Navratri 2025 : व्रतावेळी काही टेस्टी खायची इच्छा होतेय? मग घरी बनवा कुरकुरीत उपवासाची भजी

Upvas Crispy Bhaji Recipe : नवरात्रीत अनेकजण नऊ दिवस उपवास करतात. अनेकदा उपवासाची तेच तेच पदार्थ खाऊन कंटाळा येतो. अशावेळी तुम्ही घरीच कुरकुरीत अन् चविष्ट असे उपवासाचे भजी घरी बनवू शकता.

उपवास म्हणजे फक्त धार्मिक विधी नसून शरीराला शुद्ध करण्याची एक सुंदर पद्धत आहे. आपल्या भारतीय संस्कृतीत उपवासाला खूप महत्त्व आहे. नवरात्री, एकादशी, महाशिवरात्री किंवा इतर धार्मिक प्रसंगी उपवास केला जातो. अशा वेळी खाण्याच्या पदार्थांमध्ये थोडे वेगळेपण असते. तांदूळ, गहू किंवा इतर धान्यांचे पदार्थ टाळले जातात आणि त्याऐवजी साबुदाणा, राजगिरा, शेंगदाणे, बटाटा इत्यादींचा वापर करून उपवासाचे खास पदार्थ तयार केले जातात.

वांग खायला आवडत नाही? मग ‘या’ पद्धतीने बनवा चविष्ट मसालेदार वांग्याची भाजी, चवीला लागेल मस्त

उपवासाचे पदार्थ म्हटले की लगेचच डोळ्यासमोर येतात ते म्हणजे साबुदाणा खिचडी, उपवासाचे थालिपीठ, फराळाची बटाट्याची भाजी किंवा मग कुरकुरीत भजी. भजी हा पदार्थ कोणत्याही उपवासाचा खास आकर्षण असतो. पावसाळ्यातल्या पावसाबरोबर खाल्ली जाणारी भजी जशी चविष्ट लागतात, तशीच उपवासातील भजीदेखील हलक्या-फुलक्या आणि कुरकुरीत लागतात. आज आपण बघणार आहोत उपवासाची कुरकुरीत भजी रेसिपी जी झटपट होते आणि उपवासात खाण्यासाठी एकदम परफेक्ट आहे.

साहित्य

• २ उकडलेले बटाटे (किसून घ्यावे)
• ½ कप साबुदाणा पीठ किंवा राजगिरा पीठ
• ¼ कप शेंगदाणे कूट
• २ हिरव्या मिरच्या (बारीक चिरलेल्या)
• ½ टीस्पून जिरे
• मीठ (उपवासाचे) चवीनुसार
• थोडी कोथिंबीर (ऐच्छिक)
• तेल तळण्यासाठी

Navratri 2025 : नवरात्रीचा उपवास केलाय का? मग आता घरीच बनवा कुरकुरीत बटाट्याचे चिप्स; फारच सोपी आहे रेसिपी

कृती

• यासाठी सर्वप्रथम उकडलेले बटाटे किसून घ्यावेत आणि एका परातीत काढावेत.
• त्यात साबुदाणा पीठ किंवा राजगिरा पीठ घालावे.
• नंतर त्यात शेंगदाणे कूट, हिरव्या मिरच्या, जिरे आणि मीठ टाकावे.
• थोडेसे पाणी घालून घट्टसर मिश्रण तयार करावे. मिश्रण खूप पातळ करू नये.
• आता कढईत तेल गरम करून घ्यावे.
• हाताने किंवा चमच्याने छोटे गोळे करून गरम तेलात सोडावेत.
• सोनेरी व कुरकुरीत होईपर्यंत भजी तळून घ्यावीत आणि टिश्यू पेपरवर काढून गरमागरम सर्व्ह करावीत.
• ही कुरकुरीत भजी तुम्ही दही किंवा हिरवी चटणीसोबत खाऊ शकता.
• उपवासात झटपट होणारा आणि चविष्ट लागणारा हा पदार्थ तुम्ही नक्की करून बघा.