस्यातून हा हल्ला झाला आहे का, या दिशेनेही पोलिस तपास करत आहेत.
घटनेची माहिती मिळताच पोलिसांनी घटनास्थळी धाव घेत पंचनामा केला. हल्लेखोरांची ओळख पटवण्यासाठी परिसरातील सीसीटीव्ही फुटेज तपासले जात असून, फरार आरोपींचा शोध घेण्यासाठी पोलिसांनी नाकाबंदी केली आहे. वैयक्तिक वाद, जुने वैमनस्य, आर्थिक व्यवहार किंवा अन्य कोणते कारण या हत्येमागे आहे का, याचीही पोलिसांकडून पडताळणी सुरू आहे. सखोल तपासानंतरच हत्येमागील नेमके कारण आणि हल्लेखोरांची भूमिका स्पष्ट होणार आहे.
