(फोटो सौजन्य- सोशल मिडिया)
Naagin Movie: टीव्ही क्वीन म्हणून ओळखल्या जाणाऱ्या एकता कपूर यांच्या सासू-सुनेच्या मालिकांनी छोट्या पडद्यावर मोठं यश मिळवलं आहे. मात्र, टीआरपी आणि लोकप्रियतेच्या बाबतीत त्यांच्या ‘नागिन’ फ्रँचायझीने वेगळीच उंची गाठली. २०१५ मध्ये सुरू झालेल्या या मालिकेचे आतापर्यंत सात सीझन प्रेक्षकांच्या भेटीला आले आहेत. आता या लोकप्रिय फ्रँचायझीला छोट्या पडद्याच्या पुढे नेण्याचा निर्णय एकता कपूर यांनी घेतल्याची चर्चा सुरू झाली आहे.
नागपंचमीच्या निमित्ताने एकता कपूर यांनी चाहत्यांना मोठं सरप्राइज दिलं आहे. त्यांनी सोशल मीडिया अकाउंटवर एक पोस्ट शेअर करत ‘काहीतरी रंजक येणार आहे’ अशी हिंट दिली आहे. यासोबत त्यांनी ‘नागिन’ फ्रँचायझीतील आतापर्यंतच्या प्रमुख अभिनेत्रींची झलक असलेला एक व्हिडीओही शेअर केला.
या व्हिडीओची सुरुवात अभिनेत्री मौनी रॉय हिच्यापासून होते. त्यानंतर गेल्या ११ वर्षांमध्ये ‘नागिन’च्या भूमिकेत झळकलेल्या अभिनेत्रींच्या प्रवासाची झलक दाखवण्यात आली आहे.
‘नागिन’च्या आतापर्यंतच्या सात सीझनमध्ये मौनी रॉयसोबत अदा खान, सुरभी ज्योती, सुरभी चंदना, निया शर्मा, तेजस्वी प्रकाश आणि प्रियंका चाहर चौधरी यांनी प्रमुख भूमिका साकारल्या आहेत. एकता कपूर यांनी शेअर केलेल्या व्हिडीओमध्ये या अभिनेत्रींची झलक पाहायला मिळते.
व्हिडीओसोबत सांगण्यात आलं आहे की, ‘११ वर्षांपासून ‘नागिन’ने छोट्या पडद्यावर राज्य केलं आहे. आता बालाजी टेलिफिल्म्स लिमिटेड ही प्रतिष्ठित फ्रँचायझी टीव्हीच्या पुढे नेण्यासाठी सज्ज आहे.’
एकता कपूर यांनी आपल्या पोस्टमधून नेमकं काय येणार आहे, याचा खुलासा केलेला नाही. त्यामुळे ‘नागिन’ची कथा आता मोठ्या पडद्यावर पाहायला मिळणार का, की या लोकप्रिय फ्रँचायझीवर एखादी वेब सीरिज तयार केली जाणार, याबाबत चाहत्यांमध्ये उत्सुकता निर्माण झाली आहे.
‘नागिन’च्या लोकप्रियतेचा विचार करता, एकता कपूर या फ्रँचायझीला नव्या माध्यमातून प्रेक्षकांसमोर आणणार असल्याची शक्यता व्यक्त केली जात आहे. मात्र, याबाबत अधिकृत घोषणा होईपर्यंत चाहत्यांना प्रतीक्षा करावी लागणार आहे.
.png "Videos"){kind=small}
