Punjab Flood: पुराच्या संकटात पंजाबला मदतीचा हात! खासदार राघव चड्ढाकडून 3.25 कोटींची मदत

आपचे राज्यसभा खासदार राघव चड्ढा यांनी पंजाबमधील पूरग्रस्तांसाठी आपल्या खासदार निधीतून 3.25 कोटी रुपयांची मदत जाहीर केली आहे. गुरदासपूरमधील बांध दुरुस्तीसाठी आणि अमृतसरमधील मदतकार्यासाठी हा निधी वापरला जाईल.

Raghav Chadha on Punjab Flood: आम आदमी पार्टी (आप) चे पंजाबमधील राज्यसभा खासदार राघव चड्ढा (Raghav Chadha) यांनी पूरग्रस्त राज्यासाठी आपल्या स्थानिक क्षेत्र विकास (एलएडी) निधीतून 3.25 कोटी रुपयांची मदत जाहीर केली आहे. बुधवारी जारी केलेल्या निवेदनात ही माहिती देण्यात आली. खासदारांच्या कार्यालयाने दिलेल्या माहितीनुसार, त्यांनी पंजाबमधील सर्वात जास्त पूरग्रस्त जिल्ह्यांपैकी एक असलेल्या गुरदासपूरमध्ये रावी नदीच्या बांधांच्या दुरुस्तीसाठी 2.75 कोटी रुपये आणि अमृतसरमधील मदत व पुनर्वसन कार्यासाठी 50 लाख रुपये मंजूर केले आहेत.

पुरामुळे झालेल्या दुर्घटनेत ज्या 30 लोकांचा मृत्यू झाला, त्यांच्या कुटुंबीयांबद्दल संवेदना व्यक्त करताना चड्ढा म्हणाले, “हा निधी माझा नाही, तो पंजाब आणि पंजाबच्या लोकांचा आहे. प्रत्येक रुपया पंजाबची सेवा आणि पुनर्बांधणीसाठी वापरला जाईल.” त्यांनी भारतीय लष्कर, सीमा सुरक्षा दल (बीएसएफ) आणि पंजाब पोलीस यांच्यासह बचाव व मदतकार्यात सहभागी झालेले अधिकारी आणि डॉक्टरांच्या प्रयत्नांचेही कौतुक केले.

चड्ढा यांनी केंद्र सरकारला पंजाबला शक्य ती सर्व मदत करण्याचे आवाहन केले. त्यांनी सोशल मीडिया प्लॅटफॉर्म ‘एक्स’ (पूर्वीचे ट्विटर) वर एक व्हिडिओ संदेश पोस्ट करून पंजाबच्या 23 जिल्ह्यांमध्ये आलेल्या पुरामुळे झालेले जीवित आणि मालमत्तेच्या नुकसानीबद्दल दुःख व्यक्त केले.

ते म्हणाले, “मी नागरी समाज, स्वयंसेवी संस्था (एनजीओ) आणि आमच्या तरुणांचे आभार मानतो, जे स्वतःच्या जीवाची पर्वा न करता लोकांची सेवा करत आहेत. ही ती पवित्र भूमी आहे जिथे बाबा नानक यांनी लंगरची प्रथा सुरू केली आणि आजही त्यांच्या कृपेने पंजाबच्या प्रत्येक गावात आणि गुरुद्वारात लंगर सुरू आहे.” चड्ढा यांनी सांगितले की, ते लवकरच पूरग्रस्त भागांचा दौरा करतील आणि त्यांनी केंद्र सरकारला अधिक मदत देण्याचे आवाहन केले आहे.

See more

दरम्यान, गायक आणि अभिनेता एमी विर्क स्वतः पंजाबमधील पूरग्रस्त भागात बचावकार्यासाठी उतरले होते आणि त्यांनी पाण्यात अडकलेल्या लोकांना मदत केली. दुसरीकडे, दिलजीत दोसांझने 10 गावे दत्तक घेतली आहेत. याव्यतिरिक्त, मिका सिंगची टीमही पंजाबमध्ये सक्रिय असून ती लोकांना मदत पोहोचवण्यासोबतच बचावकार्यातही सहभागी आहे.

हे देखील वाचा: Shah Rukh Khan On Punjab Flood: पंजाबमध्ये पुराचा कहर, शाहरुख खानची भावनिक प्रतिक्रिया; ‘पंजाबचे धैर्य कधीही तुटणार नाही…’

1998 नंतरचा सर्वात भीषण पूर

सध्या पंजाबमधील 23 जिल्हे पुरामुळे गंभीरपणे बाधित झाले आहेत. या पुरामध्ये आतापर्यंत 30 लोकांचा मृत्यू झाला आहे. 1998 नंतरचा हा सर्वात भीषण पूर मानला जात आहे. राज्यात सतत पाऊस पडत असल्याने परिस्थिती आणखी खराब होत आहे. प्रशासन मदत आणि बचाव कार्याला वेग देत आहे. राज्यात 7 सप्टेंबरपर्यंत शाळा-महाविद्यालये बंद ठेवण्यात आली आहेत.