ट्रम्प यांच्या ‘टॅरिफ’वर मोदींचा पलटवार, ‘आम्ही आमची ताकद वाढवतच राहू’; दहशतवाद्यांनाही गंभीर इशारा

पंतप्रधान मोदी सध्या गुजरातच्या २ दिवसांच्या दौऱ्यावर आहेत. अहमदाबादमधील एका जाहीर सभेला संबोधित करताना ते म्हणाले की, दहशतवादी आणि त्यांचे मालक कुठेही लपले असले तरी आम्ही त्यांना सोडणार नाही.

PM Narendra Modi: पंतप्रधान मोदी सध्या २ दिवसांच्या गुजरात दौऱ्यावर आहेत. पहिल्या दिवशी, सोमवारी त्यांनी अहमदाबादमध्ये रोड शो केला. त्यानंतर त्यांनी एका जाहीर सभेला संबोधित केले. यादरम्यान, पंतप्रधान मोदींनी पाकिस्तानचे नाव न घेता दहशतवादावर पाकिस्तानला इशारा दिला आहे. पंतप्रधान नरेंद्र मोदी यांनी सोमवारी दहशतवाद्यांना स्पष्ट शब्दात इशारा दिला आहे की ते जगात कुठेही लपले असले तरी त्यांना सोडले जाणार नाही. त्यांनी अलीकडेच यशस्वी झालेल्या ऑपरेशन सिंदूरचा उल्लेख करत म्हटले, “आम्ही दहशतवाद्यांना आणि त्यांना मदत करणाऱ्यांना सोडणार नाही. ते कुठेही लपले असले तरी आम्ही त्यांना शोधून काढू. पहलगाम हल्ल्याचा बदला आम्ही कसा घेतला, हे जगाने पाहिले आहे.”

ट्रम्प यांच्या ‘टॅरिफ’वर मोठे विधान

पंतप्रधानांनी ट्रम्प यांच्या टॅरिफ धोरणांवरही अप्रत्यक्षपणे मोठे विधान केले. आज जगभरात आर्थिक स्वार्थाचे राजकारण चालू असून प्रत्येक देश आपल्या हिताचा विचार करत आहे, हे आम्हाला माहीत आहे, असे ते म्हणाले. देशातील शेतकरी आणि पशुपालकांचे हित त्यांच्यासाठी सर्वोच्च आहे हे त्यांनी स्पष्ट केले. “मी माझ्या लहान उद्योजक, दुकानदार, शेतकरी आणि पशुपालकांना सांगू इच्छितो की, मी गांधींच्या भूमीतून बोलत आहे. माझ्या देशातील लहान उद्योजक, शेतकरी आणि पशुपालक, तुमच्यासाठी मोदींचे हित सर्वोच्च आहे. कितीही दबाव आला तरी आम्ही तो सहन करण्याची ताकद वाढवतच राहू,” असे मोदी म्हणाले.

फिजीचे पंतप्रधान राबुका यांनी पंतप्रधान मोदींची घेतली भेट, द्विपक्षीय संबंधांसह अनेक महत्त्वाच्या विषयांवर चर्चा

गुजरातची ही भूमी दोन मोहनची भूमी

अहमदाबादमधील एका कार्यक्रमाला संबोधित करताना पंतप्रधान मोदींनी सांगितले की, भारत भगवान श्रीकृष्ण आणि महात्मा गांधी यांनी दाखवलेल्या मार्गावर चालत अधिक मजबूत होत आहे. “गुजरातची ही भूमी दोन मोहनची भूमी आहे. एक, सुदर्शनचक्रधारी मोहन- आपले द्वारकाधीश श्रीकृष्ण, आणि दुसरे, चरखाधारी मोहन- साबरमतीचे संत, पूज्य बापू महात्मा गांधी. या दोघांच्या मार्गदर्शनाखाली भारत निरंतर सशक्त होत आहे,” असे ते म्हणाले. श्रीकृष्ण यांनी देश आणि समाजाचे रक्षण करण्यास शिकवले, त्यांचे सुदर्शन चक्र न्याय आणि सुरक्षेचे प्रतीक होते, जे शत्रूला शोधून शिक्षा देत होते. आज भारताच्या निर्णयांमधून तीच भावना दिसते, असेही मोदी म्हणाले.

पूरग्रस्तांसाठी संवेदना व्यक्त

पंतप्रधान मोदींनी देशभरात मान्सूनमुळे झालेल्या नुकसानीबद्दल चिंता व्यक्त केली आणि बाधित कुटुंबांप्रति संवेदना व्यक्त केल्या. “यावेळी मान्सूनमध्ये गुजरातच्या अनेक भागांत मुसळधार पाऊस झाला आहे. देशभरात सतत होणाऱ्या ढगफुटी आणि त्यामुळे होणारी हानी पाहून मन विचलित होते. मी सर्व बाधित कुटुंबांप्रति माझी मनापासून सहानुभूती व्यक्त करतो,” असे ते म्हणाले. केंद्र सरकार राज्य सरकारांसोबत मिळून मदत आणि बचाव कार्य करत असल्याचेही त्यांनी सांगितले.