शुक्रवार, 21 ऑगस्ट 2026
(फोटो सौजन्य- सोशल मीडिया)
Yad Lagla Song: प्रेमाच्या रंगांनी सजलेलं आणि मनाला भावणारं नवं मराठी रोमँटिक गाणं ‘याड लागलं’ प्रेक्षकांच्या भेटीला आलं आहे. अभिनेत्री पूजा चव्हाण आणि अभिनेता आकाश यादव यांची नवी जोडी या गाण्यात पाहायला मिळत असून, गाण्याला सोशल मीडियावर चांगला प्रतिसाद मिळत आहे.
‘पुन्हा कर्तव्य आहे’ या मालिकेतून लोकप्रिय झालेली अभिनेत्री पूजा चव्हाण आणि अभिनेता आकाश यादव यांची केमिस्ट्री ‘याड लागलं’ या गाण्यात पाहायला मिळते. साधं, निस्वार्थ प्रेम आणि भविष्याची स्वप्नं रंगवणाऱ्या दोन तरुण प्रेमीयुगुलांची कथा या गाण्यातून मांडण्यात आली आहे. साताऱ्यातील दुर्गळवाडी येथील निसर्गरम्य परिसरात या गाण्याचं चित्रीकरण करण्यात आलं आहे.
समाधान पवार, सुबोध गोतपागर, शुभम यादव आणि आकाश यादव यांनी ‘याड लागलं’ या गाण्याची निर्मिती आणि दिग्दर्शन केलं आहे. गाण्याला दर्शन सुतार यांनी संगीत दिलं असून गायक निखिल मधाळे यांनी आपल्या आवाजाने ते सजवलं आहे. गाण्याची गीतरचना आकाश यादव यांनी केली आहे.
गाण्याच्या चित्रीकरणाची जबाबदारी सचिन घाटगे यांनी सांभाळली असून, व्हिडीओ एडिटिंग आकाश यादव यांनी केलं आहे. रूपेश जाधव यांनी मेकअप, तर दत्तात्रय पवार यांनी हेअर आर्टिस्टची जबाबदारी सांभाळली आहे.
मराठी वर्ल्ड प्रोडक्शनच्या बॅनरखाली हे गाणं तयार करण्यात आलं आहे. गाण्याविषयी बोलताना आकाश यादव यांनी सांगितलं की, आजच्या सोशल मीडियाच्या युगात निस्वार्थ प्रेम करणारी माणसं सहज मिळत नाहीत. गावातील दोन प्रेमीयुगुलांच्या साध्या आणि सुंदर प्रेमाची कथा या गाण्यातून दाखवण्यात आली आहे.
‘याड लागलं’ हे गाणं प्रदर्शित झाल्यानंतर त्याला प्रेक्षकांचा चांगला प्रतिसाद मिळत असून, सोशल मीडियावरही गाण्याची चर्चा सुरू आहे. गाणं इंस्टाग्रामवर ट्रेंडिंगला गेल्याचा दावा आकाश यादव यांनी केला आहे. तसेच त्यांनी चाहत्यांना गाण्यावर व्हिडीओ बनवून सोशल मीडियावर शेअर करण्याचं आवाहन केलं आहे.
Adinath Kothare: ‘रामायण’नंतर आदिनाथ कोठारेची आणखी एका बिग-बजेट सिनेमात वर्णी; साकारणार खास भूमिका
