ऐरोलीमध्ये अंकुश कदम यांनी जाहीर केला 'स्वराज्याचा कर्तव्यनामा'
सिद्धेश प्रधान, नवी मुंबई : ऐरोली विधानसभा मतदारसंघातून महाराष्ट्र स्वराज्य पक्ष व परिवर्तन महाशक्तीचे अधिकृत उमेदवार अंकुश कदम ही निवडणुकीच्या रिंगणामध्ये उतरले असून त्यांनी नुकतीच पत्रकार परिषद घेत ऐरोली विधानसभा मतदारसंघाच्या विकासाचे त्यांचे व्हिजन ‘स्वराज्याचा कर्तव्यनामा’ या वचनाम्यामधून प्रकाशित करत मतदारांना स्वराज्याच्या पाठी उभे राहण्याचे आवाहन केले.
रोजगार निर्मितीसाठी प्रशिक्षण केंद्र, मराठा आरक्षणासंदर्भातील भूमिका, परवडणारी शिक्षण व्यवस्था, सुपर स्पेशलिटी हॉस्पिटलची उभारणी, शेतकरी भवन, कामगार विकास, महिला सक्षमीकरण व सुरक्षा धोरण, दिव्यांग बांधव धोरण, पर्यटन विकास, ड्रग्समुक्त नवी मुंबई, झोपडपट्टी मुक्त शहर, खेळाला प्रोत्साहन असे विविध विषय व प्रश्न या कर्तव्यनामाच्या माध्यमातून प्रकाशित करत अंकुश कदम यांनी विजयाचा विश्वास व्यक्त केला.
हे सुद्धा वाचा: नेत्यांच्या बॅगा तपासण्यावरुन रंगलं राजकारण! काहींची नाराजी तर अनेकांचे समर्थन
दरम्यान, आमदार म्हणून निवडून आल्यानंतर पहिल्या पन्नास दिवसांमध्ये महत्त्वपूर्ण बदल घडवणार असल्याची घोषणा देखील त्यांनी यावेळी केली. पेनाची निब सात किरणांसह या निशाणी समोरील बटन दाबून येत्या 20 तारखेला मतदारराजा ऐरोली विधानसभेमध्ये छत्रपतींचे स्वराज्य आणेल, असा देखील विश्वास त्यांनी यावेळी व्यक्त केला.
शनिवार दिनांक ९ नोव्हेंबर २०२४ रोजी महाराष्ट्र स्वराज्य पक्षाचे अधिकृत उमेदवार अंकुश कदम यांच्या प्रचारार्थ स्वराज्य पक्षाचे प्रमुख युवराज संभाजीराजे छत्रपती हे स्वतः नवी मुंबईमध्ये येत असून दिघा ते वाशी अशी भव्य बाईक रॅली काढून मतदारांना मतदानासाठी आवाहन करण्यात येणार आहे. या भव्य बाईक रॅलीमध्ये सहभागी होऊन महाराष्ट्र स्वराज्य पक्षाच्या या परिवर्तन लढ्यामध्ये साथ द्यावी असं आवाहन, यावेळी अंकुश कदम यांनी केले.
मराठा आरक्षणाचा मुद्दा आपल्या कर्तव्य नाम्यामध्ये घेत मराठा आरक्षणाचा प्रश्न सोडवण्यासाठी विधानसभेमध्ये आवाज उठवणार व हा प्रश्न पूर्णत्वास नेणार, असं म्हणत अंकुश कदम यांनी मराठा आरक्षणासंदर्भातील आपली व आपल्या पक्षाची भूमिका स्पष्ट केली आहे. दरम्यान मराठा समाजाच्या आरक्षणाच्या चळवळीतून, आंदोलनांतील सहभागातून अंकुश कदम समाजकारणातून राजकारणात आल्यामुळे मराठा समाजाचा चेहरा म्हणून त्यांच्याकडे पाहिले जात आहे. दरम्यान ऐरोली विधानसभा मतदारसंघात 40% मराठा समाज असल्याने यावेळी मराठा समाज किंगमेकरच्या भूमिकेत आहे.
हे सुद्धा वाचा: महाराष्ट्र निवडणुकीत पैसे वाटले जात आहेत का? संजय राऊतांचा महायुतीवर गंभीर आरोप
.png "Videos"){kind=small}
