Anjali Damania : ‘हे घ्या धनंजय मुंडे अन् वाल्मिक कराड यांचे पुरावे’; दमानियांनी शेअर केले मुंडेंचे हातात पिस्तुल घेतलेले Video

बीडमध्ये सरपंच संतोष देशमुख यांची काही दिवसांपूर्वी निर्घृणपणे हत्या करण्यात आली आहे. या प्रकरणावरून गेल्या दोन ते तीन दिवसांपासून सामाजिक कार्यकर्त्या अंजली दमानिया पोस्ट शेअर करत आहेत.

बीडमध्ये सरपंच संतोष देशमुख यांची काही दिवसांपूर्वी निर्घृणपणे हत्या करण्यात आली आहे. या प्रकरणावरून सध्या राजकारणही तापलं आहे. त्यात गेल्या दोन ते तीन दिवसांपासून सामाजिक कार्यकर्त्या अंजली दमानिया बीडच्या मस्साजोगमधील सरपंच हत्या प्रकरणावरून सातत्याने पोस्ट करत आहेत. या पोस्टमध्ये वाल्मिक कराड आणि मंत्री धनंजय मुंडे यांचे संबंध असल्याचा आरोप सातत्याने करत आहेत. दोन दिवसांपूर्वीच त्यांनी धनंजय मुंडे आणि वाल्मिक कराड यांची एका जमिनीवर सयुक्त मालकी असल्याची कागदपत्र शेअर केली होती. तर आज धनंजय मुंडेंच्या हातात पिस्तुल असल्याचे व्हिडिओ शेअर केला आहे, त्यामुळे खळबळ माजली आहे.

See more

हे असले बॉस ? इनेटाग्राम वर अशी reels दाखवल्यावर नवी पिढी ह्यातून काय प्रेरणा घेणार ? कष्ट न करता पिस्तुल दाखवून पैसे कमावणे सोपे असेच त्यांना वाटते. आपला देश असा असणार आहे का ? हे देशाबद्दल vision असणार आहे का ? ताबडतोब बीड मधील सगळ्या शास्त्र परवान्यांवर चौकशी लावा. गरज… pic.twitter.com/bQGa71D79D — Mrs Anjali Damania (@anjali_damania) December 26, 2024

संतोष देशमुख हत्या प्रकरणाचे विधिमंडळ अधिवेशनात पडसाद उमटले. गुन्हेगारांना कठोर शिक्षा केली जाईल, असं आश्वासन मुख्यमंत्री देवेंद्र फडणवीस यांनी दिलं आहे. मात्र, या प्रकरणातील वाल्मिक कराड याला मंत्री धनंजय मुंडे यांचं संरक्षण असल्याचा गंभीर आरोप विरोधकांकडून केला जात आहे. असाच दावा अंजली दमानिया यांनीही केला असून धनंजय मुंडेंचे वाल्मिक कराडशी व्यावसायिक संबंध असल्याचा दावा त्यांनी केला आहे.

See more

धनंजय मुंडे आणि वाल्मिक कराड यांची एकत्र जमीन ! हे घ्या धनंजय मुंडे आणि वाल्मिक कराड यांच्यातील आर्थिक सख्य किती आहे याचे धडधडीत पुरावे. कंपनी एकत्र, जमीन एकत्र जगमित्र शुगर्स चे ६ सातबारे मी डिजिटली डाउनलोड केले ३५५४ गुंठे जमीन (८८ एकर ३४ गुंठे) pic.twitter.com/afpORBwTRh — Mrs Anjali Damania (@anjali_damania) December 23, 2024

अंजली दमानिया यांनी २३ डिसेंबर रोजी आपल्या एक्स अकाऊंटवर या संपूर्ण प्रकरणाबाबत मोठा दावा करणारी काही कागदपत्र शेअर केली आहेत. त्यात जगमित्र शुगर्सचे ६ सातबारे असून त्यात धनंजय मुंडे व वाल्मिक कराड यांची संयुक्त मालकी असल्याचा दावा करण्यात आला आहे. त्यांनी शेअर केलेल्या सातबाऱ्यांमध्येही इतर काही नावांसोबत धनंजय मुंडे आणि वाल्मिक कराड यांचीही आहेत.

त्यानंतर आज अंजली दमानिया यांनी पुन्हा एक्स अकाऊंटवरून आणखी एक पोस्ट शेअर केली आहे. या पोस्टमध्ये दोन इन्स्टाग्राम रील आहेत. मंत्री धनंजय मुंडे यांचा हातात पिस्तुल असलेला एक फोटो एका रीलमध्ये आहे. दुसऱ्या रीलमध्ये धनंजय मुंडे एका कारमध्ये बसल्याचं दिसत आहे.

“हे असले बॉस? इन्स्टाग्रामवर अशा रील्स दाखवल्यावर नवी पिढी यातून काय प्रेरणा घेणार? कष्ट न करता पिस्तुल दाखवून पैसे कमावणं सोपं असंच त्यांना वाटतं. आपला देश असा असणार आहे का? देशाबद्दल हे व्हिजन असणार आहे का? ताबडतोब बीडमधील सगळ्या शस्त्र परवान्यांची चौकशी लावा. गरजेचे नसलेले परवाने रद्द करा”, अंजली दमानिया, सामाजिक कार्यकर्त्या