(फोटो सौजन्य- सोशल मीडिया)
Zee Marathi serial: झी मराठीवरील लोकप्रिय मालिका ‘कमळी’ सध्या एका रंजक वळणावर येऊन पोहोचली आहे. गेल्या दीड वर्षांपासून या मालिकेला प्रेक्षकांकडून भरभरून प्रेम मिळत आहे. मालिकेतील कमळीचा साधा लूक, दोन वेण्या आणि साधे कपडे यांची प्रेक्षकांमध्ये विशेष चर्चा असायची. अनेकदा चाहत्यांनी कमळीचा लूक बदलण्याची मागणीही केली होती. अखेर प्रेक्षकांची ही इच्छा पूर्ण होणार असून दिवाळीच्या शुभमुहूर्तावर कमळी नव्या रुपात प्रेक्षकांच्या भेटीला येणार आहे.
मालिकेत कमळीच्या आयुष्यात अनेक महत्त्वाच्या घडामोडी घडत आहेत. भूतकाळातील सत्य समोर आल्यानंतर कमळी ही महाजन कुटुंबाची मोठी नात असल्याचे स्पष्ट झाले आहे. त्यामुळे अन्नपूर्णा आजी आपल्या लाडक्या नातीचा मेकओव्हर करणार आहेत. नव्या लूकमध्ये कमळीचे मोकळे केस, कपाळावरील चंद्रकोर, नाजूक कानातले आणि सुंदर ड्रेस असा खास अंदाज पाहायला मिळणार आहे. केवळ कमळीच नव्हे, तर तिची आई गौरी हिचाही लूक बदललेला दिसणार आहे. त्यामुळे मायलेकींचा हा नवा अंदाज प्रेक्षकांसाठी खास ठरणार आहे.
झी मराठीच्या अधिकृत इन्स्टाग्राम पेजवर मालिकेचा एक नवीन प्रोमो शेअर करण्यात आला आहे. या प्रोमोमध्ये कमळीचा बदललेला लूक पाहायला मिळत आहे. विशेष म्हणजे, आता कमळी आणि हृषीच्या लग्नसोहळ्याचीही तयारी सुरू झाली आहे. त्यामुळे दोघांच्या लग्नाची उत्सुकता चाहत्यांमध्ये वाढली आहे. मात्र, या आनंदाच्या क्षणी मालिकेत एक अनपेक्षित ट्विस्ट येणार आहे.
लग्नसोहळ्यादरम्यान कमळी कबड्डीच्या स्पर्धेसाठी जाण्याचा निर्णय घेते. आपल्या स्वप्नांसाठी ती चक्क भर लग्नातून निघून जाण्याचा प्रयत्न करते. मात्र, त्याचवेळी हृषी तिला अडवतो. कमळीला लपून जाण्याची गरज नसल्याचे सांगत तो तिच्या स्वप्नांना पाठिंबा देतो. “स्वत:चं ध्येय पूर्ण करण्यासाठी जाताना अशी लपून का जातेस? जा गड जिंकून ये. मी इथेच तुझी वाट बघेन,” असे म्हणत हृषी तिचा आत्मविश्वास वाढवतो.
हृषीने दिलेल्या या साथीमुळे कमळीला आपल्या स्वप्नांच्या दिशेने पुढचे पाऊल टाकण्याचे बळ मिळणार आहे. एकीकडे कमळीचा मेकओव्हर आणि महाजनांच्या घरातील नवी ओळख, तर दुसरीकडे तिच्या कबड्डीच्या स्वप्नांना मिळणारी हृषीची साथ, असे अनेक रंजक प्रसंग आगामी भागांमध्ये पाहायला मिळणार आहेत. त्यामुळे कमळीच्या आयुष्यात पुढे नेमके काय घडणार, याची प्रेक्षकांना उत्सुकता लागली आहे.
.png "Videos"){kind=small}
