उपमुख्यमंत्री अजित पवार तुकाराम महाराजांच्या पालखीमध्ये सामील
बारामती: उपमुख्यमंत्री तथा जिल्ह्याचे पालकमंत्री अजित पवार यांनी सपत्नीक बारामती येथे पालखी सोहळ्याला भेट दिली. यावेळी जगद्गुरू श्री संत तुकाराम महाराजांच्या पादुकांचे दर्शन घेतले. त्यांनी बारामती ते काटेवडी वारकऱ्यांसोबत पायी चालत वारीत सहभाग घेतला. त्यांच्या समवेत त्यांच्या पत्नी खासदार सुनेत्रा पवार यादेखील सहभागी झाल्या.
डोक्यावर टोपी व हातात टाळ घेऊन वारकऱ्यांसमवेत उपमुख्यमंत्री पवार यांनी पायी वारीचा आनंद घेतला.
मुंबईहून विमानाने रविवारी (दि ७)सकाळी आठ वाजता उपमुख्यमंत्री अजित पवार बारामती विमानतळावर दाखल झाले. यावेळी उपमुख्यमंत्री तथा अर्थमंत्री म्हणून अजित पवार यांनी मुख्यमंत्री लाडकी बहीण योजना जाहीर केल्याबद्दल उपस्थित महिलांनी त्यांचे औक्षण केले, तसेच त्यांना पुष्पहार घालून त्यांचे आभार मानले. यानंतर मोटारीने ते संत तुकाराम महाराज पालखी सोहळ्यात दाखल झाले.
दरम्यान जगद्गुरु श्री संत तुकाराम महाराज पालखी सोहळ्याचे ‘ज्ञानोबा माऊली तुकाराम’ च्या जयघोषात, टाळ मृदंगाच्या गजरात, हाती दिंड्या-पताका, मुखी विठ्ठल नाम अशा भक्तिमय वातावरणात आज सकाळी काटेवाडीकडे प्रस्थान झाले. उपमुख्यमंत्री अजित पवार स्वतः या पालखी सोहळ्यात पायी चालत सहभागी झाल्याने वैष्णवांचा उत्साह दुणावला. यावेळी विविध पदाधिकारी व कार्यकर्ते देखील या पालखी सोहळ्यात सहभागी झाले होते. यावेळी खासदार सुनेत्रा पवार, अपर पोलीस अधीक्षक संजय जाधव, उप विभागीय अधिकारी वैभव नावडकर, उपमुख्यमंत्र्यांचे खासगी सचिव हनुमंत पाटील, महावितरणचे मुख्य अभियंता सुनील पावडे, अपर पोलीस अधीक्षक रमेश चोपडे, उप विभागीय पोलीस अधिकारी सुदर्शन राठोड, तहसीलदार गणेश शिंदे, गट विकास अधिकारी अनिल बागल आदी उपस्थित होते.
श्री. पवार यांनी पुष्पहार अर्पण करून संत तुकाराम महाराजांच्या पादुकांचे दर्शन घेतले. त्यांनी वारीत सहभागी झालेल्या वारकऱ्यांसोबत संवाद साधला आणि टाळाच्या साथीने विठूनामाचा गजर केला. पालखी मार्गावरील असलेल्या गावातील चौकात रांगोळी काढून, फुलांची उधळण करत तुकोबारायांच्या पालखी सोहळ्याचे स्वागत करण्यात आले. जगद्गुरु श्री संत तुकाराम महाराज पालखी सोहळ्याचा आज इंदापूर तालुक्यातील सणसर येथे मुक्काम असणार आहे.
.png "Videos"){kind=small}
