‘जय पॅलेस्टाईन’ घोषणा असदुद्दीन ओवैसींना भोवली ! राष्ट्रपतींकडे तक्रार, लोकसभा सदस्यावर टांगती तलवार

एआयएमआयएमचे नेते असदुद्दीन ओवैसी यांनी खासदारकीची शपथ घेतली. यावेळी त्यांनी जय भीम, जय तेलंगणा व जय पॅलेस्टाईन अशी घोषणा दिली. त्यामुळे भाजप खासदारांनी एकच गोंधळ केला. सोशल मीडियावर व्हिडिओ व्हायरल झाल्यानंतर औवेसींवर टीकेची झोड उठली आहे.  सर्वोच्च न्यायालयाचे वकील विष्णू शंकर जैन यांनी ट्विट करत राष्ट्रपतींकडे तक्रार केल्याचे सांगितले आहे. ट्वीटमध्ये लिहिले आहे की, राष्ट्रपतींकडे ओवैसीसंदर्भात तक्रार केली आहे. भारतीय राज्य घटनेच्या नियम 102 आणि 103 नुसार ही तक्रार दिली आहे. त्यात त्यांचे संसद सदस्यत्व अपात्र ठरवण्याची मागणी केली आहे.

लोकसभा सदस्यत्व रद्द होण्याचा धोका

संसद सदस्य म्हणून निवडणूक लढवण्यासाठी सर्वात पहिला नियम आहे तो म्हणजे निवडणूक लढवणारा व्यक्ती भारतीय नागरिकच हवा. तसेच शपथ घेताना त्यात स्पष्ट नमूद केले आहे की, ‘कायद्याने स्थापित केलेल्या भारतीय संविधानावर खरी श्रद्धा आणि निष्ठा असेल.’ आता ओवैसी यांनी शपथ घेताना दुसऱ्या देशाच्या घोषणा दिल्या. त्यामुळे हा प्रकार संसद नियमाचे उल्लंघन करणारा आहे. नियमानुसार, असदुद्दीन ओवैसी यांनी दुसऱ्या देशासंदर्भात निष्ठा दाखवली आहे. त्यामुळे त्यांचे लोकसभा सदस्यत्व रद्द होण्याची शक्यता वर्तवली आहे.