(फोटो सौजन्य- सोशल मीडिया)
गेल्या अनेक वर्षांत असंख्य मराठी नागरिक कामानिमित्त किंवा उच्च शिक्षणासाठी परदेशात स्थायिक झाले आहेत. परदेशात राहूनही हे नागरिक आपल्या परंपरा आणि संस्कृती जपताना दिसतात. विशेषतः गणेशोत्सवाच्या काळात अमेरिकेतील विविध शहरांमध्ये मराठमोळ्या पद्धतीने उत्सव साजरा केला जातो. याच पार्श्वभूमीवर ढोल-ताशा वादनाचे प्रशिक्षणवर्गही आयोजित केले जातात.
अशाच एका प्रशिक्षणवर्गात अभिनेत्री अश्विनी भावे सहभागी झाल्या होत्या. त्यांनी ढोल वादनाचा सराव केला. विशेष म्हणजे, यावर्षी दर तीन महिन्यांनी काहीतरी नवीन शिकण्याचा संकल्प त्यांनी केला आहे. त्यामुळे ढोल-ताशा वादन शिकण्याच्या निमित्ताने त्यांचा हा संकल्पही पूर्ण झाला आहे.
अश्विनी भावे यांनी सोशल मीडिया पोस्टमध्ये आपल्या या अनुभवाबद्दल सांगितलं. त्या म्हणाल्या, “तुम्हाला आठवत असेल तर, यंदाच्या वर्षीच्या सुरुवातीला मी तुम्हाला म्हटलं होतं की, मी आता दर तीन महिन्यांनी काहीतरी नवीन शिकण्याचा प्रयत्न करणार आहे. जे आपण ठरवतो ते प्रत्येकवेळी होतंच असं नाहीये… पण आज मला एक नवीन संधी मिळालीये. आता मी ढोल-ताशा वाजवायला शिकणार आहे.”
पुण्यातील मिरवणुकांचे व्हिडीओ पाहून आपल्यालाही ढोल-ताशा वाजवण्याची संधी कधी मिळणार, असा विचार मनात यायचा, असंही त्यांनी सांगितलं. “पुण्यातल्या मिरवणुकांचे व्हिडीओ पाहून मला नेहमी वाटायचं की, अरे आपल्याला ही संधी केव्हा मिळेल? तर, आता मला कॅलिफोर्नियामध्ये ही संधी मिळालीये. स्पार्टन्स ढोल-ताशा पथक यांनी मला आमंत्रण दिलंय. आता बघुयात मला जमतंय का…” असं अश्विनी भावे यांनी म्हटलं.
OTT Release: या आठवड्यात OTTवर होणार मनोरंजनाचा ‘घमासान’; ‘सिरफिरे’ही घेऊन येणार क्रांतीची मशाल!
या उपक्रमासाठी ‘MMBA Spartans’ ग्रुपचे त्यांनी विशेष आभार मानले. “MMBA स्पार्टन्स या ग्रुपचे मनापासून आभार कारण, त्यांच्यामुळे मला ही नवीन संधी मिळाली. अर्थात, ढोलचं वजन मला झेपेल का, याची मला जरा शंकाच होती. पण काहीही झालं तरी, मी प्रयत्न करणारच आहे. गणपती बाप्पा मोरया!” असं म्हणत त्यांनी आपला उत्साह व्यक्त केला.
अश्विनी भावेंच्या या पोस्टनंतर चाहत्यांनी त्यांच्या या नव्या प्रयत्नाचं कौतुक केलं आहे. अमेरिकेत राहूनही मराठी संस्कृती आणि परंपरांशी जोडून राहण्याचा त्यांचा हा प्रयत्न विशेष लक्षवेधी ठरत आहे. गणेशोत्सवाच्या निमित्ताने ढोल-ताशा वादन शिकण्याचा त्यांचा अनुभव नक्कीच त्यांच्यासाठी खास ठरणार आहे.
.png "Videos"){kind=small}
