Mahashivratri 2025: रबरासारखी चिकट बनतेय साबुदाणा खिचडी? मग या टिप्स फॉलो करा; खिचडी बनेल मोकळी अन् चविष्ट

Khichdi Tips: शिवरात्रीनिमित्त तुम्हीही खिचडीचा बेत आखला असेल पण नेहमी खिचडी चिकट बनत असेल तर आजच यासाठीच्या काही सोप्या टिप्स फॉलो करा. या टिप्सच्या मदतीने तुम्ही झटपट मोकळी आणि चविष्ट अशी खिचडी बनवू शकता.

यंदा 26 फेब्रुवारी रोजी देशभर महाशिवरात्रीचा उत्सव साजरा केला जाणार आहे. हा दिवस संपूर्णपणे भगवान शिवाला समर्पित केला जातो. या दिवशी लोक व्रत-वैकल्य करत भगवान शिवाची पूजा करतात. याकाळात भगवान शिव पृथ्वीवर येऊन भाविकांना आशीर्वाद देतात अशी मान्यता आहे. अशात देशभरातील भाविक यादिवशी मनोभावनेने उपवास करतात आणि शिवाचे नाम जपतात. तुम्ही शिवभक्त असाल तर यावेळी उपवास करत असाल तर आजची ही बातमी तुमच्या फायद्याची ठरू शकते.

उपवास म्हटलं की, अनेक पदार्थ खाणे हे वर्ज्य असते. काही निवडक पदार्थ उपवासाला खाल्ले जातात. यातील उपवासाचा लोकप्रिय पदार्थ म्हणजे साबुदाण्याची खिचडी. हा उपवासाचा पदार्थ असला तरी चवीला तो फार अप्रतिम लागतो ज्यामुळे अनेकजण हा पदार्थ उपवासाच्या दिवशी आवर्जून बनवतात. मात्र अनेकांना ही खिचडी हवी तशी बनवता येत नाही. साबुदाण्याची खिचडी ही बनवायला सोपी असली तरी त्यासाठी आधीच साबुदाणे काही तास भिजत ठेवावे लागतात. अशात हे कमी भिजले किंवा जास्त भिजले तरी खिचडीची चव पूर्णपणे बिघडते. अनेकजण रात्रभर साबुदाणे भिजवतात आणि सकाळी याची खिचडी बनवू पाहतात पण यात पाणी अधिक झाले की याची खिचडी चिकट आणि वातड होते जी खायला अजिबात चांगली लागत नाही. परफेक्ट साबुदाणा खिचडीसाठी आज आमही तुम्हाला काही टिप्स सांगणार आहोत याच्या मदतीने तुम्ही एकदम परफेक्ट मोकळी आणि चविष्ट अशी साबुदाणा खिचडी तयार करू शकता.

साधं पण चवदार असं काही खायचंय? मग सोप्या पद्धतीने घरी बनवा सिंधी स्टाइल दाल पकवान

साबुदाणा खिचडी बनवताना फॉलो करा या टिप्स

• यासाठी प्रथम साबुदाणे पाण्याने दोन-तीन वेळा चांगले धुवून घ्या
• यानंतर साबुदाणे पाण्यात बुडतील इतके पाणी त्यात घाला
• अर्ध्या तासाने यातील अतिरिक्त पाणी काढा आणि झाकण ठेवून ते 3-4 तास बाजूला ठेवून द्या
  अधिक पाणी साबुदाण्यांना चिकट बनवेल त्यामुळे त्यात ओलावा राहील इतकेच पाणी घाला
• साबुदाणे भिजले की नाही हे तपासण्यासाठी एक साबुदाणा हाताने दाबून पहा तो मऊ असेल तर तुमचे साबुदाणे भिजले आहेत
• साबुदाणा खिचडी कधीही मंद आचेवर झाकण ठेवून वाफेवर शिजवावी

साहित्य

• 1 कप साबुदाणा
• ½ कप शेंगदाण्याची कूट
• 2 मध्यम बटाटे
• 2-3 हिरव्या मिरच्या
• चवीनुसार मीठ
• तेल

Weekend Special Recipe: चिकन ठेचा कधी खाल्ला आहे का? झणझणीत रेसिपी होत आहे Viral

कृती

• साबुदाणा खिचडी बनवण्यासाठी सर्वप्रथम कढईत मंद आचेवर शेंगदाणे भाजून घ्या आणि मग मिक्सरमध्ये त्यांचा कूट करा
• त्यांनतर मिक्सरमध्ये हिरव्या मिरचीची पेस्ट बनवा, तुम्हाला हवे असल्यास तुम्ही हिरव्या मिरच्या कापूनही यात घालू शकता
• बटाटे धुवून त्यांची साल काढा आणि मग याचे काप करा
• सर्व साहित्य तयार झाले की मग आता गॅसवर एक कढई ठेवा आणि यात तेल टाका
• तेल गरम झाले की यात बटाट्याचे काप टाका आणि मंद आचेवर दोन-तीन मिनिटे परता
• यानंतर यात मिरचीचे तुकडे अथवा पेस्ट टाका आणि पुन्हा काही मिनिटे परता
• शेवटी यात भिजवलेला साबुदाणा आणि शेंगदाण्याचा कूट घाला आणि चांगले मिक्स करा
• वरून झाकण ठेवा आणि मंद आचेवर खिचडी 5-6 मिनिटे शिजवा
• झाकण उघडून खिचडी व्यवस्थित हलवा आणि गॅस बंद करा
• गरमा गरम खिचडी खाण्यासाठी सर्व्ह करा
• तुम्हाला हवे असल्यास तुम्ही यावर लिंबाचा रस देखील घालू शकता