रविवार, 18 ऑक्टोबर 2026
Resham Tipnis Viral Video (फोटो सौजन्य- सोशलमीडिया)
Resham Tipnis Viral Video:मराठी आणि हिंदी सिनेसृष्टीची लोकप्रिय अभिनेत्री रेशम टिपणीस सध्या सोशल मीडियावर खूप चर्चेत आहे. तिचा एक व्हिडिओ तुफान व्हायरल होत आहे, ज्यात तिने स्पष्ट सांगितले आहे की तिला आता एक श्रीमान हवा आहे. ती एका जोडीदाराच्या शोधात आहे. .
हा व्हिडिओ तिने स्वतःच इंस्टाग्रामवर टाकला होता आणि लोकांनी त्याला खूप प्रतिसाद दिला. आणि विशेष म्हणजे या व्हिडिओनंतर तीन दिवस पण झाले नाहीत, तोच तिने थेट लग्नाच्या पत्रिकेचा व्हिडिओ शेअर केली. या पत्रिकेमुळे एकच खळबळ झाली.
रेशम त्या व्हिडिओत अगदी मनापासून बोलली. ती म्हणाली, “मी एक इंडिपेंडंट वुमन आहे, स्ट्राँग वुमन आहे. आयुष्यात अनेक वेळा मी पडले, धडपडले, पण पुन्हा स्वतःला सावरले आणि कामाला लागले. पण आता एक वेगळंच वाटतंय. दिवसभर काम करून जेव्हा मी संध्याकाळी घरी जाते आणि दरवाजा उघडते, तेव्हा माझी वाट पाहणारे कोणीच नसते. घर रिकामे असते.
“ती पुढे म्हणाली, “आता असे वाटू लागले आहे की कोणीतरी हवे, जो मी बेल वाजवल्यावर दरवाजा उघडेल. मला एक छान गरम मिठी मारेल, गरमागरम कॉफी देईल. मी माझा दिवस कसा गेला हे त्याला सांगेन आणि तो शांतपणे ऐकेल. असा एक माणूस आता आयुष्यात हवा आहे. मी त्याच श्रीमानच्या शोधात आहे. तुम्ही सगळे असे विश मागा की, मला लवकरात लवकर श्रीमान भेटू दे….” तिचे असे केविलवाणे बोलणे अनेक स्त्रियांच्या मनाला लागले. कारण कामात कितीही यशस्वी असली तरी शेवटी घरी एक हक्काचे माणूस असावे, ही भावना सगळ्यांनाच असते.
रेशमचा हा व्हिडिओ पाहून सगळ्यांना वाटले की ती पुन्हा लग्न करणार आहे का? सोशल मीडियावर ह्याच चर्चा रंगल्या होत्या. आणि त्यातच तिने दुसऱ्या दिवशी एक नवीन व्हिडिओ टाकला, ज्यात तिने लग्नाची पत्रिका दाखवली आहे.
त्या पत्रिकेवर ‘श्रीमान आणि श्रीमती’ असे लिहिले आहे आणि ‘आमच्या लग्नाला यायचं हं’ असेही लिहिले आहे. त्या व्हिडिओत ती ती पत्रिका देवापुढे ठेवते आणि देवाचे आशीर्वाद घेते, हे दिसत आहे. हा व्हिडिओ पाहिल्यावर तर लोकांचा संभ्रम आणखी वाढला आहे. नक्की ती लग्न करत आहे का, की हा तिच्या नव्या प्रोजेक्टचा भाग आहे? हे अजून स्पष्ट झालेले नाही.
View this post on Instagram
रेशम टिपणीस हे नाव काही नवीन नाही. तिने विनोदी आणि गंभीर अशा दोन्ही भूमिका अगदी सहज केल्या आहेत. मराठी सिनेमे, हिंदी मालिका, सगळीकडे तिने काम केले आहे. 2018 मध्ये ती बिग बॉस मराठीच्या पहिल्या सीझनमध्ये आली होती आणि सेमीफायनलपर्यंत पोहोचली होती. त्या कार्यक्रमामध्ये तिचे खरे आयुष्य समोर आले. वयाच्या 20 व्या वर्षी, अभिनेता संजीव सेठ सोबत 1993 मध्ये लग्नगाठ बांधली होती. त्यानंतर मात्र 2004 मध्ये दोघे वेगळे झाले. तिला रिशिका आणि मानव नावांची दोन मुले आहेत.
गेल्या कित्येक वर्षांपासून ती दोन्ही मुलांना एकटीने सांभाळत आहे. एक सिंगल मदर म्हणून तिने खूप संघर्ष केला आहे.त्यामुळे आता तिला पुन्हा एक जोडीदार हवा आहे, ही गोष्ट अनेकांना पटत आहे. चाहत्यांनी तिला मनापासून शुभेच्छा दिल्या आहे. तिला तिचा श्रीमान लवकर मिळो, अशा कमेंट्स येत आहेत. आता ती पत्रिका खरी आहे की फक्त एक प्रमोशन आहे, हे लवकरच कळेल.
