अनधिकृत राखी स्टॉल्सवर सामाजिक कार्यकर्त्याचा आक्षेप

सातारा : हुतात्मा चौक ते तहसीलदार कार्यालय या दरम्यान फुटपाथवर उभारलेल्या विनापरवाना स्टॉल्सला सामाजिक कार्यकर्ते जितेंद्र वाडकर यांनी शुक्रवारी आक्षेप घेतला. या संदर्भात त्यांनी मुख्याधिकारी अभिजीत बापट यांच्याकडे तक्रार केली आहे. साताऱ्यात करोना संक्रमणाने व्यावसायिकांची आर्थिक दृष्टया कंबर मोडली आहे. याचाच फायदा घेऊन अनधिकृत स्टॉल्सला परस्पर उभारून भाडे वसुलीचा धंदा फोफावला आहे. एसटी स्टॅंड परिसरातील फूटपाथवरच उभारण्यात आलेल्या स्टॉल्सवर माहिती अधिकार कार्यकर्ते जितेंद्र वाडकर यांनी आक्षेप घेतला. फुटपाथ उपलब्ध नसल्याने पादचाऱ्यांना रस्त्यावरुन चालावे लागते अशी तक्रार त्यांनी करत अनधिकृत स्टॉल्स हटविण्याची मागणी केली .

रक्षाबंधन सण हा अवघ्या आठ दिवसावर येऊन पोहोचला आहे . त्यामुळे राजवाडा , पोवई नाका, एसटी स्टँन्ड परिसर येथे राख्यांचे स्टॉल्स दिसून येत आहे . एका पाहणीनुसार शहरात ऐंशी पेक्षा अधिक स्टॉल्स उभारण्यात आले असून प्रत्यक्षात पालिकेच्या अतिक्रमण विभागाकडे केवळ सतरा स्टॉल्सची नोंदणी झाली आहे . हे नोंदणी शुल्क दिवसाला दीडशे रुपये आहे . ज्या स्टॉल्सने परवानगी घेतली नाही ते स्टॉल मुख्याधिकाऱ्यांच्या सूचनेप्रमाणे हटविण्याचे संकेत अतिक्रमण हटाव विभागाने दिले आहेत . मात्र हॉकर्स संघटनेचे सातारा शहराध्यक्ष संजय पवार यांनी स्टँन्ड परिसरात चार फूट अंतर सोडून आठ फूट लांबीचे उभारण्यात आलेले स्टॉल्स परवानगी घेऊनच उभारल्यचा दावा प्रसारमाध्यमांकडे केला .

स्टॉल्सचे तीन हजार लाटले कोणी?

सातारा एसटी स्टँन्ड परिसरात उभारलेल्या राखी स्टॉल्सचे आठ दिवसाचे भाडे तीन हजार रुपये असल्याची चर्चा आहे . हॉकर्स संघटनेने कितीही हात झटकले तरी या भागातील राजकीय धेंडांना मोठा हिस्सा गेल्याची कुणकुण आहे . त्यामुळे जागा पालिकेची अन् रूबाब तिसऱ्याचा अशी विचित्र अवस्था आहे . येथे व्यवसाय करायचा तर बिदागी द्यायची हा येथील दंडक आहे.