अभिजीत सावंतचं नवं कोरं गाणं ‘सखे गं साजणी’! प्रदर्शित होताच करतंय मनावर राज्य

‘सखे गं साजणी’ हा मराठी चित्रपट ३ एप्रिल २०२६ रोजी प्रदर्शित होणार असून त्याचे शीर्षक गीत अनोख्या पद्धतीने पुण्यातील Elpro City Square Mall येथे फ्लॅश मॉबमधून सादर करण्यात आले.

मराठी चित्रपटसृष्टीत मैत्री, प्रवास आणि आनंदाचा उत्सव साजरा करणारा सखे गं साजणी हा चित्रपट येत्या ३ एप्रिल २०२६ रोजी प्रेक्षकांच्या भेटीला येणार आहे. चित्रपटाच्या प्रदर्शनापूर्वीच त्याचे शीर्षक गीत अनोख्या पद्धतीने प्रेक्षकांसमोर सादर करण्यात आले. पुण्यातील Elpro City Square Mall येथे फ्लॅश मॉबच्या माध्यमातून या गाण्याचे विशेष प्रदर्शन करण्यात आले. अचानक सुरू झालेल्या या सादरीकरणाने मॉलमधील वातावरण क्षणातच रंगतदार झाले. उपस्थित प्रेक्षकांनीही या उत्साहात सामील होत टाळ्यांचा कडकडाट आणि नृत्याच्या स्टेप्ससह कार्यक्रमाला भरभरून प्रतिसाद दिला.

”मी दाऊदच्या बहिणीचा बॉडीगार्ड होतो…”, अंडरवर्ल्ड पाहिलेले नाट्य निर्माते अशोक शिगवण यांचे वक्तव्य चर्चेत

चित्रपटातील हे शीर्षक गीत मैत्री, मस्ती आणि प्रवासातील आनंददायी क्षणांची रंगतदार झलक दाखवते. गाण्यात अभिनेत्री प्रार्थना बेहरे, पूजा सावंत आणि अभिनेता अभिजीत खांडकेकर यांची धमाल केमिस्ट्री पाहायला मिळते. तिघांच्या मैत्रीतील खट्याळ क्षण, प्रवासातील मजा आणि जीवनाचा आनंद साजरा करणारी दृश्ये या गाण्यातून प्रेक्षकांसमोर येतात. रंगीबेरंगी लोकेशन्स, जोशपूर्ण नृत्य आणि उत्साही वातावरणामुळे हे गाणे चित्रपटाच्या भावविश्वाला अधिक खुलवते.

या गाण्याला आवाज दिला आहे लोकप्रिय गायक अभिजीत सावंत यांनी. संगीत दिग्दर्शन विजय भाटे यांचे असून, गाण्याचे बोल लखन चौधरी यांनी लिहिले आहेत. गाण्यातील रॅपचे शब्द आणि सादरीकरण रोहन तुपे यांनी केले असून, संगीत संयोजन आणि निर्मितीची जबाबदारीही त्यांनीच सांभाळली आहे. त्यामुळे पारंपरिक आणि आधुनिक संगीताचा सुंदर मिलाफ या गाण्यात अनुभवायला मिळतो.

या गाण्यातील वाद्यसंगीतालाही विशेष महत्त्व आहे. शहनाई आणि क्लॅरिनेटचे मधुर सूर दुर्गेश भोसले यांनी साकारले आहेत. कोरस आणि पार्श्वगायन श्वेता ठाकूर, वैभवी पंचागणे आणि मानसी जगताप यांनी केले असून, अतिरिक्त गायन ऋषभ साठे यांचे आहे.

ध्वनिमुद्रणाच्या प्रक्रियेतही अनेक कलाकारांनी आपले योगदान दिले आहे. शहनाई आणि कोरसचे ध्वनिमुद्रण आलोप स्टुडिओ येथे कौशल व्हीजी यांनी केले, तर मुख्य गायनाचे ध्वनिमुद्रण एएमव्ही स्टुडिओमध्ये हर्ष भोईर यांच्या देखरेखीखाली पार पडले. या प्रक्रियेत ध्वनिमुद्रण सहाय्यक म्हणून यश जोशी यांनी काम पाहिले.

रसिक प्रेक्षकांसाठी खास संगीत भेट, Tara आणि स्टार प्लसने सुप्रसिद्ध गाणं “परदेसिया”ला दिला नवा ट्विस्ट!

एकूणच उत्साही संगीत, प्रवासाची मस्ती आणि कलाकारांची ऊर्जा यामुळे ‘सखे गं साजणी’चे हे शीर्षक गीत प्रेक्षकांचे विशेष लक्ष वेधून घेत आहे. फ्लॅश मॉबच्या माध्यमातून केलेले अनोखे सादरीकरण, जोशपूर्ण नृत्य आणि मैत्रीचा रंगतदार उत्सव यामुळे या चित्रपटाबद्दलची उत्सुकता आता अधिकच वाढली आहे. ३ एप्रिलला चित्रपट प्रदर्शित झाल्यानंतर प्रेक्षकांना ही मैत्री आणि प्रवासाची गोष्ट मोठ्या पडद्यावर अनुभवता येणार आहे.