Pune News : ‘प्रॉपर्टी टॅक्स’चे चेक न वटल्यास आता थेट कारवाई होणार; महापालिका प्रशासनाचा इशारा

महापालिकेकडून दरवर्षी मिळकतकर देयके वितरित केली जातात आणि ती निश्चित मुदतीत भरण्याची जबाबदारी संबंधित मिळकतधारकांची असते. अनेक नागरिक धनादेशाद्वारे कर भरतात.

पुणे : पुणे महापालिकेकडून मिळकतकर भरण्यासाठी दिलेले धनादेश न वटल्यास संबंधित मिळकतधारकांवर कायदेशीर तसेच फौजदारी कारवाई करण्यात येणार असल्याचा इशारा कर आकारणी व संकलन विभागाने दिला आहे. अभय योजनेनंतर कर भरण्यासाठी मोठ्या प्रमाणावर धनादेश स्वीकारण्यात आले होते; मात्र, तब्बल ७ हजार ४७ धनादेश वटले नसल्याची माहिती समोर आली आहे.

महापालिकेकडून दरवर्षी मिळकतकर देयके वितरित केली जातात आणि ती निश्चित मुदतीत भरण्याची जबाबदारी संबंधित मिळकतधारकांची असते. अनेक नागरिक धनादेशाद्वारे कर भरतात. परंतु, अपुरी बँक माहिती, तांत्रिक अडचणी किंवा इतर कारणांमुळे काही धनादेश वटत नसल्याचे प्रशासनाच्या निदर्शनास आले आहे. १ एप्रिल २०२४ पासून अशा अनेक घटना घडल्या असून, संबंधितांना ‘नेगोशिएबल इन्स्ट्रुमेंट्स अॅक्ट १८८१’च्या कलम १३८ अंतर्गत नोटिसा बजावण्यात आल्या आहेत. तरीही अनेकांनी कराची रक्कम अद्याप जमा न केल्याने महापालिकेचे आर्थिक नुकसान होत असल्याचे प्रशासनाने स्पष्ट केले.

यामुळे ज्या नागरिकांचे धनादेश वटलेले नाही, त्यांनी तातडीने कराची थकबाकी भरावी, असे आवाहन करण्यात आले आहे. अन्यथा नियमांनुसार संबंधितांवर फौजदारी कारवाई केली जाईल, असा इशारा उपआयुक्त तथा कर आकारणी व संकलन विभाग प्रमुख रवि पवार यांनी दिला आहे.

विविध प्रश्नांवरून पुणे महापालिकेत खडाजंगी

शहरातील वाहतूक कोंडी, रखडलेले डीपी रस्ते, टीडीआर प्रक्रियेतील विलंब आणि पीएमपीएलच्या कारभारावरून महापालिकेच्या बुधवारच्या सर्वसाधारण सभेत जोरदार खडाजंगी झाली. प्रशासनाने यावर्षी १२ मिसिंग लिंकचे काम पूर्ण केले जाईल, तसेच समाविष्ट गावांतील प्रत्येकी एक मुख्य रस्त्याचे काम प्राधान्याने पूर्ण केले जाईल असे आश्वासन सभागृहात झालेल्या जोरदार चर्चेनंतर दिले. सभेच्या सुरुवातीलाच पीएमपीएलच्या कथित भ्रष्ट कारभाराविरोधात काँग्रेस सदस्यांनी आंदोलन करत निषेध नोंदवला. यावर महापौर मंजुषा नागपुरे यांनी पीएमपीएल संदर्भात लवकरच विशेष सभा घेण्यात येईल, असे स्पष्ट केले.

हेदेखील वाचा : Mumbai Local :  लोकल प्रवाशांसाठी महत्त्वाची बातमी! लवकरच स्वयंचलित दरवाजांची लोकल, दरवाज्यातील जीवघेण्या प्रवासाला बसणार आळा