ICC चे अध्यक्षपद भारताकडे येण्याची दाट शक्यता; जय शहा महत्त्वाच्या मिटींगसाठी कोलंबोला होणार रवाना

ICC Annual General Meeting : BCCI चे सचिव जय शाह हे लवकरच ICC चे अध्यक्ष होण्याची दाट शक्यता वर्तवली जात आहे. ICC ची वार्षिक सर्वसाधारण सभा कोलंबो येथे होणार आहे. यासाठी जय शहा लवकरच रवाना होऊ शकतात.

ICC Annual General Meeting : आंतरराष्ट्रीय क्रिकेट परिषदेची (ICC) वार्षिक सर्वसाधारण सभा (AGM) शुक्रवारी कोलंबो येथे होणार आहे. याबाबत भारतीय क्रिकेट नियामक मंडळाचे सचिव जय शाह लवकरच श्रीलंकेला रवाना होऊ शकतात. एजीएममध्ये अनेक महत्त्वाच्या मुद्द्यांवर चर्चा होणार आहे. यातील एक बाब नवीन अध्यक्षांबाबत असेल. वृत्तानुसार, जय शाह यांना आयसीसीचे पुढील अध्यक्ष बनवले जाऊ शकते. मात्र, याबाबत अद्यापि कोणतीही अधिकृत माहिती समोर आलेली नाही.

ICC चे अध्यक्षांचा कार्यकाळ संपत आलेला
आयसीसीचे अध्यक्षपद सध्या न्यूझीलंडचे ग्रेग बार्कले यांच्याकडे आहे. एका प्रसिद्ध वृत्तवाहिनीनुसार, जय शाह आयसीसीचे अध्यक्ष होणार हे जवळपास निश्चित झाले आहे. आयसीसीशी संबंधित एका सूत्राने या मुद्द्यावर सांगितले की, आता ते अध्यक्ष कधी होणार हा एकच प्रश्न आहे. बीसीसीआयचे सचिव म्हणून त्यांचे एक वर्ष बाकी आहे. यानंतर त्यांना विश्रांती मिळेल. भारतीय क्रिकेट नियामक मंडळाच्या नियमांनुसार त्याला कूलिंग ऑफ पीरियड असेल. 2025 मध्ये त्यांनी पदभार स्वीकारला तर डिसेंबर बार्कले त्यांची तिसरी टर्म पूर्ण करू शकणार नाहीत. त्यांचा कार्यकाळ डिसेंबर 2024 ते डिसेंबर 2026 असा राहणार आहे.

मिटींगमध्ये होणार अनेक मुद्द्यांवर चर्चा

नुकतेच यूएसए आणि वेस्ट इंडिजमध्ये T20 विश्वचषक 2024 चे आयोजन करण्यात आले होते. एका अहवालानुसार, या स्पर्धेतून आयसीसीला सुमारे 160 कोटी रुपयांचे नुकसान झाले आहे. त्यामुळे एजीएममध्येही यावर चर्चा होऊ शकते. हा बैठकीतील चर्चेचा सर्वात मोठा मुद्दा बनू शकतो. यासोबतच इतरही अनेक महत्त्वाच्या मुद्द्यांवर चर्चा होणार आहे.

चॅम्पियन्स ट्रॉफी 2025 पाकिस्तानमध्ये आयोजित केली जाणार आहे. या स्पर्धेसाठी टीम इंडिया पाकिस्तानला जाण्यास तयार नाही. हा मुद्दाही बैठकीत येऊ शकतो. रिपोर्ट्सनुसार, टीम इंडिया आपले सामने दुबई किंवा श्रीलंकेत खेळू शकते. त्यामुळे चॅम्पियन्स ट्रॉफीचे आयोजन हायब्रीड मॉडेलमध्ये करता येईल.