संध्याकाळच्या हलक्या भुकेसाठी घरी बनवा चटपटीत क्रिस्पी कॉर्न, अवघ्या 5 मिनिटांत तयार होईल रेसिपी

जर तुम्हाला संध्याकाळी हलकी हलकी भूक लागत असेल तर या भुकेला शमवण्यासाठी घरी क्रिस्पी कॉर्न बनवून पहा. हे कॉर्न चवीला चटपटीत आणि कुरकुरीत लागतात. मुख्य म्हणजे यांना बनवण्यासाठी अधिक साहित्य आणि वेळेची गरज भासत नाही, त्यामुळे फार कमी वेळेत ही रेसिपी बनून तयार होते.

सध्या पावसाळा ऋतू सुरु आहे. जवजवळ सर्वच ठिकाणी पावसाने आपली हजेरी दर्शवली आहे. या ऋतूत कुरकुरीत आणि चटपटीत खाण्याची इच्छा होत असते. तसेच संध्याकाळ झाली की आपल्याला हलकी हलकी भूक लागायला सुरुवात होते. अशात या हलक्या भुकेला शमवण्यासाठी काय बनवावे? असा प्रश्न पडतो. पावसाच्या या थंड वातावरणात तुम्ही क्रिस्पी आणि चटपटीत अशा कॉर्नची रेसिपी ट्राय करू शकता.

पावसाळ्यात जवळपास सर्वच ठिकाणी कॉर्न म्हणजेच मका विक्रीसाठी येत असतो. त्यामुळे बाजारात तुम्हाला तो सहज वाजवी दरात उपलब्ध होतो. क्रिस्पी कॉर्न ही रेसिपी काही नवीन नाही अनेक हॉटेल्समध्ये ती उपलब्ध असते. मात्र तुम्ही अजूनही या रेसिपीचा आस्वाद घेतला नसेल तर तुम्ही फार अप्रतिम गोष्ट मिस करत आहात. कुरकुरीत कॉर्न, हातात चहाचा प्याला आणि समोर पाऊस… स्वर्गसुख म्हणजे मग आणखीन काय! हे कॉम्बिनेशन एकदा तर ट्राय करणे बनतेच. तुम्हीही आजवर या पदार्थाचा आस्वाद घेतला नसेल तर आजची ही रेसिपी लगेच फॉलो करा आणि घरी सर्वांना खाऊ घाला.

हेदेखील वाचा – जेवणाची रंगत वाढवेल चटकदार पांढऱ्या कांद्याचे लोणचे, त्वरित रेसिपी नोट करा

साहित्य

• 2 कप फ्रोजन स्वीट कॉर्न
• 1/4 कप कॉर्न फ्लोअर
• 2 चमचे तांदळाचे पीठ
• 1/2 टीस्पून काळी मिरी पावडर
• आवश्यकतेनुसार मीठ
• 1/2 टीस्पून लाल मिरची पावडर
• 1/2 टीस्पून आमचूर पावडर
• 1 चमचे लिंबाचा रस
• 1 कप तेल

हेदेखील वाचा – शिळ्या चपातीपासून झटपट बनवा मसाला पोळी, सकाळच्या नाश्त्यासाठी उत्तम रेसिपी

कृती

• क्रिस्पी कॉर्न बनवण्यासाठी सर्वप्रथम मक्याचे दाणे वेगळे करा
• आता हे मक्याचे दाणे एका भांड्यात टाका, यात पाणी टाका आणि 2 मिनिटे कॉर्न शिजवून घ्या
• यानंतर जास्तीचे पाणी काढून कॉर्न गाळून घ्या
• आता एका भांड्यात हे कॉर्न टाका आणि त्यात तांदळाचे पीठ आणि कॉर्न फ्लोअर घालून मिक्स करा
• आता थोडे मीठ आणि काळी मिरी पावडर घाला आणि मिक्स करा
• सर्व साहित्य नीट कॉर्नला कोट करून घ्या
• आता हे चाळणीत टाकून यातील अतिरिक्त पीठ काढून घ्या
• आता गॅसवर कढई ठेवा आणि यात तेल टाका
• तेल चांगले गरम झाले की यात तयार कोट केलेले कॉर्न टाका
• हे कॉर्न मध्यम आचेवर सोनेरी रंग येईपर्यंत चांगले तळून घ्या
• आता हे तळलेले कॉर्न एका भांड्यात काढा
• यानंतर यात तिखट, आमचूर पावडर, मीठ आणि लिंबाचा रस घाला आणि व्यवस्थित मिक्स करा
• अशाप्रकारे तुमचे क्रिस्पी कॉर्न तयार होतील