Weight Loss साठी मेथीचं पाणी पिताय का? व्हा सावध नाहीतर होतील गंभीर परिणाम

Methi Side Effects: मेथीचे जास्त प्रमाणात सेवन करू नये. याच्या अतिसेवनामुळे तुम्हाला आरोग्याशी संबंधित अनेक समस्यांना सामोरे जावे लागू शकते. मेथीचे सेवन पचनासाठी उत्तम असते, पण त्याचे जास्त सेवन करणे चुकीचे ठरू शकते. मेथीमुळे नक्की कसे दुष्परिणाम होतात आणि त्याचा कुठे वापर करू नये ते जाणून घ्या.

मेथीचा वापर प्रत्येक भारतीय स्वयंपाकघरात केला जातो. बहुतेक लोक वजन कमी करण्यासाठी सकाळी उपाशीपोटी मेथी दाण्याचे पाणी पितात. त्याचे जितके फायदे आहेत तितकेच तोटेदेखील आहेत आणि आपल्या दैनंदिन दिनचर्येत कोणत्याही गोष्टीचा समावेश करण्यासाठी आपल्याला त्याचे तोटे माहीत असणे आवश्यक आहे. सर्वात महत्त्वाचे म्हणजे मेथी किती खावी हे प्रत्येकाला माहीत असायला हवे. 

मेथी किती खावी आणि याचा शरीरावर काय वाईट परिणाम होतो यावर अनेक ठिकाणी अभ्यास करण्यात आला आहे आणि याच अभ्यासाचा संदर्भ घेत आम्ही तुम्हाला या लेखातून मेथीचे तोटे सांगणार आहोत. (फोटो सौजन्य – iStock) 

मेथीच्या अतिसेवनाचे तोटे 

WebMD द्वारे प्रकाशित केलेल्या संशोधनात म्हटले आहे की मेथीचे जास्त सेवन करू नये. याच्या अतिसेवनामुळे तुम्हाला आरोग्याशी संबंधित अनेक समस्यांना सामोरे जावे लागू शकते. याच्या अतिसेवनामुळे अतिसार, पोटाचे आजार, फुगणे आणि गॅस होऊ शकतो. 

नॅशनल इन्स्टिटय़ूट ऑफ हेल्थ (NIH) च्या मते, मेथीचे सेवन पचनासाठी उत्तम आहे, परंतु ते जास्त प्रमाणात सेवन करणे चुकीचे ठरू शकते. याशिवाय मेथीमुळे साखरेची पातळीही नियंत्रित राहते, मात्र जास्त प्रमाणात सेवन केल्याने साखरेची पातळी झपाट्याने घसरते. 

साखरेवर नियंत्रण ठेवताना घ्यावी काळजी 

जर तुम्ही साखरेवर नियंत्रण ठेवण्यासाठी औषधे घेत असाल तर तुम्ही मेथीचे अतिसेवन टाळावे. कमी साखरेची पातळी देखील खूप धोकादायक ठरू शकते. त्यामुळे या गोष्टींकडे लक्ष द्या. केवळ साखरच नाही तर ती रक्तदाबाच्या रुग्णांसाठीही धोकादायक ठरू शकते. मेथीच्या पानांमध्ये सोडियमचे प्रमाण कमी असते. मेथीचे जास्त सेवन केल्याने सोडियमची पातळी कमी होऊ शकते, ज्यामुळे उच्च रक्तदाब होऊ शकतो. जर तुम्ही उच्च रक्तदाबाचे रुग्ण असाल तर तुम्ही मेथीचे सेवन थोडे कमी करावे.

श्वसनाचा त्रास 

याशिवाय मेथीच्या अतिसेवनामुळे श्वसनाचा त्रास होऊ शकतो. त्याचे अँटी-ऑक्सिडंट आणि अँटी-इंफ्लेमेटरी गुणधर्म फुफ्फुसांना नुकसान होण्यापासून वाचवू शकतात. याचा जास्त वापर केल्यास श्वास घेण्यास त्रास होऊ शकतो. 

महिलांसाठी त्रासदायक 

मेथीच्या गरम स्वभावामुळे गरोदर महिलांनीही त्याचे सेवन टाळावे. ज्या महिलांना मूल व्हायचे आहे त्यांनीही ते टाळावे. याच्या अतिसेवनाने गर्भधारणा होण्यास उशीर होतो. याशिवाय, यामुळे जन्मजात दोषदेखील होऊ शकतात.