Suicide Case News: विरारमध्ये सुन्न करणारी घटना! बंद फ्लॅटमधून दुर्गंधी आली अन् उघड झाला ३ भाऊ-बहिणींच्या मृत्यूचा थरार

Suicide Case News: विरारच्या ग्लोबल सिटीतील एका बंद फ्लॅटमधून अचानक तीव्र दुर्गंधी येऊ लागली... पोलिसांना बोलावले गेले, दरवाजा तोडला अन् आतले दृश्य पाहून अधिकारीही हादरले! फ्लॅटमध्ये तीन भाऊ-बहिणींचे मृतदेह पडून होते. कॅन्सर, आर्थिक अडचण आणि मृत्यूपूर्वीचा एक मोबाईल व्हिडिओ... नेमका काय घडला हा थरार?

• विरारमध्ये बंद फ्लॅटमध्ये २ भाऊ अन् बहिणीचे शव आढळले
• विष प्राशन करून सामूहिक आत्महत्या केल्याचा संशय
• कॅन्सरचे आजारपण आणि आर्थिक अडचणींमुळे हे पाऊल उचलल्याची शक्यता

Suicide Case News: महाराष्ट्र राज्यातील विरार पश्चिम येथील हायप्रोफाईल समजल्या जाणाऱ्या ग्लोबल सिटी परिसरात गुरुवारी एक अत्यंत धक्कादायक आणि सुन्न करणारी घटना उघडकीस आली आहे. येथील एका इमारतीतील बंद फ्लॅटमध्ये दोन भाऊ आणि त्यांच्या एका बहिणीचा मृतदेह संशयास्पद स्थितीत आढळला आहे. प्राथमिक तपासाच्या आधारे पोलिसांनी या तिघांनीही एकत्र आत्महत्या केल्याचा संशय व्यक्त केला आहे.

हेही वाचा: Leopard Attack Farmer: गोधडी ठरली ‘सुरक्षा कवच’! गळ्याचा वेध घेणारा बिबट्या कसा पडला मागे?

दुर्गंधी आल्याने शेजाऱ्यांनी दिली माहिती

मिळालेल्या सविस्तर माहितीनुसार, विरार पश्चिम येथील ग्लोबल सिटीतील ‘के. एव्हेन्यू’ इमारतीच्या ‘डी’ विंगमधील फ्लॅट नंबर १२०३ मध्ये ही घटना घडली. गेल्या काही दिवसांपासून हा फ्लॅट बंद होता. बुधवारी रात्री या बंद फ्लॅटमधून अचानक तीव्र दुर्गंधी येऊ लागल्याने शेजाऱ्यांचा संशय बळावला. त्यांनी तात्काळ या घटनेची माहिती स्थानिक पोलिसांना दिली. घटनेची माहिती मिळताच बोलिंज पोलीस ठाण्याचे वरिष्ठ पोलीस निरीक्षक प्रकाश कावले आपल्या पथकासह घटनास्थळी दाखल झाले. त्यांनी फ्लॅटचा मुख्य दरवाजा तोडून आत प्रवेश केला असता, घरातील तीन व्यक्ती मृत अवस्थेत पडून असल्याचे आढळून आले.

आर्थिक विवंचना आणि कर्करोग ठरले कारण?

मृत व्यक्तींचे वय अंदाजे ४५ ते ५० वर्षांच्या दरम्यान आहे. पोलीस निरीक्षक प्रकाश कावले यांनी दिलेल्या माहितीनुसार, या तीन भाऊ-बहिणींपैकी एकाला कर्करोगासारख्या (कॅन्सर) गंभीर आजाराने गाठले होते. तसेच कुटुंबात प्रचंड आर्थिक टंचाई (पैशांची अडचण) होती. या सततच्या आजारपणाला आणि आर्थिक संकटाला कंटाळूनच त्यांनी हे टोकाचे पाऊल उचलले असावे, असा प्राथमिक अंदाज आहे. तसेच, मृतांपैकी एकाने मृत्यूपूर्वी स्वतःच्या मोबाईल फोनवर एक व्हिडिओ रेकॉर्ड केला होता. यामध्ये त्याने आपण आत्महत्या करत असल्याचा उल्लेख केला होता. तिघांनीही विष प्राशन करून आपले जीवन संपवले असण्याची दाट शक्यता पोलिसांनी वर्तवली आहे.

हेही वाचा: Amravati Accident News: क्षणार्धात घात झाला! अप्पर वर्धा कालव्यात पाय घसरला अन् ५२ वर्षीय शेतकरी पाण्याच्या तीव्र प्रवाहात गायब

एडीआर दाखल, पोलिसांकडून कसून तपास सुरू

पोलीस प्रशासनाने तिन्ही मृतदेह ताब्यात घेऊन शवविच्छेदनासाठी (पोस्टमार्टम) शासकीय रुग्णालयात पाठवले आहेत. या प्रकरणी सध्या ‘आकस्मिक मृत्युची नोंद’ (ADR) करण्यात आली आहे. मोबाईलमधील व्हिडिओ क्लिप, फॉरेन्सिक पुरावे आणि पोस्टमार्टम रिपोर्टच्या आधारे मृत्यूचे अचूक कारण स्पष्ट होईल, असे पोलिसांकडून सांगण्यात आले आहे. या घटनेमुळे संपूर्ण विरार परिसरात तीव्र शोक आणि खळबळ व्यक्त होत आहे.