IMD Weather Update : उत्तर प्रदेश आणि बिहारमध्ये पावसाचा जोर; उत्तराखंड राज्यासाठी हवामान विभागाकडून धोक्याची घंटा

IMD Weather Update : देशात मुसळधार पावसाच्या सरी सुरुच असून अनेक राज्यांमध्ये पावसाचा जोर वाढला आहे. ज्यामुळे दिल्ली, उत्तराखंड, हिमाचल, बिहार आणि उत्तर प्रदेशमध्ये अनेक लोकांचा मृत्यू झाला आहे.

IMD Weather Update : नवी दिल्ली : देशभरात सुरू असलेला सततचा मुसळधार पाऊस आता जीवघेणा ठरत आहे. अनेक राज्यांना पावसाने अक्षरशः झोडपून काढले असून मोठ्या प्रमाणात नुकसान देखील होत आहे. मुसळधार पावसामुळे होणाऱ्या दुर्घटनेमध्ये दिल्ली, उत्तराखंड, हिमाचल, बिहार आणि उत्तर प्रदेशमध्ये अनेक लोकांचा मृत्यू झाला आहे. मध्य प्रदेशातही पावसाने कहर केला आहे. अनेक मैदानी भागातील घरांमध्ये पुराचे पाणी शिरले आहे. दरम्यान, हवामान खात्याने आणखी एक इशारा जारी केला आहे.

उत्तर प्रदेशातील ७ जिल्ह्यांमध्ये मुसळधार पावसामुळे परिस्थिती आणखी बिकट होऊ शकते, तर बिहारमधील १२ जिल्ह्यांमध्ये आणि उत्तराखंडमधील जवळजवळ सर्व जिल्ह्यांमध्ये मुसळधार पावसाचा इशारा जारी करण्यात आला आहे. उत्तराखंडमधील पर्यटनाला यामुळे मोठा फटका बसला आहे. तसेच देवदर्शनासाठी गेलेले अनेक भाविक व पर्यटकांना देखील रेक्यु करण्याचे काम सुरु आहे.

राजकीय बातम्या वाचण्यासाठी क्लिक करा

उत्तराखंडमधील आजचे हवामान

उत्तराखंडमधील हवामान पुन्हा एकदा बिघडू शकते. हवामान खात्याने अनेक जिल्ह्यांमध्ये मुसळधार पावसाचा इशारा दिला आहे. पिथोरागड, बागेश्वर, चमोली, पौडी गढवाल, रुद्रप्रयाग, टिहरी गढवाल, नैनिताल, चंपावत, अल्मोडा आणि उधम सिंह नगर येथे मुसळधार पावसाचा इशारा देण्यात आला आहे. यामुळे नागरिकांना देखील सतर्कतेचा इशारा देण्यात आला असून पर्यटकांना देखील काही दिवस न जाण्याचे आवाहन केले जात आहे.

दिल्ली-NCR मध्ये आजचे हवामान

शनिवारी सकाळी दिल्ली-एनसीआरमध्ये झालेल्या मुसळधार पावसामुळे रक्षाबंधनाच्या आनंदावर पाणी साचले. अनेक ठिकाणी पाणी साचल्याने वाहतूक व्यवस्था विस्कळीत झाली आणि रस्ते पाण्याखाली गेले. त्याच वेळी, हवामान खात्याने म्हटले आहे की १०-११ ऑगस्ट रोजी दिल्लीतही मेघगर्जनेसह हलका पाऊस पडण्याची शक्यता आहे. यासोबतच, आज सकाळी यमुना नदीची पाण्याची पातळी धोक्याच्या पातळीपेक्षा खाली नोंदली गेली.

उत्तर प्रदेशातील हवामान विभागाचा अंदाज काय? 

१० ऑगस्ट रोजी उत्तर प्रदेशातील बहुतेक भागात पावसापासून दिलासा मिळेल, परंतु सहारनपूर, मेरठ, मुझफ्फरनगर, बिजनौर, बदायूं, बरेली आणि पिलीभीतमध्ये मुसळधार पावसाचा इशारा जारी करण्यात आला आहे. या भागात वीज आणि गडगडाटाची शक्यता देखील आहे. दरम्यान, राज्यातील अनेक जिल्ह्यांमध्ये पुराचा धोका वाढला आहे. प्रयागराज, वाराणसी, बलिया आणि हस्तिनापूरसह बदायूं जिल्ह्यातील गंगा आणि रामगंगा नद्यांच्या पाण्याच्या पातळीत अचानक वाढ झाल्यामुळे सदर, सहस्वान आणि दासगंज तहसीलमधील ३६ गावे पाण्याखाली गेली आहेत.

महाराष्ट्रसंबंधित बातम्या वाचण्यासाठी क्लिक करा

बिहारमधील आजचे हवामान

पुन्हा एकदा मुसळधार पावसामुळे बिहारमध्ये समस्या वाढणार आहेत. किशनगंज, सुपौल, पूर्णिया, मधेपुरा, कटिहार, सीतामढी, मधुबनी, अररिया, मुझफ्फरपूर, समस्तीपूर, दरभंगा आणि बेगुसराय येथे जोरदार वाऱ्यांसह पावसाचा इशारा जारी करण्यात आला आहे. त्याच वेळी, भागलपूर आणि नवगछिया येथील अनेक गावांमध्ये पुराचे पाणी शिरले आहे. इंग्लिश चिचरौन, महेशी, पान, श्रीरामपूर, मकंदपूर आणि खरहिया यासह अनेक गावे पाण्याखाली गेली आहेत. लोक आपली घरे सोडून रस्ते, रेल्वे स्थानके आणि राष्ट्रीय महामार्गावर आश्रय घेत आहेत.

इतर राज्यातील हवामान

हिमाचल प्रदेशातील 9 जिल्ह्यांमध्ये 10 ऑगस्ट रोजी मुसळधार पाऊस अपेक्षित आहे. कांगडा, मंडी, उना, हमीरपूर, शिमला, बिलासपूर, सिरमौर, किन्नौर आणि सोलन येथे मुसळधार पाऊस पडू शकतो. मध्य प्रदेशातील १७ जिल्हे कटनी, नरसिंगपूर, सिवनी, जबलपूर, छिंदवाडा, बालाघाट, मंडला, रेवा, सतना, दिंडोरी, सिधी, सिंगरौली, मौगंज, मैहर, अनुपपूर, शहडोल आणि उमरिया येथे आज पाऊस पडण्याची शक्यता आहे. दुसरीकडे, 13 ऑगस्ट रोजी बंगालच्या उपसागरात कमी दाबाचे क्षेत्र तयार झाल्याने राज्यात पुन्हा मुसळधार पावसाची शक्यता आहे.