Independence Day 2026 : १५ ऑगस्ट स्पेशल घरी बनवा ‘तिरंगा कपकेक’, चवीसह लूकही आकर्षित

Tiranga Cupcake Recipe : स्वातंत्र्यदिनाचा दिवस फार वेगवेगळ्या प्रकारे साजरा केला जातो. हा भारताचा सण म्हटलं तरी वावगं ठरणार नाही. दिवसाचा गोडवा वाढवण्यासाठी तुम्ही १५ ऑगस्टला घरी तिरंगा कपकेक म्हणजे तीन रंगी कपकेक तयार करु शकता.

१५ ऑगस्टचा दिवस म्हणजे देशभक्तीची भावना जागवणारा खास दिवस. या दिवशी घरच्या घरी काहीतरी वेगळे आणि आकर्षक बनवायचे असेल, तर तिरंगा कपकेक हा उत्तम पर्याय ठरू शकतो. केशरी, पांढरा आणि हिरवा अशा तीन रंगांमध्ये तयार केलेले हे कपकेक दिसायला सुंदर तर असतातच, शिवाय मुलांपासून मोठ्यांपर्यंत सर्वांनाच आवडतात.

उपवासाच्या ताटाची वाढेल भन्नाट चव! दुपारच्या जेवणासाठी झटपट बनवा पौष्टिक दही बटाटा, नोट करा रेसिपी

स्वातंत्र्यदिनाच्या छोट्या घरगुती सेलिब्रेशनसाठी, शाळेतील कार्यक्रमासाठी किंवा पाहुण्यांना देण्यासाठी ही रेसिपी सहज करता येते. साध्या कपकेकच्या मिश्रणाला तीन भागांत विभागून त्यात नैसर्गिक रंग किंवा फूड कलरचा वापर केल्यास सुंदर तिरंगा रंग मिळतो. कमी वेळात तयार होणारी ही रेसिपी तुमच्या स्वातंत्र्यदिनाच्या मेनूमध्ये खास आकर्षण ठरू शकते.

साहित्य

• मैदा – १ कप
• पिठीसाखर – अर्धा कप
• बटर – अर्धा कप
• दूध – अर्धा कप
• बेकिंग पावडर – १ चमचा
• बेकिंग सोडा – पाव चमचा
• व्हॅनिला इसेन्स – १ चमचा
• केशरी आणि हिरवा फूड कलर – आवश्यकतेनुसार
• दही – २ मोठे चमचे

Independence Day 2026 : स्वातंत्र्यदिनाचा गोडवा वाढवा, घरी बनवा ‘तिरंगा बर्फी’, निवडक साहित्यांची लागेल गरज

कृती

• एका भांड्यात बटर आणि पिठीसाखर घेऊन मिश्रण हलके आणि मऊ होईपर्यंत फेटून घ्या. त्यात दही आणि व्हॅनिला इसेन्स घालून पुन्हा व्यवस्थित मिसळा.
• मैदा, बेकिंग पावडर आणि बेकिंग सोडा चाळून घ्या. हे मिश्रण थोडे थोडे करून बटरच्या मिश्रणात घाला. त्यात दूध घालून गुठळ्या राहणार नाहीत अशा पद्धतीने हलकेच मिसळा.
• तयार मिश्रण तीन समान भागांत विभागा. एका भागात केशरी रंग आणि दुसऱ्या भागात हिरवा रंग मिसळा. तिसरा भाग पांढराच ठेवा.
• कपकेकच्या मोल्डमध्ये आधी केशरी बॅटरचा थर, त्यावर पांढरा बॅटर आणि शेवटी हिरवा बॅटर अशा क्रमाने घाला. मोल्ड पूर्ण भरू नका; बेक होताना कपकेक फुगण्यासाठी थोडी जागा ठेवा.
• ओव्हन आधीच गरम करून घ्या. कपकेक साधारण १७० ते १८० अंश सेल्सिअस तापमानावर १८ ते २२ मिनिटे बेक करा. कपकेकच्या मध्यभागी टूथपिक टोचून पाहा. ती स्वच्छ बाहेर आली तर कपकेक तयार आहेत.
• बेक झालेले कपकेक ओव्हनमधून बाहेर काढून पूर्णपणे थंड होऊ द्या. गरम असताना मोल्डमधून काढल्यास कपकेक तुटण्याची शक्यता असते.
• थंड झालेल्या तिरंगा कपकेकवर व्हॅनिला फ्रॉस्टिंग, नारळाचा किस किंवा हलकी क्रीम सजावट करू शकता. स्वातंत्र्यदिनाच्या खास प्रसंगी हे कपकेक सर्व्ह करा.