शनिवार, 24 ऑक्टोबर 2026
दगडूशेठ हलवाई गणपती समोर अथर्वशीर्ष पठन करण्यात आले (फोटो - टीम नवराष्ट्र)
Dagdusheth Halwai Ganpati Atharvashirsha : पुणे : पुण्यातील लोकप्रिय असा दगडूशेठ हलवाई गणपती हा पद्मनाभ मंदिराच्या प्रतिकृतीमध्ये विराजमान झाला आहे. पहिल्याच दिवशी लाखो भाविकांनी दगडूशेठ हलवाई गणपतीचे दर्शन घेतले. गणेशोत्सवाच्या दुसऱ्या दिवसाची सुरुवात ही मंत्रोमुग्धतेने झाली आहे. ‘दगडूशेठ’ गणपती बाप्पासमोर ३५ हजार महिलांचे अथर्वशीर्ष पठण व महाआरती केली. श्रीमंत दगडूशेठ हलवाई सार्वजनिक गणपती ट्रस्टतर्फे आयोजन करण्यात आले होते. ॠषीपंचमीनिमित्त पहाटे स्त्री शक्तीचा जागर दिसून आला.
ओम गं गणपतये नमः आणि मोरया, मोरया… च्या जयघोषाने तब्बल ३५ हजार महिलांनी एकत्र येत अथर्वशीर्ष पठणातून गणरायाला नमन केले. गणेश नामाचा जयघोष करीत ॠषीपंचमीनिमित्त आयोजित सोहळ्यात उर्जेने भारलेल्या वातावरणामध्ये हजारो महिलांचा उत्साह पहायला मिळाला. अथर्वशीर्षासोबत महाआरती आणि गणरायाचा गजर करण्यात आला. या सोहळ्यामध्ये खासदार सुनेत्रा पवार यांची खास उपस्थिती होती. सुनेत्रा पवार यांनी अथर्वशीर्ष पठन करत भक्तीमय वातावरणाची अनुभूती घेतली.
पुण्यामध्ये पावसाच्या हलक्या सरी बरसत आहेत. तरी देखील महिलांचा मोठ्या उत्साह दिसून आला. पाऊस असला तरी पारंपरिक वेशात मध्यरात्री २ वाजल्यापासून महिलांनी या उपक्रमाकरीता हजेरी लावण्यास सुरुवात केली. अथर्वशीर्ष पठनाच्या उपक्रमाचे यंदा ४० वे वर्ष होते.
राजकीय बातम्या वाचण्यासाठी क्लिक करा
कार्यक्रमाच्या सुरुवातीला महिलांनी शंखनाद केल्यानंतर सोहळ्याला प्रारंभ झाला. त्यानंतर मन शांत करणारा ओंकार जप, गजानना गजानना मंगलमूर्ती गजानना या गणेशगीताच्या सादरीकरणाने वातावरण मंत्रमुग्ध झाले. महिलांनी मुख्य अथर्वशीर्ष पठण करीत गणरायाला नमन केले. मोरया मोरया दगडूशेठ मोरया… असा गणेश नामाचा गजर करताना प्रत्येक महिलेच्या चेह-यावरील उत्साह ओसंडून वाहत होता. दगडूशेठच्या उत्सव मंडपापासून ते नाना वाड्यापर्यंतच्या परिसरात महिलांनी अथर्वशीर्ष पठणाकरीता गर्दी केली. भक्तीरसात तल्लीन झालेल्या वातावरणात कार्यक्रमाची सांगता आरतीने झाली. महिला हात उंचावून टाळ्यांचा गजर करीत गणरायाला नमन करीत होत्या.
महाराष्ट्रसंबंधित बातम्या वाचण्यासाठी क्लिक करा
या सोहळ्यामध्ये खासदार सुनेत्रा पवार सहभागी झाल्या होत्या. त्या म्हणाल्या की, ” केवळ महाराष्ट्रातूनच नव्हे भारतासह विविध ठिकाणांहून महिला मोठ्या संख्येने या उपक्रमासाठी आल्या आहेत. गणेशाचरणी लीन होत असताना बाप्पाच्या आशीर्वादाने सगळ्यांना आरोग्य, प्रगती आणि भरभराटीचे हे वर्ष जावो, अशी प्रार्थना खासदार सुनेत्रा पवार यांनी केली.
परदेशी अभिनेत्री पठणासाठी उपस्थित
पुण्याचा गणेशोत्सव आणि श्रीमंत दगडूशेठ हलवाई गणपतीची ख्याती केवळ भारतातच नाही, तर संपूर्ण जगात आहे. त्यामुळे दगडूशेठ गणपतीचे दर्शन घेण्यासोबतच अथर्वशीर्ष पठणाच्या सोहळ्याला ऍना मारा या इटली येथील अभिनेत्रीने देखील हजेरी लावत सहभाग घेतला. पुण्यामध्ये गणेशोत्सवाच्या निमित्ताने मोठा उत्साह दिसून येत आहे. मानाच्या गणपतींना देखील भाविकांनी पहिल्याच दिवशी दर्शनाला मोठी गर्दी केली आहे.
