5 मिनिटांत बनवा हटके आणि हेल्दी ‘ढोकळा चाट’; पारंपारिक स्वादाला झणझणीत ट्विस्ट

Dhokla Chaat Recipe : झणझणीत, गोडसर आणि खमंग अशा चवांचा अनोखा संगम म्हणजे ढोकळा चाट! उरलेल्या ढोकळ्याला द्या चवदार ट्विस्ट आणि तयार करा हटके स्नॅक, सोपा, झटपट आणि भन्नाट!

गुजराती पदार्थ म्हटलं की सर्वात आधी आठवतो तो म्हणजे ढोकळा! हलकाफुलका, थोडासा आंबटगोड आणि अगदी पोटाला न पडणारा – म्हणूनच तो सर्व वयोगटांमध्ये लोकप्रिय आहे. मात्र, तुम्ही नेहमीचाच ढोकळा खाऊन कंटाळला असाल, तर आज काहीतरी वेगळं करून पाहा – ढोकळा चाट! ढोकळा चाट ही एक फ्युजन डिश आहे जी पारंपरिक ढोकळ्याला उत्तर भारतीय चाटच्या झणझणीत स्वादात मिसळते. यामध्ये खमंग ढोकळा, चवदार चटण्या, दही, शेव आणि मसाले यांच्या अफलातून संगमातून एक अशी डिश तयार होते की जी खाल्ल्यावर पुन्हा पुन्हा खावीशी वाटते. कोणतंही पार्टी असो, अचानक आलेले पाहुणे असो किंवा संध्याकाळची भूक, ढोकळा चाट हे एक झटपट बनणारं आणि सगळ्यांना आवडणारं व्यंजन आहे. चला तर मग, जाणून घेऊया ही चविष्ट आणि हटके रेसिपी!

दिवाळीत सकाळच्या नाश्त्यासाठी सोप्या पद्धतीमध्ये बनवा हेल्दी टेस्टी पनीर टोस्ट, नोट करून घ्या रेसिपी

साहित्य:

• ६–८ पीस तयार केलेला ढोकळा (घरीचा किंवा बाजारातून आणलेला)
• १/२ कप गोड दही (फेटून घेतलेले)
• २ टेबलस्पून हिरवी चटणी (कोथिंबीर-हिरव्या मिरचीची)
• २ टेबलस्पून खजूर-इमलीची गोड चटणी
• १ मध्यम कांदा (बारीक चिरलेला)
• १ मध्यम टोमॅटो (बारीक चिरलेला)
• १-२ टेबलस्पून बारीक शेव
• थोडीशी कोथिंबीर (सजावटीसाठी)
• चवीनुसार काळे मीठ, चाट मसाला, लाल तिखट
• लिंबाचा रस – १ टेबलस्पून

थंडगार, गोड-तिखट अन् कुरकुरीत चवीची ‘दही कचोरी’ आता बनवता येईल घरीच, सोपी रेसिपी नोट करा

कृती

• ढोकळा चाट तयार करण्यासाठी सर्वप्रथम ढोकळा तुकडे करा: तयार ढोकळ्याचे मध्यम आकाराचे तुकडे करून हलकं कुरकुरीत होईपर्यंत तव्यावर थोडं तेल घालून शेकून घ्या.
• सर्व्हिंग प्लेटमध्ये गरमागरम ढोकळ्याचे तुकडे मांडून त्यावर गोड दही पसरा.
• त्यावर हिरवी चटणी आणि खजूर-इमलीची चटणी घालून सर्व मिश्रण हलकं मिसळा.
• चिरलेला कांदा आणि टोमॅटो घाला.
• चवीनुसार काळं मीठ, चाट मसाला, थोडंसं तिखट आणि लिंबाचा रस पसरवा.
• वरून शेव आणि बारीक चिरलेली कोथिंबीर घालून चाटला रंगत आणा.
• दही थोडं गार असेल तर चाट जास्त टेस्टी लागते.
• मुलांसाठी थोडं कमी तिखट ठेवायला विसरू नका.

पारंपरिक ढोकळ्याला दिलेला हा चाट ट्विस्ट अगदी “एकदम झकास!” आहे. झणझणीत चव, कुरकुरीतपणा आणि गोडसरपणा – एकाच वेळेस इतकी विविध चव अनुभवल्यावर कुणालाही ही रेसिपी विसरता येणार नाही. म्हणूनच, पुढच्या वेळी ढोकळा उरला, तर त्याचं काय करायचं हे तुम्हाला माहित आहे – बनवा धमाल ढोकळा चाट!