ज्ञानवापी प्रकरणः मुस्लिम गटाला धक्का, नियमित पूजा करण्यासाठी हिंदू बाजूच्या याचिकेवर होणार सुनावणी

वाराणसीच्या ज्ञानवापी वादाशी संबंधित शृंगार गौरी प्रकरणी अलाहाबाद उच्च न्यायालयाने महत्त्वपूर्ण निकाल दिला आहे. शृंगार गौरीची नियमित पूजा करण्याची मागणी करणाऱ्या याचिकेबाबत अंजुमन इंतेजामिया मस्जिद समितीला न्यायालयाकडून मोठा झटका बसला आहे. न्यायालयाने मुस्लिम बाजूचा आक्षेप फेटाळून लावला आणि हिंदू बाजूची याचिका ग्राह्य धरली. उच्च न्यायालयाच्या निर्णयानंतर नियमित पूजा करण्याची मागणी करणाऱ्या अर्जावरील सुनावणीचा मार्ग मोकळा झाला आहे.

शृंगार गौरीची नियमित पूजा करण्याची मागणी करणाऱ्या याचिकेवर जिल्हा न्यायालय वाराणसी सुनावणी करणार आहे. न्यायमूर्ती जेजे मुनीर यांच्या एकल खंडपीठाने हा निर्णय दिला आहे. राखी सिंहसह इतर 9 जणांनी वाराणसी कोर्टात शृंगार गौरीची नियमित पूजा करण्याची मागणी करत दिवाणी दावा दाखल केला होता.

ज्ञानवापी कॅम्पसमध्ये असलेल्या शृंगार गौरी आणि इतर धार्मिक स्थळांमध्ये नियमित पूजा करण्यास परवानगी देण्याची मागणी हिंदू बाजूच्या वतीने करण्यात आली. सर्वोच्च न्यायालयाच्या आदेशानुसार जिल्हा न्यायालयाने हे प्रकरण सुनावणीयोग्य आहे की नाही याचा निर्णय घ्यायचा होता. सुनावणीदरम्यान, मुस्लीम बाजूने खटला कोर्टात टिकवून ठेवता येत नाही, असा युक्तिवाद करत खटला रद्द करण्याची मागणी केली. मुस्लीम बाजूचा युक्तिवाद फेटाळून लावत न्यायालयाने आपल्या निर्णयात म्हटले आहे की, या प्रकरणाची सुनावणी नागरी प्रक्रिया संहितेच्या आदेश 07 नियम 11 अंतर्गत होऊ शकते.

या प्रकरणी आपला आक्षेप फेटाळल्याच्या विरोधात मशिदीच्या व्यवस्था समितीने अलाहाबाद उच्च न्यायालयात अर्ज दाखल केला होता. अर्जात वाराणसीच्या जिल्हा न्यायाधीशांच्या १२ सप्टेंबरच्या निर्णयाला आव्हान देण्यात आले होते. न्यायालयात खटला दाखल करणाऱ्या 5 महिलांसह 10 जणांना पक्षकार करण्यात आले.

वास्तविक, वाराणसीच्या जिल्हा न्यायाधीशांच्या न्यायालयाने मुस्लिम बाजूने दाखल केलेला आक्षेप आधीच फेटाळला होता. मुस्लीम बाजूने असा युक्तिवाद केला की 1991 च्या प्रार्थना स्थळ कायदा आणि 1995 च्या सेंट्रल वक्फ कायदा अंतर्गत दिवाणी खटला चालवण्यायोग्य नाही. जिल्हा न्यायाधीशांच्या या निर्णयाला मस्जिद समितीने उच्च न्यायालयात आव्हान दिले होते. आता महिलांना चैत्र आणि वासंतिक नवरात्रीच्या चौथ्या दिवशी शृंगार गौरीची पूजा करण्याची परवानगी आहे.

Web Title: Gyanvapi case shock to muslim group hearing on hindu sides plea for regular puja will be held nrab

Get Latest  Marathi News ,  Maharashtra News and  Marathi News from Politics,  Election News ,  Sports News ,  Entertainment News,  Business News and   Religion News  only on Navarashtra.com