‘उद्धव ठाकरेंच्या आमदारांना अपात्र ठरवावे’, शिंदे गट पुन्हा हायकोर्टात, काय आहे प्रकरण?

राहुल नार्वेकर यांच्या निर्णयाविरोधात एकनाथ शिंदे गटाने उच्च न्यायालयात याचिका दाखल केली आहे. उद्धव गटाच्या आमदारांना अपात्र ठरवावे, अशी त्यांची मागणी आहे. या याचिकेवर आता हायकोर्टात 6 ऑगस्टला सुनावणी आहे.

शिवसेनेच्या आमदारांच्या अपात्रतेप्रकरणी शिंदे गटाने पुन्हा मुंबई उच्च न्यायालयात धाव घेतली आहे. त्यावर तातडीने सुनावणी घेण्याची मागणी त्यांनी केली आहे. भरत गोगावले यांनी याचिका दाखल केली असून त्यात त्यांनी विधानसभा अध्यक्ष राहुल नार्वेकर यांच्या निर्णयाला आव्हान दिले आहे, ज्यामध्ये ठाकरे गटाच्या आमदारांना अपात्र ठरवण्यात आले नाही. या प्रकरणाची आता ६ ऑगस्टपर्यंत सुनावणी पुढे ढकलण्यात आली आहे.

शिवसेनेत फूट पडल्यानंतर शिंदे आणि ठाकरे गटाने एकमेकांच्या आमदारांना अपात्र ठरवण्यासाठी याचिका दाखल केल्या होत्या. सप्टेंबर ते डिसेंबर 2023 पर्यंत चाललेल्या सुनावणीनंतर विधानसभा अध्यक्ष राहुल नार्वेकर यांनी 10 जानेवारी रोजी निकाल दिला होता, ज्यात शिंदे गटाच्या आमदारांना दिलासा देण्यात आला होता आणि ठाकरे गटाच्या आमदारांना अपात्र घोषित करण्यात आले नव्हते. या निर्णयाविरोधात आता भरत गोगावले यांनी मुंबई उच्च न्यायालयात याचिका दाखल केली असून आमदारांचा कार्यकाळ संपण्यापूर्वी सुनावणी घेण्याची मागणी केली आहे.

शिवसेना (उबाठा) गटाच्या वकिलांनी केला युक्तिवाद

उद्धव ठाकरे गटाचे वकील विनयकुमार खातू यांनी याचिकेवर तातडीने सुनावणी घेण्यावर आक्षेप घेत सात महिन्यांनंतर अचानक तातडीची सुनावणी का हवी, असा सवाल केला. न्यायमूर्ती अतुल चांदूरकर यांच्या अध्यक्षतेखालील खंडपीठाने या प्रकरणाची सुनावणी ६ ऑगस्ट रोजी ठेवली आहे. विधानसभा अध्यक्षांचा निर्णय मनमानी, बेकायदेशीर आणि घटनाबाह्य असून त्यांनी सादर केलेल्या पुराव्यांचा विचार केला नाही, असा आरोप याचिकेत करण्यात आला आहे. ठाकरे गटाच्या आमदारांनी स्वेच्छेने पक्ष सोडला होता, तो सभापतींनी विचारात घेतला नाही, असेही याचिकेत म्हटले आहे. काही महिन्यांपूर्वी महाराष्ट्र विधानसभेचे अध्यक्ष राहुल नार्वेकर यांनी त्यांच्या निर्णयात एकनाथ शिंदे गटालाच खरी शिवसेना म्हटले होते.